រដ្ឋមន្ត្រីការបរទេសអាមេរិក លោក Mike Pompeo បានប្រាប់ទៅកាន់សមភាគីរុស្ស៊ី Sergei Lavrov ថា ក្រុងវ៉ាស៊ីនតោន នឹងមិននៅស្ងៀមឡើយ ប្រសិនបើក្រុងម៉ូស្គូបន្តបញ្ចូនកងទ័ពខ្លួនទៅកាន់វេណេស៊ុយអេឡា ក្នុងគោលដៅគាំទ្ររបបលោក នីកូឡាស់ ម៉ាឌុយរ៉ូ។ ប្រមុខការទូតអាមេរិករូបនេះ ទទូចឲ្យភាគីរុស្ស៊ីកាត់បន្ថយឥរិយាបថ ដែលអាមេរិកចាត់ទុកថា «គ្មានបានការ» ក្នុងវិបត្តិវេណេស៊ុយអេឡា។
ការព្រមាននេះ គឺធ្វើឡើងតាមរយៈទូរសព្ទរវាងលោក Pompeo និងលោករដ្ឋមន្ត្រីការបរទេសរុស្ស៊ី Sergei Lavrov នៅថ្ងៃទី២៥ ខែមីនា។ ការជជែកគ្នានេះ កើតមានពីរថ្ងៃប៉ុណ្ណោះ ក្រោយពីធ្លាយដំណឹងថា យ៉ាងហោចណាស់យន្តហោះយោធារុស្ស៊ីចំនួនពីរគ្រឿង ដែលដឹកមន្ត្រីការពារជាតិខ្ពស់ម្នាក់ និងកងទ័ពជាង១០០នាក់ បានចុះចតនៅអាកាសយានដ្ឋានដ៏សំខាន់មួយក្នុងរដ្ឋធានីការ៉ាកាសើ របស់វេណេស៊ុយអេឡា កាលពីថ្ងៃទី២៣ ខែមីនាកន្លងទៅ។
យោងតាមសេចក្តីថ្លែងការណ៍របស់ក្រសួងការបរទេសអាមេរិក លោករដ្ឋមន្ត្រី Pompeo គូសបញ្ជាក់ថា សកម្មភាពរុស្ស៊ីដែលបន្តបញ្ជូនកងទ័ពខ្លួនទៅជួយគាំទ្ររបបប្រធានាធិបតី ម៉ាឌុយរ៉ូ បង្កជាបន្ទុកកាន់តែធ្ងន់ធ្ងរដល់ប្រជាជនវេណេស៊ុយអេឡា ដែលគាំទ្រយ៉ាងខ្លាំងក្លាលើលោក ហ័ន ក្វៃដូ។ បន្ថែមពីនេះ លោកក៏បានស្នើឲ្យក្រុងម៉ូស្គូបន្ធូរបន្ថយឥរិយាបថអវិជ្ជមានបែបនេះ និងចាប់ដៃជាមួយប្រជាជាតិដទៃទៀត ដែលមានបំណងស្វែងរកអនាគតល្អប្រសើរជាងមុនសម្រាប់ប្រជាជនវេណេស៊ុយអេឡា ដែលកំពុងរងទុក្ខ។
រុស្ស៊ី និងវេណេស៊ុយអេឡាបានព្យាយាមពង្រឹងចំណងទាក់ទងជាមួយគ្នាយ៉ាងខ្លាំង ក្នុងរយៈពេលប៉ុន្មានខែចុងក្រោយនេះ ខណៈទំនាក់ទំនងរវាងវេណេស៊ុយអេឡា និងអាមេរិកកាន់តែធ្លាក់ដុនដាប។ យោងតាមការចុះផ្សាយរបស់កាសែត Washington Post កាលពីខែធ្នូកន្លងទៅ រុស្ស៊ីបានបញ្ជូនយន្តហោះចម្បាំង២គ្រឿង ទៅចូលរួមសមយុទ្ធយោធាជាមួយរបបលោក ម៉ាឌុយរ៉ូ ។
