ភ្នំពេញ៖ ការទម្លាប់អានសៀវភៅ ប្រៀបដូចជាអាហារបំប៉នមួយបែបសម្រាប់ក្មេង ក្នុងការអភិវឌ្ឍចំណេះដឹង។ ដោយសារតែការអានសៀវភៅមានសារៈសំខាន់បែបនេះហើយ ទើបឪពុកម្ដាយ និងអាណាព្យាបាលមួយចំនួន ដែលបានយល់ដឹងពីចំណុចនេះ កំពុងប្រឹងជំរុញឲ្យកូនរបស់ពួកគេទម្លាប់អានសៀវភៅ ជាជាងការចំណាយពេលលេង ឬប្រើប្រាស់ទូរសព្ទ។
សូមស្ដាប់ពីទម្លាប់របស់ម្ដាយឪពុកនិងអាណាព្យាបាលមួយចំនួន ក្នុងការដឹកនាំកូនឱ្យក្លាយជាអ្នកស្រឡាញ់ការអានសៀវភៅ ដែលរៀបរៀងដោយកញ្ញា ប៉ូ សាគុន ដូចតទៅ៖
វាមិនមែនជារឿងងាយស្រួលប៉ុន្មាននោះទេ ដែលម្ដាយឪពុកនិងអាណាព្យាបាល នាសម័យបច្ចេកវិទ្យាជឿនលឿន មានទាំង កំព្យូទ័រ អាយផេត និងទូរសព្ទទំនើបៗជាដើមនោះ អាចបណ្ដុះកូនឱ្យចូលចិត្ត និងស្រឡាញ់ការអានសៀវភៅ ដូចជាការស្រេកឃ្លានអាហារប្រចាំថ្ងៃ។ ការជំរុញក្មេងឲ្យមានទម្លាប់អានសៀវភៅបាន លុះត្រាតែម្ដាយឪពុកនោះ ជាជនដែលតែងស្និទ្ធស្នាលនិងការសិក្សារៀនសូត្រ ជាអ្នកយល់តម្លៃការសិក្សាយ៉ាងច្បាស់ដែរ ទើបក្លាយជាគំរូដល់កូនរបស់ពួកគេ។
ជាអ្នកស្រលាញ់ និងឲ្យតម្លៃលើចំណេះដឹង តាមរយៈការអានសៀវភៅនោះ អ្នកស្រី ម៉ុត ម៉ានី កំពុងដើរមើលប្រភេទសៀវភៅ នៅតាមតូបលក់សៀវភៅនីមួយៗយ៉ាងយកចិត្តទុកដាក់ នៅក្នុងកម្មវិធិពិព័រណ៍អំណានជាតិកាលពីពេលថ្មីៗនេះ។ អ្នកស្រី ម៉ានី និងស្វាមី រួមទាំងកូនចៅ៣នាក់ទៀត បានទិញសៀវភៅប្រមាណ៤ទៅ៥ក្បាលក្នុងម្នាក់ៗ ដែលមានទាំងសៀវភៅបែបរឿងនិទាន និងប្រលោមលោកជាដើម។ កំពុងកាន់ថង់សៀវភៅក្នុងដៃ ស្ត្រីវ័យ៦៧ឆ្នាំរូបនេះ ឆ្លៀតពេលផ្ដល់បទសម្ភាសដល់ThmeyThmey ថា អ្នកស្រី ម៉ានី មកទិញសៀវភៅនេះ សម្រាប់យកទៅអាន ដើម្បីទទួលបានចំណេះដឹងថ្មីសម្រាប់ខ្លួនឯងផង និងចៅផង ជាពិសេសយកទៅអានឱ្យកូនចៅស្ដាប់មុនពេលចូលដំណេកនាពេលថ្ងៃត្រង់។ អ្នកស្រី ម៉ានី តែងប្រដៅអប់រំ និងជំរុញឲ្យកូនចៅអានសៀវភៅជាប្រចាំ។
អ្នកស្រីបន្ថែមថា ៖«ខ្ញុំទិញសៀវភៅរឿងខ្លះ យកទៅអានឱ្យចៅស្ដាប់។ អានឱ្យកូនស្ដាប់រហូតដល់ចៅ ឥឡូវប្រាប់ចៅថាឱ្យខំមើលសៀវភៅ។ ខ្ញុំមើលឱ្យគាត់ស្ដាប់ប្រហែលកន្លះម៉ោង មុនគាត់ចូលគេងពេលថ្ងៃត្រង់»។
កែ សំអាត
ជាអ្នករស់នៅភ្នំពេញ អ្នកស្រី ម៉ានី មានការព្រួយបារម្ភខ្លាំងចំពោះសម័យបច្ចេកវិទ្យា ដែលធ្វើចៅខ្លួន ងាកទៅឲ្យតម្លៃការមើលរឿងនិទាន ឬចំណេះដឹងផ្សេងៗតាមទូរសព្ទវិញ ហើយប្រាសចាកការអានសៀវភៅ។ បើតាមអ្នកស្រី ម៉ានី ពេលខ្លះចៅៗរបស់អ្នកស្រី ក៏ធុញនិងការនិទានរឿងតាមសៀវភៅដែរ តែអ្នកស្រីតែងតែលួងលោមពួកគេជានិច្ច។ «កាលពីគាត់នៅតូចៗខ្ញុំអានឱ្យគាត់ស្ដាប់ ពេលដែលគាត់ចេះមើល ខ្ញុំឱ្យគាត់អានដែរ ដើម្បីឱ្យគាត់បានដឹង។ ពេលខ្លះគាត់ធុញដែរ គាត់ថាខ្ញុំអានរឿងដដែលៗ។ ជួនកាលគាត់ស្ដាប់ ពេលខ្លះគាត់បែរខ្នង។ អានសៀវភៅនេះល្អណាស់ ព្រោះធ្វើឱ្យយើងដឹងពីសម័យមុនៗ»។ នេះជាការបញ្ជាក់របស់អ្នកស្រី ម៉ានី។
