សូមប្រុងប្រយ័ត្ន! នៅថ្ងៃទី២១-២៤ បណ្តាខេត្តមួយចំនួន នឹងមានភ្លៀងកក់ខែ ដែលលាយឡំជាមួយរន្ទះ

ជាតិ

សង្គមជាតិ

សូមប្រុងប្រយ័ត្ន! នៅថ្ងៃទី២១-២៤ បណ្តាខេត្តមួយចំនួន នឹងមានភ្លៀងកក់ខែ ដែលលាយឡំជាមួយរន្ទះ

18, Mar 2019 , 7:59 am

រូបភាព

ដោយ: ថ្មីៗ

ភ្នំពេញ៖ ក្រសួងធនធានទឹក និងឧតុនិយម បានព្យាករថា នៅតាមបណ្តាខេត្តមួយចំនួន នឹងមានភ្លៀងកក់ខែ ដែលលាយឡំជាមួយរន្ទះ និងខ្យល់កន្ត្រាក់ផងដែរ ដែល នឹងមកដល់នៅថ្ងៃទី២១ ដល់ថ្ងៃទី២៤ ខែមីនា។ បាតុភូតនេះ គឺបណ្តាលមកពីកម្ពុជាទទួលរងឥទ្ធិពលពីខ្យល់ដែលបក់មកពីទិសខាងកើត និងទិសអាគ្នេយ៍។

ក្រសួងធនធានទឹក និងឧតុនិយម បានព្យាករថា ចាប់ពីថ្ងៃទី២១ ដល់ថ្ងៃទី២៤ ខែមីនា នៅខេត្តព្រៃវែង ស្វាយរៀង ក្រចេះ ស្ទឹងត្រែង ត្បូងឃ្មុំ កំពង់ចាម កណ្តាល កំពង់ស្ពឺ តាកែវ កំពង់ធំ កំពង់ឆ្នាំង និងខេត្តពោធិ៍សាត់ នឹងមានភ្លៀងកក់ខែ រួមទាំងមានរន្ទះ និងខ្យល់កន្ត្រាក់។ ដោយឡែកនៅថ្ងៃទី ២៣ ដល់ថ្ងៃទី២៤ ខែមីនា នៅខេត្តសៀមរាប បាត់ដំបង ប៉ៃលិន បន្ទាយមានជ័យ ឧត្តរមានជ័យ និងខេត្តព្រះវិហារ ក៏នឹងមានភ្លៀងកក់ខែ ដែលលាយឡំជាមួយនឹងរន្ទះ និងខ្យល់កន្ត្រាក់ផងដែរ។

បើផ្អែកតាមការព្យាករដដែល សម្រាប់បណ្តាខេត្តនៅភាគខាងកើត ខាងត្បូង និងតំបន់មាត់សមុទ្រ នឹងមានសីតុណ្ហភាពចន្លោះពី៣០-៣២អង្សា។ ចំណែកនៅតាមបណ្តាខេត្តផ្សេងទៀត មានសីតុណ្ហភាពចន្លោះពី៣២-៣៥អង្សា។

ក្រសួងធនធានទឹក អំពាវនាវដល់ពលរដ្ឋបង្កើនការប្រុងប្រយ័ត្នខ្ពស់ ចំពោះបាតុភូតរន្ទះ និងខ្យល់កន្រា្តក់ ដែលអាចកើតមានជាយថាហេតុ នៅអំឡុងពេលមេឃរកកលភ្លៀង៕