ជាតិ
ស្ថានទូតជប៉ុនបង្ហាញពិធីលៀងតែបែបប្រពៃណីដល់និស្សិតកម្ពុជា
× ភ្នំពេញ៖ ស្ថានទូតជប៉ុនបានរៀបចំពិធីលៀងតែ តាមបែបប្រពៃណីប្រជាជនខ្លួន បង្ហាញដល់និស្សិតកម្ពុជាដែលរៀនភាសាជប៉ុន។ ពិធីនេះធ្វើឡើងក្នុងគោលបំណង ផ្សព្វផ្សាយពីប្រពៃណីឆុងតែរបស់ជប៉ុន ដល់និស្សិតកម្ពុជាឱ្យបានសិក្សាស្វែងយល់។ ពិធីលៀងតែធ្វើនៅស្ថានទូតជប៉ុន នាព្រឹកថ្ងៃទី២២ខែមីនាឆ្នាំ២០១៩។
និស្សិតដែលបានទៅចូលរួមក្នុងពិធីលៀងតែកាលពីព្រឹកមិញនេះ បានភ្លក់រស់ជាតិតែ និងសាកល្បងឆុងតែដោយខ្លួនឯហងតាមប្រពៃណីជប៉ុនផងដែរ។
អ្នកស្រី Sabine Horinouchi ភរិយាលោកឯកអគ្គរាជទូតជប៉ុនប្រចាំកម្ពុជា បានមានប្រសាសន៍ថា ការរៀបចំពិធីលៀងតែ ធ្វើឡើងក្នុងគោលបំណង ចង់ឱ្យនិស្សិតកម្ពុជា បានស្វែងយល់ពីប្រពៃណីឆុងតែ និងសិល្បៈនៃការឆុងតែរបស់ប្រជាជនជប៉ុន។
អ្នកស្រី Sabine Horinouchi ភរិយាលោកឯកអគ្គរាជទូតជប៉ុនប្រចាំកម្ពុជា
លោកស្រីបន្ថែមថា ពិធីលៀងតែជប៉ុន រងឥទ្ធិពលពីប្រទេសចិននៅក្នុងសតវត្សរ៍៧ ហើយបានបាត់បង់ទៅវិញ។ រហូតដល់សតវត្សវ៍ទី១៥ ចិនបាននាំចូលមកម្ដងទៀត។ ឥទ្ធិពលជាលើកទី២នេះ មានជនជាតិជប៉ុនមួយរូបដែលគេហៅថាគ្រូធំ បានបង្កើតពិធីលៀងតែតាមបែបប្រពៃណីជនជាតិជប៉ុន។ ហើយប្រពៃណីនេះបានអនុវត្តិរហូតមកដល់ពេលបច្ចុប្បន្ន។ អ្នកស្រីបញ្ជាក់យ៉ាងដូច្នេះ ៖«យើងធ្វើកម្មវិធីនេះឡើង ដោយអញ្ជើញនិស្សិតកម្ពុជាមកចូលរួម ដើម្បីចង់ឱ្យពួកគាត់បានស្វែងយល់ពីការឆុងតែ ដែលជាប្រពៃណីជប៉ុន»។
ពិធីលៀងតែរបស់ជប៉ុនធ្វើឡើងក្នុងគោលបំណង ទទួលស្វាគមន៍ភ្ញៀវ។ ពិធីនេះតំណាងឱ្យរដូវទាំង៤ក្នុងប្រទេសជប៉ុន ដែលមានរដូវក្ដៅ រដូវរងា រដូវស្លឹកឈើជ្រុះ និងរដូវផ្ការីក។ ពិធីលៀងតែ មិនសំដៅធ្វើក្នុងពិធីបុណ្យណាមួយឡើយ ពោលប្រជាជនជប៉ុនចង់ធ្វើថ្ងៃណាក៏បាន ឬធ្វើរាល់ថ្ងៃក៏បាន។ ចំណែកឧបករណ៍ក្នុងការឆុងតែ មានមួយចំនួនខុសគ្នា ដែលតម្រូវទៅតាមរដូវនីមួយៗ៕
Tag:
ស្ថានទូតជប៉ុន
ប្រពៃណីជប៉ុន
ពិធីឆុងតែ
© រក្សាសិទ្ធិដោយ thmeythmey.com