ជាតិ
សង្គមជាតិ
កម្មវិធី«ប្រកួតប្រជែងពានយុវជនឆ្នើមបរិស្ថានអាស៊ាន» ជំរុញឲ្យយុវជនស្រឡាញ់បរិស្ថាន
× ភ្នំពេញ៖ ក្រសួងបរិស្ថាន បានប្រកាសឲ្យយុវជនចាប់ពីអាយុ១៨ ដល់៣៥ឆ្នាំ ដែលចង់ចូលរួមក្នុងការ«ប្រកួតប្រជែងពានរង្វាន់យុវជនឆ្នើមបរិស្ថានអាស៊ាន» ទៅដាក់ពាក្យឲ្យបានមុនថ្ងៃទី៣១ ខែមិថុនា។ យុវជនដែលចូលរួមការប្រកួតប្រជែងនេះ នឹងអាចអនុវត្តផ្ទាល់លើកិច្ចការគាំពារបរិស្ថាន ការពារធនធានធម្មជាតិ ជីវៈចម្រុះ និងការស្រាវជ្រាវរកគំហើញវិទ្យាសាស្ត្រ។
កម្មវិធីប្រកួតប្រជែង ពានរង្វាន់យុវជនឆ្នើមបរិស្ថានអាស៊ាន គឺជាសកម្មភាពអប់រំបែបបរិស្ថានអាស៊ាន និងដើម្បីជាឱកាសបញ្ជ្រាបដល់សមាជិកក្នុងអាស៊ាន ក្នុងការថែទាំបរិស្ថានឲ្យបានស្អាតល្អ និងមានសម្រស់ពណ៌បៃតង។ កម្មវិធីនេះ នឹងប្រព្រឹត្តឡើងនៅខែកញ្ញា និងតុលា។ សម្រាប់ជ័យលាភី នឹងទទួលបានឱកាសក្លាយជាយុវជនគំរូនៅក្នុងប្រទេសអាស៊ាន ដែលចូលរួមផ្សព្វផ្សាយពីគំនិតថ្មីៗ សម្រាប់ការពារបរិស្ថានស្អាត និងបៃតង។
តាមរយៈកម្មវិធីនេះ នៅប្រទេសព្រុយណេ និងសិង្ហបុរី បានបង្ហាញពីលទ្ធផលជោគជ័យ និងប្រកបដោយប្រសិទ្ធភាពក្នុងការការពារបរិស្ថាន។ ក្រុមផែនការសកម្មភាពអប់រំបរិស្ថានអាស៊ាន (AWGEE) បានសហការជាមួយក្រសួងបរិស្ថាន សម្រាប់ឲ្យកម្ពុជាក្លាយជាម្ចាស់ផ្ទះ នៃការ បង្កើតកម្មវិធីនេះ។ ចំពោះពានរង្វាន់យុវជនឆ្នើមបរិស្ថានអាស៊ាន នឹងប្រគល់ជូនជ័យលាភី២រូប ដែលមកពីប្រទេសសមាជិកក្នុងអាស៊ាន ដែលបានអនុវត្តនៃគំនិតដ៏ជោគជ័យ លើកិច្ចការងារការគាំពារបរិស្ថានយ៉ាងហោចណាស់រយៈពេល៥ឆ្នាំ។
សម្រាប់បេក្ខជនដែលមានបំណងចូលរួម ត្រូវតែជាអ្នកមានឆន្ទៈក្នុងការគ្រប់គ្រង និងកាត់បន្ថយកាកសំណល់ ការប្រែប្រួលអាកាសធាតុ ប្រសិទ្ធផលថាមពល អនាម័យ ការសន្សំសំចៃទឹក និងការអភិរក្សជីវចម្រុះពិតប្រាកដ។ ក្រសួងបរិស្ថានចង់ឲ្យ សាធារណជន ចូលរួមកម្មវិធីនេះ ដើម្បីរួមគ្នាការពារបរិស្ថាន៕
Tag:
រង្វាន់
យុវជន
អាស៊ាន
បរិស្ថាន
© រក្សាសិទ្ធិដោយ thmeythmey.com