ជាតិ
ក្រុមអង្គការ-សង្គស៊ីវិល រួមគ្នាធ្វើវេទិកា ដើម្បីបង្ហាញបញ្ហាប្រឈម
× អង្គការសង្គមស៊ីវិលបានរៀបចំវេទិកាអង្គការសង្គមស៊ីវិលនៅពីថ្ងៃទី១៩មីនា ឆ្នាំ២០១៩ ហើយវេទិកានេះ នឹងអាចក្លាយជាវេទិកាប្រចាំឆ្នាំមួយសម្រាប់អង្គការសង្គមស៊ីវិល ដើម្បីចែករំលែករឿងរ៉ាវជោគជ័យ និងបញ្ហាប្រឈម ក្នុងការរកវិធីសាស្ត្រដោះស្រាយ និងយុទ្ធសាស្ត្រនានាដែលអង្គារសង្គមស៊ីវិលគួរទទួលបាននៅឆ្នាំបន្ទាប់។ ក្នុងវេទិកានេះ មានអង្គការសង្គមស៊ីវិល សមាគមន៍ មន្ត្រីរដ្ឋាភិបាលជាង៣០០នាក់បានចូលរួម ហើយបានលើកពីបញ្ហាប្រឈម និងបញ្ហាផ្សេងៗទៀតមកពិភាក្សា។ បញ្ហាប្រឈមដែលលើកឡើងមាន បញ្ហាច្បាប់ សេរីភាពបញ្ចេញមតិ សេរីភាពធ្វើសម្មភាព និងមន្ត្រីមូលដ្ឋានអនុវត្តខុស ពីមន្ត្រីថ្នាក់ជាតិដែលបានចេញសេចក្ដីសម្រេច។
ការពិភាក្សាក្នុងវេទិកាអង្គសង្គមស៊ីវិល លោក សឿង សារឿន នាយកប្រតិបត្តិអង្គការ Cooperation Committee for Cambodia (CCC) បានបញ្ជាក់ថា ការរៀបចំវេទិកានេះ គឺដើម្បីឲ្យអង្គការសង្គមស៊ីវិលមួយធ្វើការប្រកបដោយគុណភាព ចូលរួមអភិវឌ្ឍកម្ពុជា និងដើម្បីពិនិត្យការអនុវត្តកន្លងមក និងផែនការសម្រាប់ឆ្នាំបន្តទៀត។ ហើយការធ្វើបែបនេះអាចធ្វើឲ្យអង្គការសង្គមស៊ីវិលនិងរដ្ឋាភិបាលមានភាពជឿទុកចិត្តគ្នាជាមួយវិស័យឯកជន និងដៃគូអភិវឌ្ឃន៍ ដើម្បីឲ្យមានកម្លាំងជាចលកររួមមួយជាថ្នាក់ជាតិក្នុងការអភិវឌ្ឍប្រទេស។
លោក វ៉ន ពៅ នាយកប្រតិបត្តិ IDEA-ផ្ទះសាមគ្គី និងជាវាគ្មិនក្នុងកិច្ចភាក្សាអំពីបញ្ហាប្រឈមសំខាន់របស់សង្គមស៊ីវិលបានលើឡើងថា មាត្រានៃច្បាប់ខ្លះជួយគាំពារអង្គការសង្គស៊ីវិល សមាគម ប៉ុន្តែចំណុចមួយចំនួនទៀតបានរឹតត្បិតសិទ្ធិសេរីភាពក្នុងការធ្វើសកម្មភាព របស់អង្គការសង្គមស៊ីវិល និងសមាគមន៍។ លោក គិតថានេះជាការជ្រៀតជ្រែតកិច្ចការរបស់សមាគ និងអង្គការសង្គមស៊ីវិល។ ចំពោះមន្រី្តថ្នាក់មូលដ្ឋានមិនអនុវត្តច្បាប់ ជាក់ស្ដែងលោកលើកឡើងថា ក្រសួងមហាផ្ទៃបានចេញលិខិតមិនឲ្យបំពានសមាគម អង្គការសង្គមស៊ីវិល តែជាក់ស្ដែងការចុះទៅបង្រៀន ការប្រជុំ តាមខេត្តមានចំនួនលើសពី៥នាក់ឡើងទៅ មានការសួររកលិខិតអនុញ្ញាត មានការហាមឃាត់មិនអនុញ្ញាត។
