ជាតិ
នយោបាយជាតិ
អ្នកនាំពាក្យមហាផ្ទៃ៖ អតីតថ្នាក់ដឹកនាំបក្សប្រឆាំងជិត៣០នាក់ ចង់សុំសិទ្ធិនយោបាយជាក្រុម លោក អ៊ូ ច័ន្ទរ័ត្ន ជាមនុស្សម្នាក់ ក្នុងចំណោម៥នាក់ ដែលទើបនឹងដាក់ពាក្យទៅក្រសួងមហាផ្ទៃ ដើម្បីសុំសិទ្ធិចូលធ្វើនយោបាយវិញ
× លោក ខៀវ សុភ័គ អ្នកនាំពាក្យក្រសួងមហាផ្ទៃ បង្ហើបថា ថ្មីៗនេះ មានតំណាងមន្ត្រីអតីតគណបក្សសង្គ្រោះជាតិ បានទៅក្រសួងមហាផ្ទៃ ដើម្បីពិភាក្សាពីការសុំសិទ្ធិនយោបាយវិញ។ លោក អះអាងថា តំណាងដែលទៅជួបមន្ត្រីក្រសួងមហាផ្ទៃ បានសុំធ្វើសំណើជាក្រុមតែម្តង ដែលមានគ្នាដល់ទៅ២៦នាក់។
បើតាមលោក ខៀវ សុភ័គ មន្ត្រីក្រសួងមហាផ្ទៃ បានពន្យល់ទៅអតីតមន្ត្រីគណបក្សប្រឆាំងថា ការសុំសិទ្ធិនយោបាយ គឺត្រូវធ្វើជាលក្ខណៈបុគ្គល ដោយមិនអាចធ្វើជាក្រុមបានឡើយ។ លោក បន្តថា រហូតដល់ថ្ងៃទី១៨ ខែមីនា ឆ្នាំ២០១៩នេះ ក៏មានអតីតមន្ត្រីគណបក្សប្រឆាំង៥នាក់បន្ថែមទៀត បានធ្វើសំណើជាលក្ខណៈបុគ្គល ទៅក្រសួងមហាផ្ទៃ ក្រោយពួកគេ ស្នើសុំធ្វើសំណើជាក្រុមមិនបាន។
អ្នកទាំង៥នោះ គឺ លោក អ៊ូ ច័ន្ទរ័ត្ន លោក កង គឹមហាក់ អ្នកស្រី ទេព សុទ្ធី លោក ជីវ កក្តា និង លោក ចាន់ សីលា។ ៤នាក់ សុទ្ធតែជាអតីតតំណាងរាស្ត្រគណបក្សប្រឆាំង ដោយលើកលែងតែលោក លោក ចាន់ សីលា ប៉ុណ្ណោះ ដែលមិនមែនជាតំណាងរាស្រ្ត តែលោក ជាអតីតសមាជិកគណៈកម្មាធិការនាយកគណបក្សប្រឆាំង។
អ្នកនាំពាក្យមហាផ្ទៃ ប្រាប់សារព័ត៌មានថ្មីៗ យ៉ាងដូច្នេះថា៖«ព័ត៌មានកន្លងមក ឮថាមានតំណាងគណបក្សប្រឆាំង មកមហាផ្ទៃ ហើយចង់សុំសិទ្ធិជាក្រុម តែយើង ថាមិនអាចធ្វើបានទេ។ យើង ឲ្យពួគគាត់ ធ្វើសំណើម្នាក់ម្តង»។
លោក អ៊ូ ច័ន្ទរ័ត្ន ប្រាប់សារព័ត៌មានថ្មីៗថា លោក និងអ្នកទាំង៤ ពិតជាបានដាក់សំណើទៅក្រសួងមហាផ្ទៃមែន។ ប៉ុន្តែ ចំពោះព័ត៌មាន ដែលថាមានមន្ត្រីគណបក្សប្រឆាំងដល់ទៅ២៦នាក់ ដែលមានចេតនាចង់ធ្វើសំណើជាក្រុមនោះ លោក សុំមិនធ្វើអត្ថាធិប្បាយ។
លោក អ៊ូ ច័ន្ទរ័ត្ន លើកឡើងយ៉ាងដូច្នេះថា៖«ពេលនេះ ខ្ញុំ សុំមិននិយាយអ្វីទាំងអស់។ ពេលខ្ញុំទទួលបានសិទ្ធិនយោបាយវិញហើយ ខ្ញុំនឹងធ្វើសន្និសីទកាសែតតែម្តង»។
មកដល់ពេលនេះ មានអតីតថ្នាក់ដឹកនាំគណបក្សប្រឆាំំង៤នាក់ហើយ គឺលោក គង់ គាំ លោក គង់ បូរ៉ា លោក ស៊ឹម សុវណ្ណឌី និងលោក រៀល ខេមរិន្ទ្រ ដែលទទួលបានសិទ្ធិនយោបាយវិញ។
អតីតថ្នាក់ដឹកនាំទាំងអស់ មាន១១៨នាក់ (ស្លាប់ម្នាក់) ដែលត្រូវបានតុលាការកំពូល ហាមមិនឲ្យធ្វើនយោបាយរយៈពេល៥ឆ្នាំ៕
Tag:
ខៀវ សុភ័គ
អ៊ូ ច័ន្ទរ័ត្ន
សិទ្ធិនយោបាយ
© រក្សាសិទ្ធិដោយ thmeythmey.com