ថាក់ស៊ីន៖ «ក្នុងវ័យ ៧០ឆ្នាំ បើអាចបង្កើតបក្សបាន ខ្ញុំនឹងដាក់ឈ្មោះថា បក្សរីករាយនឹងជីវិត»

អន្តរជាតិ

ថាក់ស៊ីន៖ «ក្នុងវ័យ ៧០ឆ្នាំ បើអាចបង្កើតបក្សបាន ខ្ញុំនឹងដាក់ឈ្មោះថា បក្សរីករាយនឹងជីវិត»

26, Mar 2019 , 8:59 pm

រូបភាព

ដោយ: ថ្មីៗ

អតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត់ បាននិយាយក្នុងបទសម្ភាសន៍មួយនាទីក្រុងហុងកុងនៅថ្ងៃចន្ទទី ២៥ ខែមីនាថា ស្ថិតក្នុងវ័យ ៧០ឆ្នាំ បើសិនជាលោកអាចបង្កើតគណបក្សនយោបាយបាន លោកនឹងដាក់ឈ្មោះថា «គណបក្សរីករាយនឹងជីវិត»។

ខណៈដែលប្រជាជនថៃបន្តទន្ទឹងរង់ចាំលទ្ធផលបោះឆ្នោតសាកលបណ្តោះអសន្នដែលពោរពេញដោយភាពមិនប្រក្រតី លោក ថាក់ស៊ីន ស៊ីណាវ៉ាត់ អតីតនាយករដ្ឋមន្ត្រីបានចេញមុខផ្តល់បទសម្ភាសន៍ជុំវិញបញ្ហានយោបាយថៃ ដល់ទីភ្នាក់ងារព័ត៌មាន AFP។

អ្នកនយោបាយថៃដ៏មានឥទ្ធិពលរូបនេះបានចោទប្រកាន់ដោយបើកចំហថាការបោះឆ្នោតនៅថ្ងៃត្រូវបានរៀបចំទុកជាមុន ដើម្បីធានាឲ្យក្រុមយោធារក្សាអំណាចរបស់ខ្លួនបន្តទៅ។ លោក ថាក់ស៊ីន ព្រមានជាមុនថា ក្រុមយោធានេះត្រៀមខ្លួនស្រេចដើម្បីបំផ្លាញប្រព័ន្ធនយោបាយថៃដើម្បីរក្សាអំណាចខ្លួនដែរ។

ពេលអ្នកកាសែតសាកសួរថា តើលោកនឹងចូលស្រុកថៃម្តងទៀតឬក៏យ៉ាងណា មេដឹកនាំដែលធ្លាក់ពីតំណែងដោយសាររដ្ឋប្រហារឆ្នាំ ២០០៦ នេះបានឆ្លើយតបថា ៖« ខ្ញុំមិនខ្វល់ឡើយ ប៉ុន្តែខ្ញុំនៅតែស្រឡាញ់ប្រទេសជាតិខ្ញុំ និងស្រឡាញ់ប្រជាជនរបស់ខ្ញុំដូចគ្នាដែរ។

ជុំវិញសំណួរពាក់ព័ន្ធនឹងឥទ្ធិពលរបស់លោកក្នុងនយោបាយថៃ លោក ថាក់ស៊ីន បានអះអាងច្បាស់ៗថា មកដល់បច្ចុប្បន្ននេះលោកលែងមានអំណាចលើការគ្រប់គ្រងគណបក្សនយោបាយនៅថៃដែលមានទំនាក់ទំនងជាមួយលោកទៀតហើយ។

និយាយពីគណបក្សនយោបាយ អតីតមេដឹកនាំថៃរូបនេះបន្តដូច្នេះ៖ «ខ្ញុំមានវ័យ ៧០ឆ្នាំទៅហើយ។ បើសិនជាខ្ញុំនឹងត្រូវបង្កើតបក្សនយោបាយមួយ ខ្ញុំនឹងបង្កើតបក្សដែលមានឈ្មោះថា គណបក្សរីករាយនឹងជីវិត»។

គណបក្សនយោបាយនានាដែលស្និទ្ធនឹងក្រុមគ្រួសារស៊ីណាវ៉ាត់បន្តឈ្នះរាល់ការបោះឆ្នោតរាប់ចាប់ពីឆ្នាំ ២០០១មក ប៉ុន្តែអ្វីដែលសំខាន់នោះរដ្ឋាភិបាលដែលដឹកនាំដោយបក្សទាំងនោះត្រូវបានញាំញីដោយចលនាបាតុកម្មតាមផ្លូវ និងទម្លាក់ពីតំណែងដោយរដ្ឋប្រហារយោធាជាដើម។ តួយ៉ាង ប្អូនស្រីរបស់លោក ថាក់ស៊ីន លោកស្រី យីងឡាក់ ស៊ីណាវ៉ាត់ ត្រូវបានក្រុមយោធាដឹកនាំដោយលោក ប្រាយុទ្ធ ចន្ទអូចា ទម្លាក់ពីតំណែងនៅខែឧសភាឆ្នាំ ២០១៤។

ដោយឡែកក្នុងបទសម្ភាសន៍ដដែលនោះ ពេលសួរថា លោក សោកស្ដាយឬអត់ដែលការដឹកនាំរបស់លោក ត្រូវបានគេទិតៀនថាពោរពេញដោយអំពើពុករលួយ ផ្តាច់ការ និងបក្សពួកនិយម លោក ថាក់ស៊ីន បានឆ្លើយតបយ៉ាងខ្លីថា គ្មានអ្នកណាម្នាក់ល្អឥតខ្ចោះទេ។ លោកប្រដូចអ្វីដែលធ្លាប់កើតឡើងនៅថៃ ទៅនឹងស្ថានភាពនយោបាយមីយ៉ាន់ម៉ា និងឥណ្ឌូណេស៊ីអំឡុងពេលប្រទេសទាំងនោះកាន់កាប់ដោយរបបពាក់ណ្តាលប្រជាធិបតេយ្យដែរ។

«គ្មានអ្នកណាត្រូវ ១០០ភាគរយទេ ឬខុស ១០០ភាគរយទេ។ យើងត្រូវរៀនពីអតីតកាល មិនមែនក្លាយជាអ្នកទោសនៃប្រវត្តិសាស្ត្រឡើយ។ មានតែវិធីមួយប៉ុណ្ណោះដែលអាចឲ្យថៃរីកលូតលាស់បាន នោះគឺយើងត្រូវប្រែក្លាយប្រទេសនេះទៅជាប្រទេសប្រជាធិបតេយ្យពេញលេញ និងមានការបោះឆ្នោតសេរីនិងយុត្តិធម៌»។ លោក ថាក់ស៊ីន បន្ថែមដូច្នេះ។

ប៉ុន្តែទោះជាបែបនេះក្តី លោក ថាក់ស៊ីន បង្ហាញការការសោកស្តាយដែលការបោះឆ្នោតសកលពីថ្ងៃ ២៤ មីនាមិនមានមែនជាក្តីសង្ឃឹមរបស់ប្រជាពលរដ្ឋ និងមិនឆ្លុះបញ្ចាំងពីឆន្ទៈរបស់ខ្លួននោះ៕