ជាតិ
នយោបាយជាតិ
សម្ដេច ហ៊ុន សែន ៖ ទោះលោក សម រង្ស៊ី ចូលស្រុក ជាមួយមន្ត្រីUN ក៏សមត្ថកិច្ចវាយខ្នោះដែរ
× ភ្នំពេញ៖ ឲ្យតែលោក សម រង្ស៊ី មានវត្តមាននៅកម្ពុជាពេលណា សមត្ថកិច្ចនឹងចាប់ខ្លួននៅពេលនោះ។ប្រមុខរដ្ឋាភិបាល នៅតែព្រមានចាប់ខ្លួនមេដឹកនាំអតីតគណបក្សប្រឆាំងរូបនេះ ដោយគ្មានការលើកលែងឡើយ ។
ថ្លែងក្នុងពិធីចែកសញ្ញាបត្រដល់និស្សិតនៃសាកលវិទ្យាល័យភ្នំពេញអន្តរជាតិ នៅថ្ងៃទី២៥ មីនា សម្ដេច ហ៊ុន សែន បាននិយាយដោយមិនចំឈ្មោះ ដែលគេដឹងសំដៅទៅលើលោក សម រង្ស៊ី ថា សមត្ថកិច្ចបានត្រៀមខ្លួនរួចជាស្រេច ក្នុងការរង់ចាំចាប់ខ្លួនមេដឹកនាំអតីតបក្សប្រឆាំងរូបនេះ ដែលអះអាងមានខាងអង្គការសហប្រជាជាតិចាំជួយនោះ។ ត្រង់ចំណុចនេះ នាយករដ្ឋមន្ត្រីកម្ពុជា ដែលទទួលបានព័ត៌មានពីលោក សម រង្សី គ្រោងចូលមកកម្ពុជា ហើយមានការអមដំណើរជាមួយមន្ត្រីអង្គការសហប្រជាជាតិនោះ បានព្រមានថា សម្ដេចនឹងបញ្ជាឲ្យសមត្ថកិច្ចវាយខ្នោះលោក សម រង្ស៊ី នៅហ្នឹងកន្លែងភ្លាមៗ បើទោះជាមានវត្តមានខាងអង្គការសហប្រជាជាតិមកជាមួយក្តី។
សូមស្តាប់សំឡេង៖
«សុទ្ធតែអួតថា (លោក សម រង្ស៊ី) ឲ្យតែមក គឺមានខាងអង្គការសហប្រជាជាតិមកជាមួយ។ ចាំតើ! បរទេសមកជាមួយ រឿងបរទេស! តែអញមានទៅវាយខ្នោះបរទេសឯណា អញវាយខ្នោះអាអ្នកដែលមានសាលដីកាពីតុលាការ»។ នេះជាការបញ្ជាក់របស់ប្រមុខរដ្ឋាភិបាល។
បន្ថែមពីនេះសម្ដេច ហ៊ុន សែន ក៏បានព្រមានលោក សម រង្ស៊ី មិនឲ្យលួចចូលកម្ពុជា តាមច្រកទល់ដែននោះទេ ព្រោះវាគ្មានសុវត្ថិភាពឡើយ បានន័យថា កម្លាំងសមត្ថកិច្ចតាមច្រកព្រំដែន បានសហការជាមួយប្រទេសជិតខាង ក្នុងការត្រៀមចាំខ្លួនមេដឹកនាំអតីតបក្សប្រឆាំងរួចហើយ។
ក្រៅពីព្រមានលោក សម រង្ស៊ី លោកនាយករដ្ឋមន្ត្រីរូបនេះ ក៏ប្រាប់ឲ្យមន្ត្រី និងសកម្មជន ដែលគាំទ្រអតីតគណបក្សសង្គ្រោះជាតិ បញ្ឈប់សកម្មភាព ដែលកំពុងតែរៀបចំគណៈកម្មការចំពោះកិច្ច ក្នុងត្រៀមទទួលវត្តមានលោក សម រង្ស៊ី ចូលស្រុកនេះផងដែរ៕
Tag:
ហ៊ុន សែន
សម រង្ស៊ី
UN
© រក្សាសិទ្ធិដោយ thmeythmey.com