ជាតិ
ត្រីសណ្តាយ៖ពេលនៅតូចហៅត្រីឆ្កែញី ឬត្រីក្រពាត់ ពេលពេញវ័យ ហៅត្រីសណ្តាយ
អ្នកនេសាទលើកបង្ហាញត្រីសណ្តាយ ដែលគាត់នេសាទបានពីអាងស្តុកទឹកវារិអគ្គិសនី សេសាន២ នៅខេត្តស្ទឹងត្រែង។ រូបភាព៖ ឈុត ឈាណា / អច្ឆរិយភាពនៃទន្លេមេគង្គ
×![]()
គម្រោងអច្ឆរិយភាពនៃទន្លេមេគង្គ (Wonders of the Mekong) សូមណែនាំត្រីឥតស្រកាមួយប្រភេទ ដែលមានរស់នៅក្នុងទន្លេ អូរ ស្ទឹង បឹងបួរ អាងស្តុកទឹក និងតំបន់វាលទំនាបលិចទឹក។
ត្រីត្រីសណ្តាយ ជាប្រភេទត្រីទឹកសាប មានឈ្មោះវិទ្យាសាស្ត្រ (Wallago attu) និងឈ្មោះជាភាសាអង់គ្លេស Wallago។ ត្រីសណ្តាយ មានប្រវែងដងខ្លួនអតិបរមា ២៤០ ស.ម។ វាជាប្រភេទត្រីល្មោភស៊ីដ៏ធំមួយ ដែលធំលូតលាស់នៅតាមមាត់ច្រាំងទន្លេ អូរដែលមានដុះស្មៅ និងភាគច្រើនវាលាក់ខ្លួននៅក្នុងរន្ធ។ ត្រីប្រភេទនេះ មានសកម្មភាពយឺត និងស្ងប់ស្ងាត់។ វាស្វែងរកចំណីនៅបាតទន្លេជ្រៅៗ ដែលមានទឹកនឹង ឬទឹកហូរតិចៗ ព្រមទាំងនៅស្រទាប់បាតក្រោមមានភក់ ឬល្បាប់ផងដែរ។
ត្រីសណ្តាយវ័យជំទង់ អាហារចម្បងរបស់វាគឺសត្វល្អិត ចំណែកឯត្រីពេញវ័យ ស៊ីត្រីតូចៗ ពពួកសត្វឥតឆ្អឹងកង និងគ្រុំ ខ្ចៅ ខ្យង លៀសជាដើម។ វាធ្វើចរាចរផ្ទាស់ទីចូលទៅក្នុងស្ទឹងតូចៗ ប្រឡាយ និងតំបន់លិចទឹក ក្នុងរដូវទឹកជំនន់ដើម្បីពង-កូន។ ជាទូទៅ ត្រីប្រភេទនេះពងដាក់ជាប់នឹងរុក្ខជាតិដែលដុះក្នុងទឹក ឬស្មៅ ហើយវានឹងញាស់នៅក្នុងរយៈពេលបីថ្ងៃក្រោយ។
នៅពេលកម្រិតទឹកជំនន់ទន្លេមេគង្គស្រកចុះ ត្រីសណ្តាយក៏វិលត្រឡប់ចូលមេគង្គ ឬដៃទន្លេធំៗវិញ ជាទីដែលវាស្នាក់នៅក្នុងអាងទឹកជ្រៅទាំងនោះ រហូតដល់រដូវទឹកជំនន់លើកក្រោយចូលមកដល់។
នៅពេលកម្រិតទឹកជំនន់ទន្លេមេគង្គស្រកចុះ ត្រីសណ្តាយក៏វិលត្រឡប់ចូលមេគង្គ ឬដៃទន្លេធំៗវិញ ជាទីដែលវាស្នាក់នៅក្នុងអាងទឹកជ្រៅទាំងនោះ រហូតដល់រដូវទឹកជំនន់លើកក្រោយចូលមកដល់។
ត្រីសណ្តាយ ត្រូវបានគេកត់ត្រាចូលក្នុងបញ្ជីក្រហម IUCN Red List (Near Threatened) ក្នុងឆ្នាំ ២០១០ ជាប្រភេទត្រីដែលកំពុងរងគ្រោះ ដែលនឹងអាចឈានទៅផុតពូជ។ ការនេសាទហួសកម្រិតពីអតីតកាល និងទៅអនាគត ជាបញ្ហាប្រឈមដ៏ធំមួយ ដែលជាមូលហេតុនៃការធ្លាក់ចុះចំនួនត្រីប្រភេទនេះ។
© រក្សាសិទ្ធិដោយ thmeythmey.com
