លោកកែ គឹមយ៉ាន៖ ទីកម្សាន្តស្ទើរទាំងអស់ មានគ្រឿងញៀន ហើយតាមជនបទ ក៏មិនថយចុះ

ជាតិ

សង្គមជាតិ

លោកកែ គឹមយ៉ាន៖ ទីកម្សាន្តស្ទើរទាំងអស់ មានគ្រឿងញៀន ហើយតាមជនបទ ក៏មិនថយចុះ

19, Mar 2019 , 1:24 pm

រូបភាព

លោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន

ដោយ: ថ្មីៗ

ការចែកចាយគ្រឿងញៀននៅតាមទីជនបទ តាមឃុំ និង តាមភូមិ មិនទាន់ថយចុះនៅឡើយទេ បើទោះបីជារយៈពេលចុងក្រោយនេះ សមត្ថកិច្ច បានបង្ក្រាបករណីគ្រឿងញៀនធំៗជាបន្តបន្ទាប់ក៏ដោយ។ នេះជាប្រសាសន៍របស់ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ដែលត្រូវបានដកស្រង់ទៅចុះផ្សាយក្នុងគេហទំព័របស់អគ្គស្នងការនគរបាលជាតិ នៅថ្ងៃទី១៩ ខែមីនា ឆ្នាំ២០១៩។

អគ្គស្នងការនគរបាលជាតិ បានសរសេរពីសម្តីរបស់លោក កែ គឹមយ៉ាន ដែលថ្លែងក្នុងកិច្ចប្រជុំស្តីពីលទ្ធផលការងារត្រួតពិនិត្យគ្រឿងញៀនឆ្នាំ២០១៨ យ៉ាងដូច្នេះថា៖«ពីមុន ខ្ញុំ សន្និដ្ឋានថា ករណីគ្រឿងញៀន នឹងអាចថយ ដោយសារចាប់ករណីធំៗបានច្រើន។ ប៉ុន្តែការចែកតាមភូមិ-ឃុំហ្នឹង គឺវាមិនថយទេ។ ចំណែក ទីកម្សាន្តនានាស្ទើរតែទាំងអស់ មានប្រើប្រាស់គ្រឿងញៀន»។

បើតាមអគ្គស្នងការនគរបាលជាតិ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានអំពាវនាវដល់ស្ថាប័នពាក់ព័ន្ធទាំងអស់ ឲ្យរួមគ្នាស៊ើបអង្កេតនិងស្វែងរកម្ចាស់និងអ្នកពីក្រោយខ្នងនៃការនាំចូលគ្រឿងញៀន។

សម្តេចនាយករដ្ឋមន្ត្រី ហ៊ុន សែន ទើបនឹងព្រមានថា សម្តេច នឹងចាប់ឈ្មួញគ្រឿងញៀនទាំងអស់ ទោះជាពួកគេ មានលុយ-មានអំណាចប៉ុនណា ហើយពាក់ផ្កាយ-ពាក់លោកខែប៉ុន្មានក៏ដោយ។ ការព្រមានរបស់សម្តេចនាយករដ្ឋមន្ត្រី គឺធ្វើឡើងបន្ទាប់ពី សមត្ថកិច្ច បានបង្ក្រាបបទល្មើសគ្រឿងញៀនទ្រង់ទ្រាយធំ នៅក្នុងក្លិបកម្សាន្ត Rock ហើយឈានទៅដល់បិទក្លិបនេះចោល និង ចាប់ខ្លួនឧកញ៉ា គិត ធាង ដែលជាម្ចាស់ក្លិប។

អត្ថបទទាក់ទង

សម្តេចព្រមានអ្នកជួញគ្រឿងញៀនថា «អ្នកឯងពាក់លោកខែ ក៏ខ្ញុំចាប់ដែរ»

អគ្គស្នងការនគរបាលជាតិ ចុះផ្សាយពីរបាយការណ៍ស្តីពីការប្រយុទ្ធប្រឆាំងគ្រឿងញៀនថា ក្នុងឆ្នាំ២០១៨ បទល្មើសគ្រឿងញៀនសរុប មានប្រមាណ៨ពាន់ករណី ដែលត្រូវបានបង្ក្រាប ដោយឃាត់ខ្លួនជនពាក់ព័ន្ធបានជាង១,៦ម៉ឺននាក់ និងរឹបអូសគ្រឿងញៀនជាងកន្លះតោន៕