ទាក់ទិននឹងវិបត្តិនយោបាយបច្ចុប្បន្ននៅវេណេស៊ុយអេឡា ក្រុងមូស្គូ បានចេញមុខថ្កោលទោសរាល់ប្រទេសណាដែលបានទទួលស្គាល់ និងគាំទ្រមេបក្សប្រឆាំងវេណេស៊ុយអេឡា លោក ក្វៃដូ ដែលប្រកាសខ្លួនឯងជាប្រធានាធិបតីស្តីទីកាលពីខែមករា។ ចំណែកឯលោក ម៉ាឌុយរ៉ូ បានចោទប្រកាន់លោក កៃ្វដូ ថា ព្យាយាមធ្វើរដ្ឋប្រហារប្រឆាំងទម្លាក់លោកពីតំណែង ដោយមានជំនួយពីសហរដ្ឋអាមេរិក។ ត្រង់នេះ វិមានក្រេមឡាំងបានយល់ស្របនឹងការលើកឡើងរបស់លោក ម៉ាឌុយរ៉ូ ថែមទាំងប្តេជ្ញាធ្វើអ្វីគ្រប់បែបយ៉ាងតាមតម្រូវការរបស់លោក ម៉ាឌុយរ៉ូ ក្នុងគោលដៅជួយរក្សារបបមួយនេះកុំឲ្យដួលរំលំទៀតផង។
មែនទែនទៅ ទំនាក់ទំនងដ៏ស្អិតល្មួតរវាងក្រុងមូស្គូនិងក្រុងការ៉ាកាស់ កើតមានឡើងចាប់តាំងពីជំនាន់លោកអតីតប្រធានាធិបតីវេណេស៊ុយអេឡា Hugo Chávez កាលពីឆ្នាំ១៩៩៩មកម្ល៉េះ។ កាលនោះរុស្ស៊ី គឺជាអ្នកផ្គត់ផ្គង់អាវុធធំបំផុតរបស់វេណេស៊ុយអេឡា។ ក្រោយមក ក្រោមអាណត្តិលោក ម៉ាឌុយរ៉ូ ដែលបានក្លាយជាប្រធានាធិបតីក្នុងឆ្នាំ២០១៣ បន្ទាប់ពីលោក Chávez បាត់បង់ជីវិតទៅ រដ្ឋាភិបាលក្រុងមូស្គូ បានពង្រីកការផ្តល់កម្ចីរាប់ពាន់លានដុល្លារដល់ក្រុងការ៉ាកាស់។ ភាគច្រើននៃកម្ចីទាំងនោះ មានលក្ខខណ្ឌមួយ ដោយវេណេស៊ុយអេឡាត្រូវសងវិញជាប្រេង។
កន្លងទៅ ក្រុមហ៊ុនរដ្ឋរុស្ស៊ីឈ្មោះថា Rosneft បានផ្តល់លុយជាច្រើនសន្ធឹកសន្ធាប់ដល់របបលោក ម៉ាឌុយរ៉ូ ជាថ្នូរនឹងសិទ្ធិកាន់កាប់រួមគ្នាលើទីតាំងបូមប្រេងយ៉ាងហោចណាស់ចំនួន ៥កន្លែងនៅវេណេស៊ុយអេឡា។ ថ្វីបើល្បីឈ្មោះជាប្រទេសមានប្រភពប្រេងច្រើនបំផុតមួយក្នុងពិភពលោក ផលិតកម្មប្រេងរបស់វេណេស៊ុយអេឡាបានដាំក្បាលចុះយ៉ាងខ្លាំង ក្នុងរយៈពេលប៉ុន្មានឆ្នាំចុងក្រោយ ក៏ព្រោះតែអំពើពុករលួយ និងកង្វះសមត្ថភាពគ្រប់គ្រង។
ដោយសារកត្តាទាំងនេះគួបផ្សំជាមួយនឹងការជ្រៀតជ្រៀកពីបរទេស ព្រមទាំងគោលនយោបាយសេដ្ឋកិច្ចបែបសង្គមនិយមផងនោះ វាបានបង្កឲ្យផ្ទុះឡើងនូវវិបត្តិសេដ្ឋកិច្ច និងនយោយបាយនាពេលបច្ចុប្បន្ន ដែលបង្ខំឲ្យប្រជាជនវេណេស៊ុយអេឡារាប់លាននាក់ជម្លៀសខ្លួនទៅប្រទេសជិតខាង៕