ជាតិ
សង្គមជាតិ
លោក Bernard Krisher ស្ថាបនិក The Cambodia Daily ទទួលមរណភាពក្រោយកាសែតបិទទ្វារជិត២ឆ្នាំ លោក Bernard Krisher ស្ថាបនិកកាសែត The Cambodia Daily ទទួលមរណភាពក្នុងអាយុ៨៧ឆ្នាំ។ ប្រភពរូបថត The Cambodia Daily
× លោក Bernard Krisher ស្ថាបនិកកាសែត The Cambodia Daily បានទទួលមរណភាពក្នុងវ័យ៨៧ឆ្នាំ នៅមន្ទីរពេទ្យមួយក្នុងទីក្រុងតូក្យូ ប្រទេសជប៉ុន កាលពីថ្ងៃទី៥ ខែមីនា ឆ្នាំ២០១៩។ បើតាមការចុះផ្សាយរបស់ ដឹ ខេមបូឌា ដេលី លោក Krisher មានជំងឺបេះដូង។
ស្ថានទូតអាមេរិកប្រចាំកម្ពុជា បានបង្ហោះលើទំព័រហ្វេសប៊ុកបង្ហាញពីការសោកស្តាយចំពោះមរណភាពរបស់លោក Krisher ជនជាតិអាមេរិក ដែលមានកំណើតនៅក្រុង Frankfurt ប្រទេសអាល្លឺម៉ង់។ ស្ថានទូតអាមេរិក បានសរសេរយ៉ាងដូច្នេះថា៖«លោក Krisher មិនត្រឹមតែបានធ្វើឲ្យប្រជាជនកម្ពុជារាប់លាននាក់ទទួលបានព័ត៌មានតែប៉ុណ្ណោះទេ តែលោកថែមទាំងបានចំណាយពេលវេលារបស់លោករាប់ទសវត្សរ៍ ដើម្បីធ្វើការងារមនុស្សធម៌នៅកម្ពុជា»។
អ្នកកាសែត អ្នកតាមដានព្រឹត្តិការណ៍នយោបាយ និងប្រជាពលរដ្ឋខ្មែរមួយចំនួន ក៏បាននាំគ្នាចូលរួមរំលែកទុក្ខតាមរយៈការបង្ហោះសារលើបណ្តាញសង្គមដែរ ចំពោះការបាត់បង់លោក Krisher។
ដឹ ខេមបូឌា ដេលី បានរម្លឹកពីគុណសម្បត្តិជាច្រើនរបស់លោក Krisher ដែលធ្លាប់ជួយដល់ប្រទេសកម្ពុជា ដូចជាការបង្កើតសាលារៀនតាមបណ្តាខេត្តជាដើម។ កាសែតនេះ បានសរសេរយ៉ាងដូច្នេះថា៖«លោក Krisher បានចំណាយពេលវេលារបស់គាត់៣ទសវត្សរ៍ចុងក្រោយ ក្នុងកិច្ចការមនុស្សធម៌នៅកម្ពុជា»។
Krisher បានបង្កើតកាសែតខេមបូឌា ដេលី តាំងពីឆ្នាំ១៩៩១មក។ ប៉ុន្តែ កាសែតនេះ ត្រូវបង្ខំចិត្តបិទទ្វារ កាលខែសីហា ឆ្នាំ២០១៧ បន្ទាប់ពីរដ្ឋាភិបាល ទាមទារឲ្យបង់ពន្ធជាង៦លានដុល្លារ៕
© រក្សាសិទ្ធិដោយ thmeythmey.com