ជាតិ
សេដ្ឋកិច្ច
លោក គង់ វិបុល៖ ក្រុមហ៊ុនខ្លះប្រកាសពន្ធប្រាប់ថាអត់ចំណេញ តែពេលឆែកទិន្នន័យចំណូលចង់ផ្ទុះគណនី
រូបពីហ្វេសប៊ុកអគ្គនាយកដ្ឋានពន្ធដារ៖ លោក គង់ វិបុល អគ្គនាយកនៃអគ្គនាយកដ្ឋានពន្ធដារ
×![]()
ភ្នំពេញ៖ បញ្ហាគេចវេះបង់ពន្ធ តាមរយៈការប្រកាសប្រាក់ចំណេញរបស់ក្រុមហ៊ុន ឬស្ថាប័ននានា នៅតែជាដើមចមបញ្ហា ក្នុងប្រទេសកម្ពុជា។ ក្រុមហ៊ុនខ្លះមកប្រកាសពន្ធតែងតែប្រាប់ថាអត់ចំណេញ ខណៈចំណូលពាសពេញគណនីធនាគារ។ 
លោក គង់ វិបុល អគ្គនាយកនៃអគ្គនាយកដ្ឋានពន្ធដារ បាននិយាយថា បញ្ហាបង់ពន្ធនៅកម្ពុជា វានៅតែកើតមាន ដោយសារតែក្រុមហ៊ុនខ្លះ មិនព្រមអនុវត្តការបង់ពន្ធតាមការកំណត់របស់រដ្ឋាភិបាល។ ក្នុងន័យនេះលោក គង់ វិបុល លើកយករឿងរ៉ាវជាក់ស្ដែងមកនិយាយថា មានក្រុមហ៊ុនខ្លះ តែងតែប្រកាសមិនចំណេញទេ រាល់ពេលប្រកាសបង់ពន្ធម្ដងៗ ប៉ុន្តែនៅពេលខាងសវនកម្មពន្ធដារចុះឆែកទិន្នន័យចំណូលក្រុមហ៊ុននោះ ឃើញថា ក្រុមហ៊ុនរកចំណូលបានច្រើនចង់ផ្ទុះគណនីធនាគារ។ បើតាមលោក គង់ វិបុល ការគេចវេះពីការបង់ពន្ធនេះ វាជាបញ្ហាសម្រាប់ក្រុមហ៊ុននោះទៅវិញទេ។
ថ្លែងនៅក្នុងសិក្ខាសាលាស្តីពីការទទួលស្គាល់ និងកាតព្វកិច្ចពន្ធមួយចំនួនរបស់ភ្នាក់ងារផ្គត់ផ្គង់ទំនិញ ឬ សេវាក្នុងនាមសហគ្រាសដើម និងកាតព្វកិច្ចពន្ធលើប្រាក់ចំណូលប្រចាំឆ្នាំ នៅព្រឹកថ្ងៃទី១៩ មីនា អគ្គនាយកនៃអគ្គនាយកដ្ឋានពន្ធដារ បាននិយាយថា៖«អ្នកខ្លះ ចាប់តាំងពីខ្ញុំចូលមក(តំណែងអគ្គនាយកពន្ធដារ) រហូតមកដល់ឥឡូវនេះ ឃើញថាប្រកាសខាតរហូត អត់ដែលចំណេញ។ ប៉ុន្តែពេលឆែកធនាគារមើល ចង់បាក់គណនី(Account)ធនាគារហើយ។ អត់ដែលចំណេញ! សួរថារកស៊ី៥ឆ្នាំហើយ បើមិនចំណេញ គួរតែរកស៊ីអ្វីផ្សេងវិញ»។
ដោយមិនអស់ចិត្ត លោក គង់ វិបុល បន្តនិយាយថា ម្ចាស់ក្រុមហ៊ុនដកយកប្រាក់មូលធនខ្លួន រហូតដល់ទៅ៥ដងចេញពីប្រាក់ចំណេញក៏មានដែរ បែរជាមកប្រកាសមិនចំណេញទៅវិញ។ លោក គង់ វិបុល ដែលបានដឹងរឿងរ៉ាវពីបញ្ហានេះ ប្រាប់ឲ្យម្ចាស់ក្រុមហ៊ុន និងសហគ្រាស អនុវត្តកាតព្វបង់ពន្ធជូនរដ្ឋឲ្យបានត្រឹមត្រូវ ដើម្បីទទួលបានផលប្រយោជន៍ទាំងអស់គ្នា។ បើតាមអគ្គនាយកដ្ឋានពន្ធដាររូបនេះ អត្រាបង់ពន្ធនៅកម្ពុជា នៅមានកម្រិតទាបជាងប្រទេសដទៃច្រើនណាស់ ដូច្នេះអ្នករកស៊ី វិនិយោគទាំងអស់ ត្រូវបំពេញកាតព្វបង់ពន្ធឲ្យបានខ្ជាប់ខ្ជួន។
«អ្នកខ្លះ មានការស្រមើស្រមៃសម្រាប់រដ្ឋ ធ្វើឲ្យសេវាសាធរណៈខ្ពស់ណាស់ ប៉ុន្តែអាចខ្ពស់ពីណាមក បើអត់មានអ្នកបង់ពន្ធ។ ចង់បាន High Way ល្អ ចំណូលពន្ធក៏វាត្រូវទៅតាមហ្នឹងដែរ ចង់បានសេវាសាធារណៈល្អ ចង់បានមន្ទីរពេទ្យល្អ ចំណូលក៏វាត្រូវទៅតាមហ្នឹងដែរ»។ នេះជាការបញ្ជាក់របស់លោក គង់ វិបុល។
ទាក់ទងនឹងការបង់ពន្ធនេះ ក្រសួងសេដ្ឋកិច្ច និងហិរញ្ញវត្ថុ ក៏បានរំឭកពីតួនាទីរបស់សវនកម្មពន្ធដារ ទៅដល់ម្ចាស់ក្រុមហ៊ុន និងអាជីវកម្មទាំងអស់ ពីកាតព្វកិច្ចបង់ពន្ធផងដែរ ដើម្បីបញ្ចៀសបញ្ហាប្រឈមក្នុងការរកស៊ីរបស់ពួកគេ។ សេចក្តីប្រកាសក្រសួងសេដ្ឋកិច្ច ចុះថ្ងៃទី១៣ មីនា បានបញ្ជាក់ជាថ្មីថា ការប្រកាសរបស់ក្រសួងនេះ ក្នុងគោលបំណងធ្វើឲ្យប្រសើរឡើងនូវនីតិវិធីនៃការធ្វើសវនកម្ម ដើម្បីធានានូវតម្លាភាពក្នុងការបង់ពន្ធ និងបង្កើនបរិយាកាសប្រកួតប្រជែង ដោយស្មើភាពក្នុងការប្រកបអាជីវកម្មនៅកម្ពុជា៕
Tag:
គង់ វិបុល
ពន្ធ
© រក្សាសិទ្ធិដោយ thmeythmey.com
