ជាតិ
សង្គមជាតិ
វៀតណាម ថៃ ឡាវ ជួយផ្គត់ផ្គង់អគ្គិសនីកម្ពុជា ដែលត្រូវខ្វះខាតដល់ទៅជាងពីរខែ
× ដោយសារការផ្គត់ផ្គង់អគ្គិសនីមិនគ្រប់គ្រាន់ក្នុងរយៈពេលនេះ កម្ពុជា ក៏សម្រេចស្នើឲ្យប្រទេសជិតខាងជួយ។ អគ្គិសនីកម្ពុជា (EDC) បានបញ្ជាក់ក្នុងសេចក្តីប្រកាសព័ត៌មាន នៅថ្ងៃទី១៨មីនានេះថា ថៃ បានជួយបង្កើនការផ្គត់ផ្គង់បន្ថែម ៨០មេហ្កាវ៉ាត់ ឡាវជួយបន្ថែម ១០មេហ្កាវ៉ាត់ ហើយវៀតណាម បានរក្សាការផ្គត់ផ្គង់អគ្គិសនីឲ្យនៅដដែល។
អគ្គិសនីកម្ពុជា អះអាងថា ទោះជាមានការជួយផ្គត់ផ្គង់ពីប្រទេសទាំងនេះក្តី តែកម្ពុជា នៅតែខ្វះថាមពលប្រមាណ១៣ភាគរយទៀត។ អគ្គិសនីកម្ពុជា បន្តថា ការខ្វះខាតនេះ តម្រូវឲ្យអគ្គិសនីកម្ពុជា កាត់បន្ថយការផ្គត់ផ្គង់ខ្លះ រហូតដល់រដូវវស្សា។
អគ្គិសនីកម្ពុជា បន្ថែមថា ការកាត់បន្ថយការផ្គត់ផ្គង់ គឺធ្វើនៅពេលថ្ងៃ តាមកន្លែងឆ្លាស់គ្នា ដើម្បីរក្សាការផ្គត់ផ្គង់ពេលយប់។ អគ្គិសនីកម្ពុជា ផ្តល់ព័ត៌មានថា ការលំបាកនេះ នឹងមានរយៈពេល៧២ថ្ងៃ គឺរហូតដល់ចុងខែឧសភា។
យ៉ាងណា អគ្គិសនីកម្ពុជា លើកឡើងថា ថ្ងៃបុណ្យជាតិ និងថ្ងៃអាទិត្យ ត្រូវរក្សាការផ្គត់ផ្គង់អគ្គិសនីជាធម្មតា។ ម្យ៉ាងទៀត អគ្គិសនីកម្ពុជា អះអាងថា ការផ្គត់ផ្គង់អគ្គិសនី នឹងមានជាប្រក្រតីវិញ បើមានភ្លៀងធ្លាក់មុនចុងខែឧសភា។ លើសពីនេះ អគ្គិសនីកម្ពុជា កំពុងតែសិក្សារកប្រភពផ្គត់ផ្គង់អគ្គិសនីបន្ថែមទៀត។ ទន្ទឹមនឹងនេះ អគ្គិសនីកម្ពុជា បានអំពាវនាវឲ្យប្រជាពលរដ្ឋ ចូលរួមសន្សំសំចៃក្នុងការប្រើប្រាស់អគ្គិសនី។
បើតាមអគ្គិសនីកម្ពុជាដដែល អាកាសធាតុក្តៅ និងការខ្វះទឹក បានធ្វើឲ្យតម្រូវការប្រើប្រាស់ថាមពលអគ្គិសនីនៅឆ្នាំ២០១៩ បានកើនឡើងយ៉ាងគំហុក។ អគ្គិសនីកម្ពុជា ពន្យល់ថា ការខ្វះទឹក ធ្វើឲ្យសមត្ថភាពផ្គត់ផ្គង់អគ្គិសនី ដែលចេញពីវារីអគ្គិសនី ថយចុះ ដោយមិនអាចធានាការផ្គត់ផ្គង់ថាមពលអគ្គិសនីពេញលេញទូទាំងប្រទេស។
ប្រមុខរដ្ឋាភិបាល ប្រកាសថា កម្ពុជា ខ្វះអគ្គិសនីដល់ទៅ ៤០០មេហ្កាវ៉ាត់ឯណោះ ហើយកម្ពុជា កំពុងរង់ចាំការឆ្លើយតបពីប្រទេសតួកគី ក្នុងការបញ្ជូនម៉ាស៊ីនភ្លើងមកកម្ពុជា ដើម្បីផ្គត់ផ្គង់អគ្គិសនី៕
© រក្សាសិទ្ធិដោយ thmeythmey.com