ទ្វីបគឺជាដែនដីធំៗ ដែលចែកទីតាំងភូមិសាស្ត្រដែលមនុស្សរស់នៅ។ ធម្មជាតិមិនបានបង្កើតដែនដីឡើង ដោយដាក់ឈ្មោះឲ្យដីនីមួយៗឡើយ។ ឈ្មោះ និងព្រំប្រទល់របស់ទ្វីបគឺត្រូវបានបង្កើតឡើងដោយមនុស្ស សម្រាប់ការគ្រប់គ្រង់រៀងខ្លួនៗប៉ុណ្ណោះ។ ពេលដែរអ្នកពិនិត្យមើលផែនទី តើអ្នកធ្លាប់ដែលឆ្ងល់ទេថា តើឈ្មោះទ្វីបទាំងនោះមានប្រភព និងដើមកំណើតមកពីណា?
ខាងក្រោមនេះគឺជាការបកស្រាយខ្លីដោយផ្អែកលើគេហទំព័រ worldatlas.com ៖
អាហ្វ្រិក (Africa) ៖ ឈ្មោះមួយនេះមានដើមកំណើតមកពីអាណាចក្ររ៉ូមាំង (សព្វថ្ងៃអ៊ីតាលី) ក្នុងការហៅទៅកាន់ប្រទេសទុយណេស៊ីដែលមានទីតាំងនៅខាងត្បូងអាណាចក្រមួយនេះ។
ប្រជាជនរ៉ូមាំងតែងហៅតំបន់នៅខាងត្បូងដែនដីរបស់ខ្លួននោះថា «Africa Terra» ឬ «Land of the Afri» ជាភាសាខ្មែរមានន័យថា «ដែនដីនៃអាហ្វ្រី»។ បច្ចុប្បន្ន តំបន់នេះមានក្លាយទៅជាប្រទេសទុយណេស៊ី មានទីតាំងនៅខាងជើងនៃទ្វីបអាហ្វ្រីក និងនៅខាងត្បូងប្រទេសអ៊ីតាលី។ ពាក្យថា «Afri» អាចមានដើមកំណើតនៅប្រទេសក្រិកពីមុនមកទៀត។ បន្ទាប់មក ពាក្យនេះត្រូវបានគេប្រើប្រាស់ទូទាំងទ្វីបអាហ្វ្រិក ដោយសារឥទ្ធិពលប្រជាជនអឺរ៉ុប។
អឺរ៉ុប (Europe) ៖ ពាក្យនេះក្លាយមកពីពាក្យ «Europa» ។ Europa គឺជាឈ្មោះរបស់នារីម្នាក់ ដែលជាកូនស្រីរបស់ស្តេច Agenor ឬ Phoenix ដែលមានវត្តមានក្នុងរឿងនិទានរបស់ប្រទេសក្រិកបុរាណ។ មតិមួយទៀតដោយលោក Ernest Klein បាននិយាយថា Europe អាចកើតមកពីពាក្យ Ereb ប្រើប្រាស់ដោយក្រុមប្រទេស Sumerian (សព្វថ្ងៃអ៊ីរ៉ាក់) ក្នុងការហៅទៅកាន់ប្រទេសមួយចំនួនក្នុងទ្វីបអឺរ៉ុប។ Ereb មានន័យថា «ភាពងងឹត» ឬ «ភាពធ្លាក់ចុះ» ។ នេះអាចសំដៅបានថា ប្រទេសក្នុងតំបន់ Sumerian ធ្លាប់មានប្រវត្តិជូជត់ជាមួយប្រទេសខ្លះក្នុងទ្វីបអឺរ៉ុប។ មួយវិញទៀត Ereb ក៏អាចមានន័យសាមញ្ញថា «ដីខាងលិច» ។
អូសេអានី (Oceania) ៖ ឈ្មោះនេះមានន័យត្រង់ៗងាយយល់។ Oceania ក្លាយមកពីពាក្យថា Ocean ឬ មហាសមុទ្រធំ។ មួយវិញទៀត វាមានកំណើតមកពីក្រិក Okeanos មានន័យថា ដែនដីដែលព័ទ្ធដោយទឹកសមុទ្រធំ។
អាស៊ី (Asia) ៖ ពាក្យនេះប្រើប្រាស់ដោយក្រិក Ἀσία សម្រាប់ហៅទៅកាន់ប្រទេសនៅខាងកើតសមុទ្រ Aegean ក្បែរដែនដី Anatolia សព្វថ្ងៃ ប្រទេសតួគី និងតំបន់អាស៊ីកណ្តាលមួយចំនួន។ ក្រោយមក ដោយសារអឺរ៉ុបមានឥទ្ធិពលខាងជំនួញ និងអក្សរសាស្ត្រ ពាក្យនេះក៏រាលដាលទីតំបន់ខាងកើតបន្តទៀតមានដូចជា ចិន និងជប៉ុន។
អាមេរិក (The Americas) ៖ ពាក្យនេះគ្រប់ដណ្តប់ទាំងអាមេរិកខាងជើង និងខាងត្បូង។ អ្នកធ្វើផែនទីបុរាណរបស់អ៊ឺរ៉ុប បានដាក់ឈ្មោះមួយនេះក្នុងការឲ្យកិត្តិយសទៅកាន់លោក Amerigo Vespucci ដែលជាអ្នកនាវាចរដ៏ល្បីជនជាតិអ៊ីតាលីម្នាក់។ លោកមិនមែនជាអ្នកធ្វើដំណើរទៅកាន់ទ្វីបអាមេរិកដំបូងនោះទេ តែគាត់បានសន្មត់ជាលើកដំបូងថា ដែនដីមួយនេះ ជាទ្វីបមួយដែលធំហើយថ្មី សម្រាប់ប្រទេសមហាអំណាចក្នុងទ្វីបអឺរ៉ុបកាលពីពេលនោះ។
អង់តាក់ទិក (Antarctica) ៖ ដំបូង ក្រិកហៅតំបន់ខាងជើងភពផែនដីថា Arktos មានន័យថាខ្លាឃ្មុំ ស ដែលរស់នៅតាមតំបន់ត្រជាក់អាកទិក។ ក្រោយមក រ៉ូមាំងប្រើប្រាស់ពាក្យ Antarktike ឬ Anti-Arctic មានន័យថា «មិនមែនអាកទិក» ឬ «ផ្ទុយពីអាកទិក» សម្រាប់ហៅតំបន់ខាងត្បូងនៃផែនដី៕