ជាតិ
ក្រសួងវប្បធម៌ នឹងហៅម្ចាស់ផលិតកម្មទាំងអស់ទៅធ្វើកិច្ចសន្យាបញ្ឈប់ការលួចចម្លងស្នាដៃ
រូបផ្ដល់ឱ្យ
×![]()
ដោយ: ប៉ូ សាគុន
ភ្នំពេញ៖ ក្រសួងវប្បធម៌ និងវិចិត្រសិល្បៈ នឹងកោះហៅគ្រប់ផលិតកម្ម និងបុគ្គលមួយចំនួន មកជួបជុំជាលក្ខណៈទ្រង់ទ្រាយធំ ដើម្បីអប់រំណែនាំ និងធ្វើកិច្ចសន្យាបញ្ឈប់ការលួចចម្លងស្នាដៃ ។ ករណីនេះធ្វើឡើងក្រោយពីផលិតកម្ម និងបុគ្គលមួយចំនួន រឹតតែបង្ហាញការមិនឱ្យតម្លៃដល់ស្នាដៃដើម តាមរយៈការយកទៅកាឡៃក្នុងអត្ថន័យផ្សេងៗគ្នា។ 
លោក សុឹម សត្តា ប្រធាននាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល បាននិយាយថា ការលួចចម្លងស្នាដៃរបស់អ្នកនិពន្ធមានច្រើនករណីណាស់មកហើយ ដោយបន្តយ៉ាងគឃ្លើន និងគ្មានការអៀនខ្មាស។ ដោយសារករណីលួចចម្លងស្នាដៃនេះ ចេះតែបន្តកើតឡើងមិនឈប់ ទើបបានជាក្រសួងវប្បធម៌និងវិចិត្រសិល្បៈ គ្រោងហៅគ្រប់ផលិតកម្ម និងបុគ្គលមួយចំនួនដែលពាក់ព័ន្ធករណីនេះ មកអប់រំណែនាំ រួមទាំងធ្វើកិច្ចសន្យាបញ្ឈប់រាល់ការចម្លងស្នាដៃដោយគ្មានការអនុញ្ញាត។
ប្រធាននាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែលរូបនេះ បានបន្ថែមថា កន្លងមកក្រសួងសាមីធ្លាប់បានអប់រំណែនាំករណីលួចចម្លងស្នាដៃនេះ តែមិនមានការយកចិត្តទុកដាក់អនុវត្តនោះឡើយ ហើយលើកនេះនឹងអប់រំជាទ្រង់ទ្រាយធំ ដោយនឹងធ្វើកិច្ចសន្យាបញ្ឈប់ការលួចចម្លងស្នាដៃផងដែរ។
ថ្លែងប្រាប់សារព័ត៌មាន ThmeyThmey លោក សុឹម សត្តា បានបញ្ជាក់យ៉ាងដូច្នេះថា៖«មិនមែនមកពីប្រពន្ធលោកគង្គ ប៊ុនឈឿន ដែលទើបមកប្ដឹងក្រសួងទេ តែក្រសួងបានធ្វើរឿង(ដោះស្រាយបញ្ហាលួចស្នាដៃ)នេះជារឿយៗយូរឆ្នាំហើយ តែ(ខាងផលិតកម្ម)នៅតែព្រងើយកន្តើយ ប្រៀបបាននឹងការវែកចក។ គាត់បានយកស្នាដៃដែលគ្រប់គ្រងដោយក្រសួង និងគ្រប់គ្រងដោយម្ចាស់កម្មសិទ្ធិ គាត់យកទៅប្រើប្រាស់ក្នុងន័យអាជីវកម្ម ដោយគ្មានការអនុញ្ញាត។ យើងអាចនិយាយបានថាការប្រើប្រាស់នេះ ទៅជាអនាធិបតេយ្យ។ ខាងយើងកំពុងស្នើសុំគោលការដើម្បីហៅផលិតកម្ម និងបុគ្គលមួយចំនួនមកអប់រំ។ នេះអាចនិយាយបានថាជាលក្ខណៈទ្រង់ទ្រាយធំ។ ដល់ពេលនោះយើងនឹងធ្វើសេចក្ដីជូនដំណឹងដល់អ្នកសារព័ត៌មាន ដើម្បីមកយកព័ត៌មាន»។
ស្នាដៃដែលមិនបានផ្ទេរបណ្ដាំមរតកសាស្ត្រ ឬរាល់ស្នាដៃដែលមិនទាន់បានចុះបញ្ជីម្ចាស់កម្មសិទ្ធ គឺស្ថិតនៅក្រោមការគ្រប់គ្រងរបស់ក្រសួង។ ដូច្នេះបើទោះបីជាស្នាដៃ ដែលមានកម្មសិទ្ធិបញ្ញា ឬមិនទាន់មានកម្មសិទ្ធបញ្ញាក្ដី ក៏មិនអាចអនុញ្ញាតឲ្យផលិតកម្ម ឬបុគ្គលណាមួយយកទៅកាឡៃដោយគ្មានសុំច្បាប់ត្រឹមត្រូវ ក្នុងន័យធ្វើអាជីវកម្មនឹងត្រូវមានទោស។ នេះបើតាមលោក សុឹម សត្តា។
យោងតាមមាត្រានៃសិទ្ធិអ្នកនិពន្ធនិងសិទ្ធិប្រហាក់ប្រហែល ស្ដីពីការរំលោភកម្មសិទ្ធិបញ្ញា រាល់បទល្មើសដែលផលិតឡើងវិញ សម្ដែងឡើយវិញ ផលិតបន្ត ឬយកទៅធ្វើអ្វីផ្សេង ដោយមិនមានការអនុញ្ញាតពីអ្នកនិពន្ធ ឬក្រសួងសាមី ត្រូវបង់ពិន័យជាប្រាក់ពី៥លានរៀល ទៅ ២៥លានរៀល ឬជាប់ពន្ធធនាគារពី៦ខែ ទៅ ១២ខែ។ ក្នុងករណីមិនរាងចាលនឹងផ្ដន្ទាទោសទ្វេដង៕
Tag:
ចម្រៀង
សិល្បៈ
ក្រសួងវប្បធម៌
ផលិតកម្ម
កិច្ចសន្យា
អប់រំ
© រក្សាសិទ្ធិដោយ thmeythmey.com
