រដ្ឋមន្ត្រីមហាផ្ទៃ ស្នើឲ្យសមត្ថកិច្ចនិងពលរដ្ឋ រួមគ្នាបង្ការអគ្គិភ័យ ដែលងាយឆាបឆេះនារដូវប្រាំង

ជាតិ

សង្គមជាតិ

រដ្ឋមន្ត្រីមហាផ្ទៃ ស្នើឲ្យសមត្ថកិច្ចនិងពលរដ្ឋ រួមគ្នាបង្ការអគ្គិភ័យ ដែលងាយឆាបឆេះនារដូវប្រាំង

20, Mar 2019 , 8:59 am

រូបភាព

ដោយ: ថ្មីៗ

សម្តេច ស ខេង រដ្ឋមន្ត្រីក្រសួងមហាផ្ទៃ បានអំពាវនាវអាជ្ញាធរនិងមន្ត្រីគ្រប់លំដាប់ថ្នាក់ រួមទាំងប្រជាពលរដ្ឋផងដែរ ឲ្យចូលរួមការពារនិងបង្ការគ្រោះអគ្គិភ័យក្នុងរដូវប្រាំងនេះ។

តាមរយៈសេចក្តីអំពាវនាវ ដែលធ្វើឡើងនៅថ្ងៃទី១៩មីនា សម្តេច ស ខេង ប្រាប់ឲ្យប្រជាពលរដ្ឋនិងគ្រប់ភាគីពាក់ព័ន្ធ បង្កើនការប្រុងប្រយ័ត្នគ្រប់ពេលវេលា ចំពោះដើមចម ដែលអាចបង្កើតឲ្យមានអគ្គិភ័យ ដូចជា ភ្លើងចង្ក្រាន ភ្លើងចង្កៀង ភ្លើងធូប-ទៀន ការដុតសំរាម ព្រៃ ចម្ការ វាលស្រែ ការបោះកន្ទុយបារីផ្តេសផ្តាស ការតភ្ជាប់ឬការប្រើចរន្តអគ្គិសនីមិនត្រឹមត្រូវតាមបច្ចេកទេស ការទុកដាក់ប្រេងឥន្ទនៈ ឧស្ម័នចំហេះ និង វត្ថុងាយឆេះ ជាដើម។

លើសពីនេះ រដ្ឋមន្ត្រីមហាផ្ទៃ បានប្រាប់អាជ្ញាធរមូលដ្ឋាន ឲ្យយកចិត្តទុកដាក់និងរៀបចំសណ្តាប់ធ្នាប់បណ្តាញអគ្គិសនី និងផ្លូវសាធារណៈនៅតំបន់ងាយរងគ្រោះ ដើម្បីបង្កលក្ខណៈងាយស្រួលដល់ការចុះអន្តរាគមន៍សង្គ្រោះ បានទាន់ពេលវេលា។

សម្តេច ស ខេង ក៏បានបញ្ជាទៅអង្គភាពបង្ការពន្លត់អគ្គិភ័យនៅតាមបណ្តារាជធានី-ខេត្ត និងតាមបណ្តាស្ថានីយ៍រថយន្តអគ្គិភ័យក្រុង-ស្រុក ឲ្យបន្តយកចិត្តទុកដាក់អប់រំប្រជាពលរដ្ឋអំពីវិធានការបង្ការអគ្គិភ័យ ព្រមទាំងពង្រឹងការងារប្រចាំការឲ្យបាន២៤ម៉ោងលើ២៤ម៉ោង ហើយត្រូវត្រៀមរថយន្តពន្លត់អគ្គិភ័យ ឧបករណ៍សម្ភារ ប្រេងឥន្ទនៈ ទឹកស្តុក និងប្រភពយកទឹកឲ្យគ្រប់គ្រាន់ ដើម្បីធានាដល់កិច្ចអន្តរាគមន៍ឆាប់រហ័ស និងមានប្រសិទ្ធភាព ក្នុងការពន្លត់អគ្គិភ័យ។

ការព្យាករ បានបង្ហាញថា អាកាសធាតុនៅកម្ពុជា នឹងឡើងកម្តៅលើស៤០អង្សា ចាប់ពីពេលនេះ រហូតដល់រយៈពេល២ខែទៅមុខទៀត ដែលធ្វើឲ្យអាកាសធាតុក្តៅ ស្ងួតហួតហែង ហើយងាយនឹងបណ្តាលឲ្យកើតគ្រោះអគ្គិភ័យ។

«១១៧ និង ៦៦៦» គឺជាលេខសម្រាប់ទាក់ទងទៅមន្ត្រីពន្លត់អគ្គិភ័យក្នុងរាជធានីភ្នំពេញ៕