កីឡាជាតិ
ជាតិ
AFC U23៖ ជំនួបជាមួយឆាយនីសតៃប៉ិ ជាឱកាសដែលកម្ពុជាត្រូវបង្ហាញថា ពួកគេមិនមែនជាក្រុមបាតតារាង លោក Felix Dalmas និងក្រុមកីឡាករ U23 អំឡុងពេលហ្វឹកហាត់ត្រៀមជួបឆាយនីសតៃប៉ិ, រូបភាពពី FFC
× ទោះបីជាការប្រកួតបង្គ្រប់កិច្ច តែក្រុមកីឡាករជម្រើសជាតិអាយុក្រោម២៣ឆ្នាំកម្ពុជា ត្រូវការឈ្នះក្រុមឆាយនីសតៃប៉ិនៅយប់នេះ ដើម្បីស្តារមុខមាត់ ក៏ដូចជាផ្គាប់ចិត្តអ្នកគាំទ្រ។ ខណៈក្រុម U23 អូស្ត្រាលី ត្រូវប្រជែងជាមួយកូរ៉េខាងត្បូង ដើម្បីដណ្តើមកៅអីវគ្គបន្តនៃព្រឹត្តិការណ៍ AFC U23 Championship 2020។
ក្រុមកីឡាករជម្រើសជាតិអាយុក្រោម២៣ឆ្នាំកម្ពុជា ត្រូវបើកទ្វារពហុកីឡដ្ឋានជាតិស្វាគមន៍ U23 ឆាយនីសតៃប៉ិ សម្រាប់ជំនួបចុងក្រោយនៃវគ្គជម្រុះពូល H ក្នុងព្រឹត្តិការណ៍ AFC U23 Championship 2020 នៅម៉ោង៨យប់ថ្ងៃទី២៦ ខែមីនា ឆ្នាំ២០១៩។ នេះជាការប្រកួតបង្គ្រប់កិច្ចសម្រាប់ក្រុមទាំងពីរ បន្ទាប់ពីពួកគេបានរងបរាជ័យពីរប្រកួតជាប់គ្នាដូចគ្នា។
ទោះបីយ៉ាងនេះក្តី ក្រុមគោព្រៃកម្ពុជា ក្រោមការដឹកនាំផ្ទាល់របស់លោក Keisuke Honda រំពឹងទទួលបានជ័យជម្នះលើក្រុមឆាយនីសតៃប៉ិនៅយប់នេះ ដើម្បីស្តារមុខមាត់ ក៏ដូចជាផ្គាប់ចិត្តអ្នកគាំទ្រ បន្ទាប់ពីពួកគេធ្វើឲ្យអ្នកគាំទ្រខកចិត្តពីរប្រកួតជាប់គ្នាកន្លងមក។ បើមើលពីស្ថិតប្រកួតក្នុងពូល H ក្រុម U23 កម្ពុជាហាក់ទទួលបានលទ្ធផលល្អប្រសើរជាងឆាយនីសតៃប៉ិ ក្នុងនោះកម្ពុជាចាញ់អូស្ត្រាលី ៦-០ និងចាញ់កូរ៉េខាងត្បូង ៦-១ ខណៈឆាយនីសតៃប៉ិចាញ់អូស្ត្រាលី ៦-០ តែចាញ់កូរ៉េខាងត្បូង ៨-០។
គ្រូបង្វឹកក្រុមកូរ៉េខាងត្បូង លោក Hag Bum kim ដែលបានដឹកនាំក្រុមប្រកួតជាមួយ U23 កម្ពុជា និងឆាយនីសតៃប៉ិ យល់ថា ការប្រកួតជាមួយក្រុមកម្ពុជាមានភាពស្វិតស្វាញ និងលំបាកជាងជួបឆាយនីសតៃប៉ិ។ នេះក៏ដោយសារតែ កីឡាករកម្ពុជាមានឆន្ទៈខ្ពស់ក្នុងការយកឈ្នះជាងកីឡាករឆាយនីសតៃប៉ិ។ «យើងយល់ថា ការប្រកួតជាមួយកម្ពុជាមានភាពលំបាកជាងឆាយនីសតៃប៉ិ ព្រោះកម្ពុជាមានឆន្ទៈចង់ឈ្នះខ្លាំងជាង»។ នេះជាការលើកឡើងរបស់គ្រូបង្វឹកក្រុមកូរ៉េខាងត្បូង ក្រោយជំនួបជាមួយកម្ពុជា។
មុនជំនួបបង្គ្រប់កិច្ចខាងលើ ក្រុម U23 អូស្ត្រាលីត្រូវតតាំងជាមួយ U23 កូរ៉េខាងត្បូង ដើម្បីដណ្តើមកៅអីឡើងទៅវគ្គបន្តនៃពានរង្វាន់ AFC U23 Championship 2020 តំណាងឲ្យពូល H នៅម៉ោង៥រសៀល នាពហុកីឡដ្ឋានជាតិ។ នេះជាការប្រកួតដ៏ជក់ចិត្ត និងស្វិតស្វាញបំផុត ព្រោះក្រុមទាំងពីរសុទ្ធតែត្រូវការឈ្នះរៀងៗខ្លួន ដើម្បីធានាកៅអីទៅវគ្គបន្ត៕
Tag:
AFC U23 Championship 2020
U23 កម្ពុជា
អូស្ត្រាលី
កូរ៉េខាងត្បូង
© រក្សាសិទ្ធិដោយ thmeythmey.com