អន្តរជាតិ
លោក មហាធៀ ប្រាប់ម្ចាស់ក្រុមហ៊ុនថា បើចំណេញច្រើន គួរដំឡើងប្រាក់ខែដល់បុគ្គលិក
× ការអភិវឌ្ឍរបស់ប្រទេសមួយ ពុំអាចកំណត់បានឡើយ ត្រឹមតែមើលទៅលើផលិតផលក្នុងស្រុកសរុប (GDP) របស់ប្រទេសនោះ ប៉ុន្តែក៏ត្រូវមើលទៅលើកម្រិតជីវភាពរបស់ប្រជាពលរដ្ឋផងដែរ។ នេះបើតាមការបញ្ជាក់របស់លោកនាយករដ្ឋមន្ត្រីម៉ាឡេស៊ី មហាធៀ មហាម៉ាត់ ដោយសង្កត់ធ្ងន់ថា ម្ចាស់ក្រុមហ៊ុនគួរយកចិត្តទុកដាក់លើបុគ្គលិកខ្លួនពាក់ព័ន្ធនឹងប្រាក់បៀរវត្សរ៍ ប្រសិនបើពួកគេរកប្រាក់ចំណេញបានច្រើននោះ។
ថ្លែងនៅក្នុងវេទិកាប្រចាំឆ្នាំមួយឈ្មោះថា «វិនិយោគម៉ាឡេស៊ី ២០១៩» នៅថ្ងៃទី១៩ ខែមីនា លោក មហាធៀ មហាម៉ាត់ និយាយថា វាមិនយុត្តិធម៌ឡើយ ប្រសិនបើប្រាក់ខែរបស់ថ្នាក់ដឹកនាំកំពូលៗរបស់ក្រុមហ៊ុនបន្តកើនឡើងជាលំដាប់ ខណៈប្រាក់ខែរបស់បុគ្គលិកធម្មតានៅនឹងថ្កល់ ឬកើនឡើងក្នុងបរិមាណតិចតួចបំផុត។
នៅចំពោះមុខម្ចាស់ក្រុមហ៊ុន និងប្រធានចាត់ការហិរញ្ញវត្ថុទាំងក្នុងស្រុក និងបរទេសប្រមាណជាង២ពាន់នាក់ នាយករដ្ឋមន្ត្រីវ័យ៩៣ឆ្នាំរូបនេះ បានគូសបញ្ជាក់ថា លោកមិនចង់ឃើញ វិសមភាពក្នុងសង្គមម៉ាឡេស៊ី ដែលម្ចាស់ក្រុមហ៊ុនទទួលបានផលចំណេញច្រើនពីប្រាក់ចំណូលជាតិ ហើយបន្សល់ចំណែកតិចតួចបំផុតដល់បុគ្គលិកដែលធ្វើការឲ្យពួកគេ។
បើតាមការចុះផ្សាយរបស់សារព័ត៌មាន The Star មេដឹកនាំចាស់វស្សារូបនេះ និយាយថា៖«ខ្ញុំស្នើឲ្យម្ចាស់ក្រុមហ៊ុនទាំងអស់ចងចាំសម្តីនេះនៅក្នុងចិត្ត។ ផ្តល់ប្រាក់ខែឲ្យបានសមរម្យដល់បុគ្គលិករបស់អ្នក ប្រសិនបើអ្នករកចំណូលបានច្រើននោះ»។ ត្រង់ចំណុចនេះ លោកកត់សម្គាល់ថា ប្រាក់ខែរបស់នាយកប្រតិបត្តិកើនឡើងជាបន្តបន្ទាប់ ប៉ុន្តែសម្រាប់បុគ្គលិកវិញឡើងយឺតៗ ទោះជាក្រុមហ៊ុនមានភាពជឿនលឿនក៏ដោយក្តី។
ទន្ទឺមនឹងគ្នានេះ លោកមហាធៀ ក៏បង្ហាញក្តីកង្វល់ជុំវិញកំណើននៃគម្លាតប្រាក់ចំណូលរបស់ពលរដ្ឋ ដោយអះអាងថា ប្រសិនបើបញ្ហានេះពុំត្រូវបានត្រួតពិនិត្យ និងដោះស្រាយនោះទេ វាអាចបង្កជាភាពតានតឹងនិងអរិភាពក្នុងសង្គម ហើយចុងក្រោយអាចឈានដល់ការប្រឈមមុខដាក់គ្នាក្នុងចំណោមប្រជាជនម៉ាឡេស៊ីតែម្តង។ ក្នុងន័យនេះ លោកបកស្រាយថា៖«យើងមិនអាចមានមនុស្សមួយក្រុមទទួលជោគជ័យ និងគ្រប់គ្រងផ្តាច់មុខលើអ្វីៗទាំងអស់ ខណៈអ្នកដទៃទៀតដើរយឺតៗនៅពីក្រោយនោះទេ។ គម្លាតរវាងមនុស្សទាំងពីរក្រុមនេះ ត្រូវតែបង្រួមឲ្យតូចបំផុត»។
យ៉ាងណាមិញ ក្នុងវេទិកាខាងលើដដែលនេះ លោកនាយករដ្ឋមន្ត្រី មហាធៀ និយាយទៀតថា យុវជនម៉ាឡេស៊ី ត្រូវតែដឹងឲ្យច្បាស់ថា ប្រសិនបើពួកគេចង់បានប្រាក់ខែខ្ពស់ ពួកគេចាំបាច់ត្រូវតែមានភាពសកម្មក្នុងការងារ និងទទួលបានលទ្ធផលការងារល្អ។ ដើម្បីសម្រេចជោគជ័យក្នុងរឿងនេះ យុវជនត្រូវមានចំណេះដឹងជ្រៅជ្រះ និងការហ្វឹកហាត់ខ្ពស់ ហើយជាពិសេសពួកគេមិនត្រូវខ្ចិលច្រអូសនោះទេ៕
© រក្សាសិទ្ធិដោយ thmeythmey.com