តំណាងទូតជប៉ុន ទៅគោរពសពអ្នករត់តាក់ស៊ីដែលត្រូវជនជាតិជប៉ុនប្លន់សម្លាប់

ជាតិ

តំណាងទូតជប៉ុន ទៅគោរពសពអ្នករត់តាក់ស៊ីដែលត្រូវជនជាតិជប៉ុនប្លន់សម្លាប់

23, Mar 2019 , 10:24 pm

រូបភាព

រូបភាពផ្តល់ដោយលោក ហួត សុធី ស្នងការរងនគរបាលខេត្តសៀមរាប

ដោយ: ថ្មីៗ

ភ្នំពេញ៖តំណាងអគ្គកុងស៊ុលជប៉ុននៅសៀមរាប បានទៅគោរពវិញ្ញាណក្ខន្ធសព លោក ហ៊ឹម ចាន់ អ្នករត់តាក់ស៊ីដែលត្រូវបានជនជាតិជប៉ុនសម្លាប់ នៅព្រឹកថ្ងៃទី ២៣ មីនានេះ។ ក្នុងពិធីគោរពវិញ្ញាណក្ខន្ធនេះ តំណាងស្ថានកុងស៊ុលជប៉ុន សោកស្ដាយចំពោះហេតុការណ៍ដែលបានកើតឡើងនេះ។ នេះបើតាមការបញ្ជាក់របស់លោក ហួត សុធី ស្នងការរងខេត្តសៀមរាប។

តំណាងស្ថានទូតប្រចាំកម្ពុជា បានដឹកនាំក្រុមការងារទៅគោរពវិញ្ញាណក្ខន្ធ និងនាំថវិកាមួយចំនួនជូនដល់គ្រួសារសពលោក ហ៊ឹម ចាន់ ។ នាពិធីគោរពវិញ្ញាណក្ខន្ធនេះ តំណាងស្ថានទូតជប៉ុនប្រចាំកម្ពុជា ក៏បានចូលរួមរំលែកទុក្ខចំពោះក្រុមគ្រួសារសពអ្នករត់តាក់ស៊ីផងដែរ។ លោក ហួត សុធី ស្នងការរងខេត្តសៀមរាប ដែលអមដំណើរជាមួយតំណាងស្ថានទូតជប៉ុនប្រចាំកម្ពុជា បញ្ជាក់ប្រាប់សារព័ត៌មានថ្មីៗថា៖ «តំណាងស្ថានទូតជប៉ុន មានការសោកស្ដាយ និងតក់ស្លុត ដោយមិនគួរណាជនជាតិជប៉ុនធ្វើអំពើនេះលើប្រជាជនកម្ពុជា»។

រូបភាពផ្តល់ដោយលោក ហួត សុធី ស្នងការរងនគរបាលខេត្តសៀមរាប

ក្រោយមានករណីនេះកើតឡើង លោក Hidehisa Haronouchi ឯកអគ្គរាជទូតជប៉ុននៅកម្ពុជា នាថ្ងៃទី២០ ខែមីនា ឆ្នាំ២០១៩ បានចេញសាររំលែកទុក្ខជាសារធារណៈដល់គ្រួសារលោក ហ៊ឹម ចាន់ អ្នករត់តាក់ស៊ី ដែលត្រូវជនជាតិជប៉ុន២រូបប្លន់សម្លាប់នៅស្រុកពួក ខេត្តសៀមរាប។

សូមបញ្ជាក់ថា លោក ហ៊ឹម ចាន់ មានអាយុ៤០ឆ្នាំ ជាអ្នកបើកតាក់ស៊ី ត្រូវបានគេប្រទះឃើញសាកសពកាលពីល្ងាចថ្ងៃទី១៧ ខែមីនា ឆ្នាំ២០១៩ នៅស្រុកពួកខេត្តសៀមរាប៕