កីឡាជាតិ
ជាតិ
ខេមបូឌានលីគ៖ ជ័យជម្នះសម្រាប់ណាហ្គាវើល ព្រះខ័នរាជស្វាយរៀង រីឯពីរគូទៀតស្មើគ្នា ខ្សែប្រយុទ្ធអាហ្សង់ទីន Alexis Ramos នៃក្រុមអង្គរថាយហ្គឺរ អបអរក្រោយស៊ុតបាល់បញ្ចូលទីនាំមុខម្ចាស់ផ្ទះក្រសួងការពារជាតិ។ រូបថត CNCC
× ណាហ្គាវើល និងព្រះខ័នរាជស្វាយរៀង បានម្នាក់៣ពិន្ទុ នាការប្រកួតសប្តាហ៍ទីមួយនៃក្របខណ្ឌមិត្តហ្វូនខេមបូឌានលីគរដូវកាលថ្មី នៅអាទិត្យនេះ។ រីឯ វិសាខា និង ក្រសួងការពារជាតិ ចែកម្នាក់១ពិន្ទុជាមួយក្រុមភ្ញៀវ។
ម្ចាស់ការពារតំណែងជើងឯកណាហ្គាវើល បានយកឈ្នះម្ចាស់ផ្ទះ អាស៊ីអឺរ៉ុបយូណាយធីត ១-០ នៅកីឡដ្ឋាន អេ អ៊ី យូ ស្ពតផាគ តាមរយៈការស៊ុតបាល់បញ្ចូលទីនៅនាទី៦៧ របស់ ឡេង មករា។ នៅម៉ោងដំណាលគ្នានោះ ជំនួបរវាងម្ចាស់ផ្ទះ វិសាខា និងសូលទីឡូអង្គរ បានបញ្ចប់ការប្រកួតដោយគ្មានការស៊ុតបាល់បញ្ចូលទី។
ចំណែកព្រះខ័នរាជស្វាយរៀង ពួកគេបានផ្តល់លទ្ធផលដ៏ពេញចិត្តសម្រាប់ក្រុមអ្នកគាំទ្រ ជាមួយនឹងជ័យជម្នះ ២-០ លើអគ្គស្នងការដ្ឋាននគរបាលជាតិ។ នេន សុធារដ្ឋ សម្រេចបានគ្រាប់បាល់ប៉េណាល់ទីនៅនាទី៧០ ហើយខ្សែប្រយុទ្ធកូរ៉េខាងត្បូង Gisung Yeon បន្ថែម១គ្រាប់ទៀតនារយៈពេល៨នាទីបន្ទាប់។
រីឯជំនួបនៅកីឡដ្ឋានកងយោធពលខេមរភូមិន្ទ ក្រុមម្ចាស់ផ្ទះក្រសួងការពារជាតិ បានវាយបកតាមស្មើដើម្បីចែក១ពិន្ទុជាមួយអង្គរថាយហ្គឹរ។ នៅនាទី៥៤ ខ្សែប្រយុទ្ធអាហ្សង់ទីន Alexis Ramos រកបានគ្រាប់បាល់នាំមុខសម្រាប់ក្រុមភ្ញៀវ ប៉ុន្តែឈានដល់៦នាទីនៃម៉ោងបន្ថែមទៅហើយ កាន់ ពិសាល រកបានគ្រាប់បាល់តាមស្មើវិញ។
នៅសប្តាហ៍ទីមួយនេះ គិរីវង់សុខសែនជ័យ ឈរលេខមួយបណ្តោះអាសន្ន ក្រោយឈ្នះយុវជនបាទី ៤-១ ព្រះខ័នរាជស្វាយរៀងនៅលេខពីរ ដោយមានបីពិន្ទុស្មើណាហ្គាវើល និងខេត្តកំពង់ចាម៕
© រក្សាសិទ្ធិដោយ thmeythmey.com