អន្តរជាតិ
ប្រមុខ UN ៖ ការផ្ទុះការតវ៉ារបស់សកម្មជនបរិស្ថានតាមដងផ្លូវ ផ្តល់ក្តីសង្ឃឹមមួយសម្រាប់ខ្ញុំ
× អគ្គលេខាធិការអង្គការសហប្រជាជាតិ លោក António Guterres បានទទួលដឹងលឺពីចលនារបស់យុវជន ដែលជាសកម្មជនស្រលាញ់បរិស្ថាន និងមានការខ្វល់ខ្វាយពីការបម្រែបម្រួលអាកាសធាតុរបស់ពិភពលោក។ អគ្គលេខាធិការ មិនយល់ទាស់ខុសអ្វីឡើយទៅនឹងការតវ៉ាតាមដងផ្លូវរបស់យុវជនលើបញ្ហានេះ តែលោក យល់ឃើញថា នេះ ជាក្តីសង្ឃឹមសម្រាប់ពិភពលោក។
រយៈពេលថ្មីៗនេះ មានទំនោរនៃចលនារបស់យុវជនស្ទើរតែទូទាំងពិភលោក បានផ្ទុះការតវ៉ាតាមដងផ្លូវដើម្បីបង្ហាញពីក្តីបារម្ភរបស់ពួកគេពាក់ព័ន្ធនឹងបញ្ហានៃការផ្លាស់ប្តូរអាកាសធាតុ និងទាមទារឲ្យសហគមន៍អន្តរជាតិ ពិសេសមេដឹកនាំពិភពលោក ផ្តោតការចាប់អារម្មណ៍ និងរួមគ្នាដើម្បីស្វែងរកដំណោះស្រាយមានប្រសិទ្ធភាព និងអាចអនុវត្តបាន មុនពេលដែលមហន្តរាយរីកកាន់តែធ្ងន់ធ្ងរ។
ជុំវិញបញ្ហានេះ អគ្គលេខាធិការអង្គការសហប្រជាជាតិ លោក António Guterres ក៏បានកត់សម្គាល់ និងលើកទឹកចិត្តដល់យុវជនទាំងនោះផងដែរ។ តាមរយៈអត្ថបទអត្ថាធិប្បាយរបស់សារព័ត៌មាន The Guardians លោកអគ្គលេខាធិការ បានប្រាប់យុវជន ថា លោក យល់ពីអារម្មណ៍ភ័យខ្លាចរបស់យុវជន សម្រាប់រឿងអនាគត ដែលពាក់ព័ន្ធនឹងបញ្ហានេះ។
លោកអគ្គលេខាធិការរូបនេះ អះអាងថា លោក បានឃើញការប្តេជ្ញាចិត្ត និងភាពកាន់តែសកម្មកាន់តែច្រើន និងផុសផុលរបស់យុវជនជុំវិញបញ្ហាបរិស្ថាន ធ្វើឲ្យលោក កាន់តែមានទំនុកចិត្ត និងក្តីសង្ឃឹមថា ពិភពលោក នឹងឈ្នះក្នុងការដោះស្រាយបញ្ហានេះ។ លោក ថែមទាំងផ្ញើក្តីសង្ឃឹមទៅកាន់យុវជនថា ការខិតខំប្រឹងប្រែងរបស់យុវជនទាំងអស់គ្នានឹងអាចបំបាក់ការគំរាមកំហែង និងបង្កើតពិភពលោកមួយកាន់តែស្អាត សុវត្ថិភាព និងបៃតងសម្រាប់គ្រប់គ្នា។
អ្វីដែលគួរឲ្យកត់សម្គាល់នោះ ខណៈស្ងើចសរសើរនឹងចលនាយុវជន ប្រមុខអង្គការសហប្រជាជាតិរូបនេះ បានទទួលស្គាល់ថា ជំនាន់របស់លោក បានបរាជ័យក្នុងការធ្វើការរួមគ្នាដើម្បីឆ្លើយតបឲ្យបានទាន់ពេល និងសក្តិសម ទៅនឹងបញ្ហាប្រឈមនៃបម្រែបម្រួលអាកាស។ លោក សង្កត់ធ្ងន់ថា ចំណុចកម្សោយនេះហើយ ធ្វើយុវជនក្រោយ ផ្ទុះជាកំហឹង និងអ្នកជំនាន់មិនអាចប្រកែកបាននោះ។
ប្រមុខអង្គការសហប្រជាជាតិរូបនេះ ក៏បានលើកឡើងពីកិច្ចព្រមព្រៀងក្រុងប៉ារីសឆ្នាំ២០១៥ ពាក់ព័ន្ធនឹងបញ្ហាបម្រែបម្រួលអាកាសធាតុ ដែលជាលិខិតូបករណ៍ប្រវត្តិសាស្ត្រមួយរបស់ពិភពលោក ដែលត្រូវបានចុះហត្ថលេខាដោយប្រទេសជាង ១៩០។ សម្រាប់លោក កិច្ចព្រមព្រៀងនេះ នឹងគ្មានន័យអ្វីឡើយ បើមេដឹកនាំពិភពលោក គ្មានមហិច្ឆតាក្នុងការចាត់វិធានការអនុវត្តជាក់ស្តែងនោះ៕
© រក្សាសិទ្ធិដោយ thmeythmey.com