ដោយឡែក ការបញ្ចេញមតិក្នុងបណ្ដាញសង្គមផ្សព្វផ្សាយវិញ លោក វ៉ន ពៅ បានលើកឧទាហរណ៍ថា នៅខេត្តព្រះសីហនុ ការលើកពីភាពអវិជ្ជមានរបស់អាជ្ញាធរ ជុំវិញរឿងជនជាតិចិន តែបែរជាត្រូវអាជ្ញាធរហៅព្រមាន មុនសរសេរត្រូវមានការអនុញ្ញាតជាមុនសិន។ លោក វ៉ន ពៅ បញ្ចាក់ទៀតថា កាលពីពេលថ្មីៗទិវាសិទិ្ធមនុស្ស១០ធ្នូនិងទិវាសិទ្ធិនារីអន្តរជាតិ៨មីនា ត្រូវបានរារាំង។ ក្នុងបញ្ហាដែលបានស្នើសុំឲ្យដោះស្រាយ មិនមានការយកចិត្តទុកដាក់ និងដោះស្រាយឡើយ។ លោក មិនចង់ឃើញមន្ត្រីថ្នាក់ជាតិធ្វើផ្សេង មន្ត្រីថ្នាក់មូលដ្ឋានអនុវត្តផ្សេងៗនោះទេ។ លោកចង់ឲ្យមានការ សហការរួមរវាងអង្គការសង្គស៊ីវិល និងរាដ្ឋាភិបាល ទាំងថ្នាក់មូលដ្ឋាន និងថ្នាក់ជាតិ ក្នុងការដោះស្រាយបញ្ហាសំខាន់ៗរបស់សង្គមប្រជាពលរដ្ឋខ្មែរ។ ទន្ទឹមនឹងនេះ លោក ស្នើឲ្យមានការបើកទូលាយក្នុងការបញ្ចេញមតិនៅតាមសារព័ត៌មានឯករាជ និងការទទួលបានព័ត៌មានផងដែរ។
លោក ជា សុភ័ក្រ អ្នកពង្រឹងសម្ថភាពសហគមន៍ ក្នុងវេទិកាពិភាក្សាបញ្ហាប្រឈមរបស់អង្គការសង្គមស៊ីវិលក៏បានលើឡើងថា បញ្ហាប្រឈមតាម សហគមន៍គឺ បញ្ហា្ងកង្វះទឹក ទំនាស់ដី កសិកម្ម សហគមន៍ដែលចុះបញ្ជីនិងមិនបានចុះបញ្ចី មានការហាមឃាត់មិនឲ្យសហគមន៍ចូលរួមក្នុងការដោះស្រាយបញ្ហា។ ក្នុងករណីតាមសហគមន៍ណាដែលមានសមាជិតភាគនៅបក្សនយោបាយមិនមែនរដ្ឋាភិបាលគឺរឹតតែមានបញ្ហប្រឈមកាន់តែខ្លាំង។ លោក បានស្នើសុំឲ្យរដ្ឋាភិបាលមានការ ពិនិត្យឡើងវិញនូវបញ្ហា ផែនការភូមិឃុំសុវត្ថិភាព នឹងមានការស្ដារឡើងវិញ។ ចុងក្រោយសុំឲ្យមានការបើកសិទ្ធិសេរីភាពឲ្យសហមន៍ អង្គការសង្គមស៊ីវិលមានសិទ្ធិសេរីភាពក្នុងការធ្វើការតាមឆន្ទៈរបស់ខ្លួន។
ក្នុងវេទិកាពិភាក្សាបញ្ហាប្រឈមរបស់អង្គការសង្គមស៊ីវិល លោក ណុប វី នាយកប្រតិបតិ្តនៃប្រព័ន្ធផ្សព្វផ្សាយ CCIM បានលើកឡើងថា ប្រព័ន្ធផ្សព្វផ្សាយកម្ពុជាបានបាត់បង់មួយផ្នែកធំ ដែលជាស្ថានប័នមានការជឿទុកចិត្តនិងការគ្រាំទ្រច្រើនពីប្រជាពលរដ្ឋ ដូចជា ការបិទការសែត ការផ្លាស់ប្ដូរអ្នកគ្រប់គ្រង និងការបិទវិទ្យុ។ បញ្ហានេះបានធ្វើឲ្យអង្គការសង្គមស៊ីវិល និងរដ្ឋាភិបាលមានគម្លាតពីគ្នា។ ជាដំណោះស្រាយ គឺត្រូវធ្វើឲ្យមាន ឬអនុញ្ញាតឲ្យមានឡើងវិញនូវប្រព័ន្ធផ្សព្វផ្សាយទាំងអស់នោះ។ ការធ្វើបែបនេះ ជាការរួមចំណែកជួយប្រជាពលរដ្ឋ និងលើកកម្ពស់ប្រព័ន្ធផ្សព្វផ្សាយនៅកម្ពុជា។ លោកសុំឲ្យមានការយកចិត្តទុកដាក់ឲ្យបានខ្ពស់លើបញ្ហប្រឈមនេះ៕
Tag:
អង្គការសង្គមស៊ីវិល
ភ្នំពេញ
© រក្សាសិទ្ធិដោយ thmeythmey.com