ជាតិ
នយោបាយជាតិ
សម្ដេច ហ៊ុន សែន ទទួលសញ្ញាបត្របណ្ឌិតកិត្តិយសផ្នែកទំនាក់ទំនងនយោបាយពីសាកលវិទ្យាល័យគ្រើក ប្រទេសថៃ
×![]()
ដោយ: ថ្មីៗ
ភ្នំពេញ៖ នៅព្រឹកថ្ងៃទី១៩ មីនានេះ សម្ដេច ហ៊ុន សែន បានទទួលសញ្ញាបត្របណ្ឌិតកិត្តិយសផ្នែកទំនាក់ទំនងនយោបាយពីសាកលវិទ្យាល័យគ្រើក ប្រទេសថៃ។ លោក Krasae Chanawongse ប្រធានសាកលវិទ្យាល័យគ្រើក ជាអ្នកប្រគល់សញ្ញាបត្រជូនសម្ដេច ហ៊ុន សែន។
ថ្លែងក្នុងពិធីប្រគល់សញ្ញាបត្រនេះ លោក Krasae Chanawongse បាននិយាយថា ការប្រគល់សញ្ញាបត្រឲ្យសម្ដេចនេះ ដោយសារផ្អែកលើសមត្ថភាពនៃការដឹកនាំរបស់ប្រមុខរដ្ឋាភិបាលកម្ពុជា ក្នុងរយៈពេល៤០ឆ្នាំមក ដែលបាននាំកម្ពុជាចេញពីភ្លើងសង្គ្រាម ហើយឈានទៅដល់ការទទួលស្គាល់ពីសំណាក់អន្តរជាតិ តាមរយៈការប្រើប្រាស់ទំនាក់ទំនងនយោបាយការបរទេសបានយ៉ាងល្អ។ បើតាមប្រធានសាកលវិទ្យាល័យគ្រើក កម្ពុជាកំពុងមានវត្តមានស្មើមុខស្មើមាត់ជាមួយប្រទេសក្នុងតំបន់អាស៊ាន និងឆាកអន្តរជាតិទៀតផង។ នោះក៏ព្រោះតែការប្រើប្រាស់សិល្បៈ និងវិទ្យាសាស្ត្រផ្នែកទំនាក់ទំនងនយោបាយក្នុងការគ្រប់គ្រងប្រទេស និងការដឹកនាំប្រជាជាតិឆ្ពោះទៅដល់វិបុលភាព ។ នេះបើតាមលោក Krasae Chanawongse ។
សម្ដេច ហ៊ុន សែន ដែលទទួលបានសញ្ញាបត្របណ្ឌិតកិត្តិយសផ្នែកទំនាក់ទំនងនយោបាយនេះ ចាត់ទុកវាជាអត្ថន័យសំខាន់មួយសម្រាប់ប្រជាជនកម្ពុជា ក៏ដូចជាសម្ដេច ដែលត្រូវបានទទួលស្គាល់ពីសំណាក់សាកលវិទ្យាល័យគ្រើក ប្រទេសថៃនេះ។ បើតាមសម្ដេច ហ៊ុន សែន សញ្ញាបត្រមួយសន្លឹកនេះ វាក៏បញ្ជាក់ពីទំនាក់ទំនងយ៉ាងល្អរវាងប្រទេសកម្ពុជា-ថៃ ក្នុងផ្នែកនយោបាយការទូត សេដ្ឋកិច្ច វប្បធម៌ និងសន្តិសុខផងដែរ។
អមជាមួយការលើកឡើងខាងលើប្រមុខរដ្ឋាភិបាលកម្ពុជា ក៏មិនភ្លេចពីការប្ដេជ្ញាចិត្តដឹកនាំកម្ពុជា ឈានឲ្យផុតពីប្រទេសអភិវឌ្ឍន៍តិចតួច ទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ឡើយ។
គួរបញ្ជាក់ថា សម្ដេច ហ៊ុន សែន ធ្លាប់ទទួលបានសញ្ញាបត្របណ្ឌិតកិត្តិយសពីសាកលវិទ្យាល័យនៅប្រទេសនានាផ្សេងទៀត ចាប់តាំងពីឆ្នាំទសវត្ស ៩០មក ។ ក្នុងនោះឆ្នាំ១៩៩៥ សម្តេច បានទទួលសញ្ញាបត្របណ្ឌិតកិត្តិយសផ្នែកវិទ្យាសាស្ត្រនយោបាយ ពីសាកលវិទ្យាល័យកាលីហ្វ័រញ៉ាខាងត្បូង សម្រាប់ការសិក្សាមុខជំនាញ។ នៅឆ្នាំ១៩៩៦ បានទទួលសញ្ញាបត្របណ្ឌិតកិត្តិយសផ្នែកច្បាប់ពីមហាវិទ្យាល័យ វ៉ែសឡេយ៉ិន (Wesleyan) រដ្ឋអាយអូវ៉ា (Iowa) នៃសហរដ្ឋអាមេរិកជាដើម។ នេះបើតាម លោក Krasae Chanawongse ប្រធានសាកលវិទ្យាល័យគ្រើក ដែលអានពីគុណសម្បត្តិមេដឹកនាំកម្ពុជា៕
Tag:
ហ៊ុន សែន
នយោបាយ
© រក្សាសិទ្ធិដោយ thmeythmey.com
