អន្តរជាតិ
តុលាការព្រហ្មទណ្ឌអន្តរជាតិ ចេញសេចក្តីថ្លែងការណ៍នឹងធឹងតបនឹងការព្រមានរបស់អាមេរិក
× ប្រធានមហាសន្និបាតតុលាការព្រហ្មទណ្ឌអន្តរជាតិ ហៅកាត់ថា ICC បានចេញសេចក្តីថ្លែងការណ៍មួយតបទៅនឹងការព្រមាន របស់រដ្ឋាភិបាលក្រុងវ៉ាស៊ីនតោនពាក់ព័ន្ធនឹងការប៉ុនប៉ងបើកការស៊ើបអង្កេតមួយលើករណីឧក្រិដ្ឋកម្មសង្គ្រាម ដែលប្រព្រឹត្តដោយទាហានអាមេរិកនៅអាហ្កានីស្ថាន។ មហាសន្និបាត ICC បានអះអាងជាថ្មីថា អង្គភាពរបស់ខ្លួន មិនចំណុះ ឬក្រោមការបង្គាប់បញ្ជារបស់អ្នកណាឡើយ។
រដ្ឋមន្ត្រីការបរទេសអាមេរិកលោក Michael R. Pompeo តាមរយៈសន្និសីទសារព័ត៌មានថ្ងៃ១៥ មីនា បានព្រមានចាត់វិធានការតឹងរឹងមួយទៅលើមន្ត្រីរបស់តុលាការព្រហ្មទណ្ឌអន្តរជាតិ ដែលហ៊ានបើកការស៊ើបអង្កេតលើពលរដ្ឋអាមេរិកពាក់ព័ន្ធនឹងបទចោទឧក្រិដ្ឋកម្មសង្គ្រាម។ លោករដ្ឋមន្ត្រី អះអាងថា នឹងមានការរឹតត្បិត ឬហាមផ្តល់ទិដ្ឋការលើមន្ត្រីតុលាការ ដែលប៉ុនប៉ងចូលក្នុងទឹកដីខ្លួនដើម្បីស៊ើបអង្កេតនោះ។
នាវេទិកាដដែលនោះ លោករដ្ឋមន្ត្រី បានប្រកាសជំហរមិនប្រែប្រួលក្នុងការការពារពលរដ្ឋ និងអធិបតេយ្យរបស់អាមេរិក ដោយមិនអនុញ្ញាតឲ្យតុលាការព្រហ្មទណ្ឌអន្តរជាតិរំខានបានឡើយ។ ប្រមុខការទូតរូបនេះ ថែមទាំងបានដាស់តឿនឲ្យអង្គភាពយុត្តិធម៌អន្តរជាតិមួយនេះ កែប្រែរបៀបរបបធ្វើការរបស់ខ្លួន ដើម្បីធានាឲ្យថា មិនមានកត្តាជំរុញនយោបាយណាមួយពីក្រោយនៃចំណាត់ការរបស់ខ្លួន។
លោករដ្ឋមន្ត្រី បានលើកឡើងជាថ្មីថា ការណ៍ដែលអាមេរិក បានបដិសេធចូលជាភាគីនៃតុលាការព្រហ្មទណ្ឌអន្តរជាតិតាំងពីឆ្នាំ១៩៩៨មក ដោយសារតែអាមេរិក មើលឃើញថា តុលាការ មានលក្ខណៈទូលាយពេក និងពិសេសនោះ គំរាមកំហែងដល់អធិបតេយ្យអាមេរិកតែម្តង។ អាមេរិក ក៏ខ្លាចក្រែងថា តុលាការ បំពេញការងារដោយសារកត្តាជំរុញនយោបាយ និងធ្វើឲ្យប៉ះពាល់ដល់អធិបតេយ្យអាមេរិក។
មួយថ្ងៃក្រោយ នៃការប្រកាសជំហររឹងត្អឹងរបស់អាមេរិក ប្រធានមហាសន្និបាតតុលាការព្រហ្មទណ្ឌអន្តរជាតិ លោក O-Gon Kwon បានអះអាងជាថ្មីដូចគ្នាផងដែរថា តុលាការព្រហ្មទណ្ឌអន្តរជាតិ មានការគាំទ្រយ៉ាងរឹងមាំពីភាគី ឬសមាជិក របស់លក្ខន្តិកៈក្រុងរ៉ូម។
ប្រមុខរូបមហាសន្និបាតរូបនេះ សង្កត់ធ្ងន់ថា ភាគីទាំង១២៣ប្រទេសនៃលក្ខន្តិកៈក្រុងរ៉ូម បានប្រកាសគាំទ្រយ៉ាងមុតមាំក្នុងការឲ្យតុលាការបំពេញបេសកកម្មឯករាជ្យ និងតម្លាភាព ក៏ដូចជា ប្តេជ្ញាបន្ត និងការពារគោលការណ៍ តម្លៃ និងកិត្យានុភាពរបស់ខ្លួនពីការគំរាមកំហែង និងប្រឆាំងពីខាងក្រៅ។ លោក បានគូសបញ្ជាក់ថាតុលាការ បំពេញការងារដោយមិនជាប់ពាក់ព័ន្ធកត្តានយោបាយឡើយ ហើយចំណាត់ការទាំងអស់របស់តុលាការធ្វើឡើងក្នុងរង្វង់ច្បាប់នៃលក្ខន្តិកៈក្រុងរ៉ូមប៉ុណ្ណោះ៕
© រក្សាសិទ្ធិដោយ thmeythmey.com