អន្តរជាតិ
ធនាគាររដ្ឋរបស់ថៃ ត្រៀមជួយកសិករ ដែលប្រឈមគ្រោះរាំងស្ងួត រូបភាព The Nation
× ធនាគារកសិកម្មរបស់រដ្ឋថៃ (BACC) នឹងដាក់ចេញវិធានការជួយរំលែកបន្ទុករបស់កសិករ ដោយអនុគ្រោះដល់ការបង់សងការប្រាក់ជាដំណាក់កាលរហូតដល់រយៈពេល៣ឆ្នាំ។ វិធានការនេះ ត្រូវបានត្រៀមដាក់ចេញដើម្បីរួមចំណែកដោះស្រាយក្នុងបញ្ហាគ្រោះរាំងស្ងួតឆ្នាំនេះ ដែលនឹងធ្វើឲ្យប៉ះពាល់សមត្ថភាពសងបំណុលរបស់កសិករ។ នេះបើតាមប្រធានធនាគារ BAAC លោក Apirom Sukprasert ដែលត្រូវបានស្រង់សំដីដោយការសែតបាងកកប៉ុស្ដិ៍ នៅថ្ងៃទី១៨ខែមីនា។
ទោះបីរដ្ឋាភិបាលក្នុងពេលថ្មីៗនេះ បានអនុគ្រោះព្យួរការបង់សងប្រាក់ដើមសម្រាប់រយៈពេល៣ឆ្នាំ តែកសិករនៅតែបង់ការប្រាក់។ ដូចនេះហើយធនាគារ BAAC កំពុងត្រៀមអនុគ្រោះការបង់ការប្រាក់ ដល់រយៈពេល៣ឆ្នាំ បើសិនភាពរាំងស្ងួតបំផ្លាញផលចំណូលរបស់ពួកគេ។
ឆ្នាំមុន គណៈរដ្ឋមន្ត្រីថៃបានអនុម័តវិធានការពីរដើម្បីជួយឧបត្ថម្ភកសិករ។ ទី១គឺការពន្យារការសងបំណុលរបស់អ្នកខ្ចីលុយធនាគារ BACC ចំនួន ៣,៨១លាននាក់ សម្រាប់រយៈពេល៣ឆ្នាំ ពីខែសីហាឆ្នាំ២០១៨ ដល់ខែកក្កដាឆ្នាំ២០២១។ កសិករត្រូវបានទាមទារឲ្យបង់ការប្រាក់ម្ដងក្នុងរយៈពេលមួយឆ្នាំ។ វិធានការទី២ រដ្ឋាភិបាលទម្លាក់អត្រាការប្រាក់សម្រាប់រយៈពេលមួយឆ្នាំទៅដល់កសិករខ្នាតតូច ចន្លោះខែសីហាឆ្នាំ២០១៨ ដល់ខែកក្កដាឆ្នាំ២០១៩ ដែលខ្ចីត្រឹម៣សែនបាត តែបើខ្ចីលើសនេះត្រូវបង់ការប្រាក់ធម្មតា។
រដ្ឋជួយឧបត្ថម្ភធន ២,៥ភាគរយនៃអត្រាកាប្រាក់ប្រចាំឆ្នាំរបស់កសិករ ខណៈធនាគារកសិកម្មរបស់រដ្ឋជួយ ០,៥ភាគរយក្នុងមួយឆ្នាំ។
ធនាគារ BAAC បានរាយការណ៍ថា កសិករខ្នាតតូចជំពាក់បំណុលស្ថាប័នខ្លួន ៦៥០ពាន់លានបាត ខណៈរដ្ឋាភិបាលប៉ាន់ស្មានថាកសិករខ្នាតតូច ១០លាននាក់នឹងមានសិទ្ធិទទួលបានអត្ថប្រយោជន៍ពីវិធានការថ្មីរបស់រដ្ឋាភិបាល។
មជ្ឈមណ្ឌលស្រាវជ្រាវ Kasikorn ក្នុងពេលកន្លងមកបានព្យាករថារដូវរាំងស្ងួតឆ្នាំនេះនឹងបង្កការខូចខាត ដែលគិតជាទឹកប្រាក់ប្រមាណ ១៥,៣ពាន់លានបាត ជាពិសេសប៉ះពាល់ការប្រមូលផលស្រូវប្រាំង៕
© រក្សាសិទ្ធិដោយ thmeythmey.com