ប្រជាជនថៃច្រើនលាននាក់ចេញទៅបោះឆ្នោតមុនកំណត់ ដោយសង្ឃឹមខ្ពស់ថានឹងមានការផ្លាស់ប្តូរ

អន្តរជាតិ

ប្រជាជនថៃច្រើនលាននាក់ចេញទៅបោះឆ្នោតមុនកំណត់ ដោយសង្ឃឹមខ្ពស់ថានឹងមានការផ្លាស់ប្តូរ

18, Mar 2019 , 12:39 pm

រូបភាព

ដោយ: ថ្មីៗ

ប្រជាជនថៃជាច្រើនសែននាក់បានប្រមូលផ្តុំគ្នានៅថ្ងៃអាទិត្យទី ១៧ ខែមីនា នៅតាមសាលារៀន វត្តអារ៉ាម និងទីសាធារណៈផ្សេងទៀតជាច្រើនដែលមានការិយាល័យបោះឆ្នោតតាំងនៅដើម្បីប្រើប្រាស់សិទ្ធិនយោបាយរបស់ខ្លួនជាលើកដំបូងក្នុងរយៈពេលជិតប្រាំឆ្នាំនេះ។ គេសង្កេតឃើញថា ចំនួនអ្នកបោះឆ្នោតមុនកំណត់នេះមានកម្រិតខ្ពស់គួរឲ្យកត់សម្គាល់ផងដែរ។

ការបោះឆ្នោតសភាមុនកំណត់នៅថៃត្រូវបានរៀបចំឡើងនៅថ្ងៃអាទិត្យទី ១៧ ខែមីនា ដើម្បីសម្រួលដល់ការចូលរួមរបស់ប្រជាជនទូទាំងប្រទេស និងជំរុញឲ្យប្រជាជនចូលរួមកាន់តែច្រើន។ ឯការបោះឆ្នោតផ្លូវការនឹងត្រូវរៀបចំឡើងនៅថ្ងៃ ២៤ ខែមីនាឯណោះ។

បើតាមទីភ្នាក់ងារព័ត៌មាន AFP គេរំពឹងថា ប្រជាជនថៃដែលបោះឆ្នោតមុនកំណត់នេះអាចនឹងមានចំនួនលើសពី ២,៣ លាននាក់ឯណោះ។ គេកត់សម្គាល់ថា អ្នកចូលរួមបោះឆ្នោតថ្ងៃ ១៧ ខែមីនា នាំគ្នាតម្រង់ជួរដោយទឹកមុខរីករាយនៅតាមការិយាល័យបោះឆ្នោតប្រកបដោយភាពអត់ធ្មត់។ ខ្លះមកបោះឆ្នោតទាំងឯកសណ្ឋានយោធា ឯកសណ្ឋានគ្រូពេទ្យ និងខ្លះទៀតពាក់ខោអាវធំធ្វើការថែមទៀត។

អ្វីដែលសំខាន់ប្រជាជនថៃភាគច្រើនបានបង្ហាញអារម្មណ៍រីករាយដែលបានប្រើប្រាស់សិទ្ធិនយោបាយរបស់ខ្លួនឡើងវិញដើម្បីជ្រើសរើសបក្សនយោបាយដែលខ្លួនពេញចិត្ត ក្រោយស្ថិតក្រោមការដឹកនាំរបស់ក្រុមយោធាអស់ជិតប្រាំឆ្នាំមកនេះ។

ទាក់ទិននឹងការបោះឆ្នោតសាកលនេះ បេក្ខជននាយករដ្ឋមន្ត្រីរបស់បក្សភឿថៃលោកស្រី Sudarat Keyuraphan ប្រាប់ទីភ្នាក់ងារព័ត៌មាន AFP ថា ប្រជាជនថៃទាំងអស់មានក្តីរំពឹងខ្ពស់ចំពោះការបោះឆ្នោតលើកនេះ ដ្បិតវាអាចនឹងនាំមកនូវការផ្លាស់ប្តូរដ៏ធំផង។ ហើយអ្វីដែលសំខាន់ លោកស្រីមានទំនុកចិត្តថា គណបក្សខ្លួននឹងទទួលបានសំឡេងគាំទ្រច្រើនផងដែរដើម្បីឈានទៅដឹកនាំប្រទេស។

យ៉ាងណាមិញ កន្លងមកអ្នកវិភាគច្រើនបានផ្តល់យោបល់ថា ប្រព័ន្ធបោះឆ្នោតថ្មីដែលត្រូវបានអនុវត្តនោះមានភាពលម្អៀងទៅរកគណបក្សដែលស្និទ្ធនឹងក្រុមយោធា ដែលដឹកនាំដោយលោក ប្រាយុទ្ធ ចន្ទអូចា។ លោក ប្រាយុទ្ធ ឈរឈ្មោះជានាយករដ្ឋមន្ត្រី ក្រោយពេលដែលរដ្ឋាភិបាលស៊ីវិលមួយត្រូវបានបង្កើតឡើង បើសិនបក្សលោកឈ្នះឆ្នោត។

សូមបញ្ជាក់ថា ប្រជាជនថៃលើស ៥១ លាននាក់ឯណោះដែលមានសិទ្ធិចូលរួមក្នុងការបោះឆ្នោតសាកលថ្ងៃ ២៤ ខែមីនាខាងមុខនេះ។ វាជាការបោះឆ្នោតប្រជាធិបតេយ្យលើកដំបូងបំផុតរាប់ចាប់ពីពេលដែលក្រុមយោធាដឹកនាំដោយលោក ប្រាយុទ្ធ ចន្ទអូចា ដណ្តើមអំណាចកាលពីខែឧសភាឆ្នាំ ២០១៤ និងមានការពន្យារពេលបោះឆ្នោតជាច្រើនលើកមកនោះ៕