អន្តរជាតិ
លោក ត្រាំ ថា ដល់ពេលអាមេរិកទទួលស្គាល់ «ខ្ពង់រាបហ្គោឡង់» ជារបស់អុីស្រាអែល
នាយករដ្ឋមន្រ្តីអ៊ីស្រាអែល បេនចាមីន ណេតាន់យ៉ាហ៊ូ (កណ្ដាល), សមាជិកព្រឹទ្ធសភាអាមេរិក Lindsey Graham (ឆ្វេង) និងអគ្គរដ្ឋទូតអាមេរិកប្រចាំអ៊ីស្រាអែល (ស្ដាំ) ឈរនៅខ្ពង់រាបហ្គោឡង់។ (រូបភាព AFP)
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ នៅថ្ងៃទី២១ ខែមីនា និយាយថា អាមេរិកគួរទទួលស្គាល់អធិបតេយ្យរបស់អ៊ីស្រាអែលលើខ្ពង់រាបហ្គោឡង់ដែលអ៊ីស្រាអែលគ្រប់គ្រងខុសច្បាប់ក្រោយសង្គ្រាមឆ្នាំ១៩៦៧ ។ លោក ត្រាំ ចាត់ទុកខ្ពង់រាបនេះជាតំបន់យុទ្ធសាស្ត្រសំខាន់សម្រាប់អ៊ីស្រាអែល និងស្ថិរភាពតំបន់។ ប៉ុន្តែការទទួលស្គាល់នេះ ទំនងជាដុតបញ្ឆេះភាពតានតឹងនៅមជ្ឈិមបូព៌ា ដ្បិតអន្តរជាតិមិនដែលទទួលស្គាល់ការគ្រប់គ្រងរបស់អ៊ីស្រាអែលឡើយ។
ក្រោយពេល៥២ឆ្នាំ វាដល់ពេលដែលអាមេរិកត្រូវទទួលស្គាល់ពេញលេញនូវអធិបតេយ្យរបស់អ៊ីស្រាអែលលើខ្ពង់រាបហ្គោឡង់។ នេះជាការប្រកាសរបស់ប្រធានាធិបតីអាមេរិក ដូណាល់ ត្រាំ តាមបណ្ដាញសង្គម Twitter នៅថ្ងៃទី២១ ខែមីនា។ ការប្រកាសបែបនេះ អាចជាកាដូដ៏ធំមួយសម្រាប់នាយករដ្ឋមន្ត្រី បេនចាមីន ណេតាន់យ៉ាហ៊ូ ដែលត្រៀមប្រជែងក្នុងការបោះឆ្នោត តែវាក៏អាចបង្កបញ្ហាដល់តំបន់ដែលមានតានតឹងមិនចេះចប់នេះដែរ។
អ៊ីស្រាអែលល ដណ្ដើមគ្រប់គ្រងខ្ពង់រាបហ្គោឡង់ តំបន់ត្រើយខាងលិច ជ្រោយហ្កាសា និងទីក្រុងហ្ស៊េរុយសាឡិមខាងកើតក្នុងសង្គ្រាម៦ថ្ងៃក្នុងឆ្នាំ១៩៦៧ ជាមួយប្រទេសមជ្ឈិមបូព៌ាមានស៊ីរី ហ្ស៊កដានី និងអេហ្ស៊ីបជាដើម។ ប៉ុន្តែការប្រកាសកម្មសិទ្ធិលើខ្ពង់រាបរបស់ស៊ីរី និងទីក្រុងហ្ស៊េរុយសាឡិមខាងកើត មិនត្រូវបានអន្តរជាតិទទួលស្គាល់ឡើយ។ សព្វថ្ងៃនេះ ប្រជាជនអ៊ីស្រាអែលប្រមាណពីរម៉ឺននាក់កំពុងរស់នៅលើទឹកដីដែលកាន់កាប់ដោយខុសច្បាប់នេះ។
ការប្រកាសរបស់លោក ត្រាំ ទទួលបានការសាទរខ្លាំងពីលោក ណេតាន់យ៉ាហ៊ូ ដែលរំពឹងថា ទទួលបានប្រយោជន៍ខ្លាំងពីការផ្លាស់ប្ដូរជំហររបស់អាមេរិក។ តាមរយៈ Twitter របស់ខ្លួន នាយករដ្ឋមន្ត្រីរូបនេះបានអរគុណប្រធានាធិបតី ត្រាំ ដែលសម្រេចចិត្តចំពេលដែលអ៊ីរ៉ង់ចង់ប្រើប្រាស់ទឹកដីស៊ីរីដើម្បីបំផ្លាញអ៊ីស្រាអែល។ ចំណែកសមាជិកព្រឹទ្ធសភាអាមេរិកក៏មានឥទ្ធិពល Lindsey Graham ក៏សាទរការសម្រេចចិត្តនេះដែរ។
ការទទួលស្គាល់ខ្ពង់រាបហ្គោឡង់ដែលោក ត្រាំ ចាត់ទុកជាទីតាំងយុទ្ធសាស្ត្រសំខាន់បំផុតសម្រាប់អ៊ីស្រាអែល និងមជ្ឈិមបូព៌ា ប្រៀបដូចជាដុតបញ្ឆេះភាពតានតឹងដូច្នោះដែរ។ វាក៏មិនខុសពីចាក់សាំងលើភ្លើងដូចដែលអាមេរិកធ្លាប់ធ្វើកាលពីការទទួលស្គាល់ទីក្រុងហ្ស៊េរុយសាឡិមទាំងមូលជាកម្មសិទ្ធិរបស់អ៊ីស្រែលដូច្នោះដែរ។ អតីតរដ្ឋមន្ត្រីការពារជាតិអាមេរិក Leon Panetta និយាយថា អាមេរិកបោះចោលផ្នែកសំខាន់មួយទៀតនៃដំណើរការសន្តិភាពនៅមជ្ឈិមបូព៌ា។
លើសពីនេះ ការប្រកាសរបស់លោក ត្រាំ តាម Twitter បែបនេះ ធ្វើឡើងមុនសេតវិមានបញ្ចេញផែនការសន្តិភាពដើម្បីដោះស្រាយវិបត្តិប៉ាឡេស្ទីន-អ៊ីស្រាអែល។ មេដឹកនាំប៉ាឡេស្ទីនមិនរំពឹងថា ផែនការថ្មីដែលពន្យារពេលនេះ នឹងស្វែងរកច្រកចេញបានឡើយ តែផែនការថ្មីនោះនឹងផ្ដល់ប្រយោជន៍ឲ្យអ៊ីស្រាអែលទៅវិញទេ៕
Tag:
អាមេរិក
អ៊ីស្រាអែល
ដូណាល់ ត្រាំ
© រក្សាសិទ្ធិដោយ thmeythmey.com