ងាកមកចាប់អារម្មណ៍បុរសមួយរូបទៀត ដែលបាននាំកូនស្រីរបស់ខ្លួនអាយុប្រមាណ៣ឆ្នាំឱ្យមកដើរទិញសៀវភៅជាមួយខ្លួន។ លោក ភុម ប៊ុនធិន គឺជាអ្នកសៀមរាបដែលបានឡើងមករៀននៅភ្នំពេញកាលពីប៉ុន្មានឆ្នាំមុន។ ជាអ្នកមានឧបនិស្ស័យជាមួយសៀវភៅ បុរសរាងខ្ពស់ស្រឡះរូបនេះ តែងតែឆ្លៀតពេលទំនេរពីការងារអានសៀវភៅឱ្យកូនស្ដាប់ ព្រោះលោកយល់ថា ជំរុញឲ្យក្មេងបានអាន ឬស្ដាប់ការអានសៀវភៅច្រើន វាអាចធ្វើឲ្យខួរក្បាលរបស់ពួកគេមានការវិវឌ្ឍលឿន។ លោក ប៊ុន ធិន ពន្យល់ដូច្នេះ ៖«ខ្ញុំចង់ឱ្យកូនមានខួរក្បាលឆាប់ចាប់បានល្អ នៅពេលដែលមានអ្នកនិយាយពីរឿងណាមួយ។ ឱ្យតែសៀវភៅនោះមានជារូបភាពស្អាតៗ ឬមានតុក្កតា គាត់ចូលចិត្តមើល»។
ភុម ប៊ុនធិន
ដើរជាមួយកូនស្រីប្រុសនិងភរិយាបណ្ដើរ ភ្នែកសម្លឹងមើលតូបលក់សៀវភៅបណ្ដើរ លោក សំអឿន បានសម្រេចទិញសៀវភៅជាភាសាខ្មែរសម្រាប់កូនរបស់លោក។ តាមរយៈការជំរុញឲ្យកូនអានសៀវភៅនេះ លោក សំអឿន សង្កេតឃើញថា វាមានប្រសិទ្ធភាពច្រើនសម្រាប់កូនៗរបស់ខ្លួន ជាពិសេសកូនប្រុសពៅទើបមានអាយុ៤ឆ្នាំ ដែលចំណូលចិត្តខ្លាំងក្នុងការអានសៀវភៅ ដែលលោកថា ទំនងមកពីម្ដាយរបស់គេ តែងតែអានសៀវភៅឱ្យស្ដាប់តាំងពីតូច។
លោករៀបរាប់យ៉ាងដូច្នេះ ៖«សៀវភៅនេះភាគច្រើនសម្រាប់អាន ហើយមួយចំនួនទៀតផ្នែកវិទ្យាសាស្ត្រ និងគណិតវិទ្យា។ ខ្ញុំចង់ឱ្យគាត់មានទម្លាប់ការអានតាំងពីតូច។ កូនពៅរបស់ខ្ញុំអាយុ៤ឆ្នាំ គាត់អានរាល់ថ្ងៃជាភាសាអង់គ្លេស។ ពេលគាត់អាន គាត់ជួកចិត្ត ពេលខ្លះយប់ពេកទៅ ខ្ញុំត្រូវបង្ខំឱ្យគាត់គេង តែគាត់អានចប់ បានគាត់ចូលគេង»។
ភ្នែកមើលទៅភរិយានឹងកូនដែលកំពុងឈរមើលសៀវភៅលោក សំអឿន ថាការអានសៀវភៅ ពិតជាជួយអភិវឌ្ឍន៍ខួរក្បាលច្រើន ដែលលោកប្រៀបអ្នកមិនបានអានសៀវភៅ ទៅនឹងការដើរយឺតជាងគេមួយខែ។
ក្នុងនាមជាឪពុកម្នាក់ដែរ បុរសរូបនេះ ស្នើដល់ម្ដាយឪពុកគ្រប់រូប សូមកុំទម្លាប់ឱ្យកូនមើលទូរសព្ទច្រើនពេក តែត្រូវបណ្ដុះពួកគេអានសៀវភៅឱ្យបានច្រើនវិញ ៖«ខ្ញុំចង់ប្រាប់ទៅឪពុកម្ដាយជំនាន់ក្រោយ កុំទម្លាប់ឱ្យកូនមើលទូរសព្ទច្រើនពេក ឱ្យគាត់មើលតែអ្វីគួរមើលបង្កើនចំណេះបានហើយ។ ត្រូវបណ្ដុះការអាន ក្មេងនឹងចូលចិត្តសៀវភៅហើយ។ ដូចកូនខ្ញុំបង្ខំឱ្យគាត់គេង ក៏គាត់មិនគេងដែរ។ គាត់កំណត់ខ្លួនគាត់ហើយ ថាដំបូងគាត់ផាត់ពណ៌រូប។ មុនចូលគេងគាត់យកសៀវភៅយ៉ាងហោចណាស់២ក្បាលមកអាន។ នេះជាទម្លាប់ដល់គាត់ធំ គាត់ស្រឡាញ់ការអានរហូត។ នេះជាការបណ្ដុះចំណេះដឹងរបស់ពួកគេ ទីពីរបណ្ដុះទម្លាប់ល្អក្នុងការអាន»៕