ជាតិ
សង្គមជាតិ
បញ្ជូនជនបង្កទៅតុលាការ ក្រោយចាក់សាំងដុតកុមារម្នាក់ឲ្យឆេះរលាកមួយចំហៀងខ្លួន ក្រុមការងាររដ្ឋបាលសាលាខេត្តសៀមរាបទៅសួរសុខទុក្ខជនរងគ្រោះនៅមន្ទីរពេទ្យ (រូបភាព៖រដ្ឋបាលខេត្តសៀមរាប)
× ភ្នំពេញ៖ សមត្ថកិច្ចស្រុកពួកបានបញ្ជូនខ្លួនជនបង្ក ដែលបានចាក់សាំងដុតកុមារអាយុ៩ឆ្នាំម្នាក់ ឲ្យឆេះរលាកមួយចំហៀងខ្លួន ទៅតុលាការហើយ ដើម្បីចាត់ការតាមផ្លូវច្បាប់។ នេះបើតាមលោក ទេព ពុំសែន អធិការស្រុកពួក ដែលបានប្រាប់សារព័ត៌មានថ្មីៗតាមទូរសព្ទ។
បើតាមលោកអធិការ ទេព ពុំសែន ជនបង្កបានសារភាពថា ដោយសារតែក្មេងនោះ បានលួចប្រាក់២ម៉ឺនរៀល ហើយរូបគេបានយកសាំងមកចាក់គំរាមដុត ប៉ុន្តែបានបង្កជាហេតុឲ្យឆេះខ្លួនកុមាររងគ្រោះតែម្ដង។
សូមបញ្ជាក់ថា ករណីនេះ បានកើតឡើងកាលពីថ្ងៃទី២២ ខែមីនា នៅភូមិកោកក្នាំង ឃុំរើល ស្រុកពួក ខេត្តសៀមរាប បន្ទាប់ពីកុមាររូបនេះ បានលួចប្រាក់២ម៉ឺនរៀលរបស់ជនបង្ក ដែលត្រូវជាម្តាយមីង និងរស់នៅក្នុងភូមិជាមួយគ្នា។ បច្ចុប្បន្ន កំពុងសម្រាកព្យាបាល នៅមន្ទីពេទ្យជ័យវរ្ម័នទី៧ ក្នុងខេត្តសៀមរាប ក្រោយពីសង្គ្រោះជីវិតរួច៕
© រក្សាសិទ្ធិដោយ thmeythmey.com