ភ្នំពេញ៖ ម្ចាស់សត្តឃាត និងអាជីវករលក់សាច់ជ្រូក មិនត្រូវឆ្លៀតឱកាសដំឡើងថ្លៃ ដោយសារករណីជំងឺប៉េស្តជ្រូកអាហ្វ្រិក កំពុងរីករាលដាលនៅក្នុងប្រទេសវៀតណាមនោះទេ ។ នេះជាការអំពាវនាវរបស់រដ្ឋមន្ត្រីក្រសួងកសិកម្ម រុក្ខប្រមាញ់ និងនេសាទ។
លោក វេង សាខុន បាននិយាយថា ការរីករាលដាលនៃជំងឺប៉េស្តជ្រូកអាហ្វ្រិកដ៏កាចសាហាវនៅប្រទេសវៀតណាមនេះ ប្រាកដជាបង្កឲ្យមានការព្រួយបារម្ភដល់អ្នកចិញ្ចឹមជ្រូកនៅកម្ពុជាគ្រប់កម្រិត រួមទាំងអាជីវករ ម្ចាស់សត្តឃាតដ្ឋាន ក្រុមហ៊ុនផលិតចំណីជ្រូក ដេប៉ូលក់ចំណីជ្រូក ជាពិសេសអ្នកបរិភោគសាច់ជ្រូកជាដើម។ តែយ៉ាងណាបញ្ហានេះ ត្រូវបានរដ្ឋមន្ត្រីក្រសួងកសិកម្ម អះអាងថា ក្រសួងបានចាត់វិធានការយ៉ាងម៉ឺងម៉ាត់ តាមរយៈការបញ្ជាឲ្យអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយអាជ្ញាធរពាក់ព័ន្ធនៅតាមព្រំដែនប្រទេសវៀតណាម ត្រួតពិនិត្យ និងទប់ស្កាត់ការឆ្លងរីករាលដាលជំងឺប៉េស្តជ្រូកនេះ ចូលមកកម្ពុជា។ ទន្ទឹមនឹងការដាក់ចេញវិធានការនេះលោក វេង សាខុន ក៏ហាមអ្នកចិញ្ចឹមជ្រូក ម្ចាស់សត្តឃាតដ្ឋាន និងអាជីវករលក់សាច់ជ្រូកទាំងអស់ ត្រូវរក្សាតម្លៃសាច់ជ្រូកឲ្យនៅដដែល ដោយមិនត្រូវឆក់ឱកាសដំឡើងតម្លៃសាច់ជ្រូកជាដាច់ខាត។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ (រូបបានពីទំព័រហ្វេសប៊ុកក្រសួង)
រដ្ឋមន្ត្រីក្រសួងកសិកម្ម បានថ្លែងនៅក្នុងសិក្ខាសាលាស្តីពី វិធានការការពារ និងទប់ស្កាត់ជំងឺប៉េស្តជ្រូកអាហ្វ្រិកនៅកម្ពុជា នៅព្រឹកថ្ងៃទី២៦ មីនា ដូច្នេះថា៖«ក្តីបារម្ភរបស់គ្រប់ភាគីពាក់ព័ន្ធទាំងអស់នេះ ក្រសួងកសិកម្ម រុក្ខាប្រមាញ់ និងនេសាទ មិនបានព្រងើយកន្តើយ ហើយជានិច្ចកាលតែងតែយកចិត្តទុកដាក់ក្នុងការជួយការពារផលប្រយោជន៍របស់កសិករ។ ជាក់ស្តែងក្រសួងបានណែនាំឲ្យអគ្គនាយកដ្ឋានសុខភាពសត្វ និងផលិតកម្មសត្វចាត់វិធានការយ៉ាងម៉ឺងម៉ាត់ដោយត្រូវសហការជាមួយអន្តរស្ថាប័ន រដ្ឋបាលថ្នាក់ក្រោមជាតិពិសេសខេត្តជាប់ព្រំដែនជាមួយប្រទេសវៀតណាម សមាគមអ្នកចិញ្ចឹមជ្រូក ផលិតករ អាជីវករ ដោយត្រូវរូមគ្នាអនុវត្តយ៉ាងខ្ជាប់ខ្ជួននូវខ្លឹមសារនៃសារាចរណែ ស្តីពីវិធានការបន្ទាន់ដើម្បីត្រួតពិនិត្យ និងទប់ស្កាត់ការឆ្លងរាលដាលជំងឺនេះជាបន្ទាន់។ជាមួយគ្នានេះប្រធានមន្ទីរ និងមន្ត្រីពេទ្យសត្វខេត្តទាំង ៧ដែលមានព្រំប្រទល់ជាប់ប្រទេសវៀតណាមត្រូវបង្កើនស្មារតីយកចិត្តទុកដាក់ ប្រុងប្រយ័ត្នខ្ពស់ដោយត្រូវអនុវត្តខ្លឹមសារាចរណែនាំឲ្យមានប្រសិទ្ធភាព»។
បន្ថែមពីនេះលោក វេង សាខុន ស្នើឲ្យភាគីពាក់ព័ន្ធស្វែងយល់ និងជួយផ្សព្វផ្សាយឲ្យបានទូលំទូលាយទៀតអំពីបញ្ហាប្រឈម ផលប៉ះពាល់មកលើសង្គម-សេដ្ឋកិច្ចជាតិ សុខុមាលភាពសាធារណៈ។ ជាពិសេសត្រូវពង្រឹងការធ្វើជីវសុវត្ថិភាពក្នុងកសិដ្ឋានចិញ្ចឹមសត្វ កន្លែងប្រមូលផ្តុំសត្វសត្តឃាតដ្ឋានឲ្យបានលល្អប្រសើរ និងរាយការណ៍អំពីស្ថានភាពខុសប្រក្រតីនៃជំងឺសត្វ និងសាច់សត្វឲ្យបានឆាប់រហ័សបំផុតដល់សមត្ថកិច្ចពាក់ព័ន្ធ។ ចំណែកគ្រប់តួអង្គពាក់ព័ន្ធ ត្រូវសហការជាមួយក្រុមហ៊ុន ដៃគូអភិវឌ្ឍន៍ជាតិនិងអន្តរជាតិទាំងអស់ រួមទាំងអង្គការសុខភាពសត្វពិភពលោក (OIE) អង្គការស្បៀងនិងកសិកម្មនៃសហប្រជាជាតិ (FAO) ដើម្បីស្វែងរកប្រភពថវិកា ក្នុងការរៀបចំទប់ស្កាត់ជំងឺទាំងនៅមុនពេលផ្ទុះ និងក្រោយផ្ទុះជំងឺក្នុងស្មារតីទទួលខុសត្រូវ ហើយត្រូវជៀសវាងការផ្សព្វផ្សាយខុសពីការពិតអំពីជំងឺនេះ ដែលនាំឲ្យប៉ះពាល់ដល់អ្នកចិញ្ចឹម សុខភាពសាធារណៈ និងសេដ្ឋកិច្ចជាតិ ។
ការចិញ្ចឹមជ្រូកជាលក្ខណៈគ្រួសារនៅកម្ពុជា នាឆ្នាំ២០១៨ មានប្រមាណជា ១,៩លានក្បាល និងជាលក្ខណៈឧស្សហកម្មប្រមាណជា ០,៨លានក្បាល និងមានកសិដ្ឋានគ្រប់កម្រិតជាង ៦៧០កសិដ្ឋាននៅទូទាំងប្រទេស។ បច្ចុប្បន្នការកែប្រែទម្លាប់ពីការចិញ្ចឹមជាលក្ខណៈគ្រួសារមកជាលក្ខណៈឧស្សាហកម្ម កំពុងរីកដុះដាលយ៉ាងលឿន ក្នុងរយ:ពេលប៉ុន្មានឆ្នាំចុងក្រោយនេះ ស្របពេលដែលសេដ្ឋកិច្ចជាតិមានការរីកចម្រើន គួប្សំកំណើនប្រជាជន និងកំណើនភ្ញៀវទេសចរណ៍ត្រូវការសាច់ ដែលជាកត្តាជំរុញឲ្យអ្នកចិញ្ចឹមជ្រូកយកចិត្តទុកដាក់គិតគូប្រើប្រាស់បច្ចេកវិទ្យាទាន់សម័យ ដើម្បីផលិតសាច់មានអនាម័យ និងគុណភាពឆ្លើយតបតាមតម្រូវការទីផ្សារ ។ ជាពិសេសលើកកម្ពស់ប្រសិទ្ធភាពផលិតកម្ម និងធានាសុខុមាលភាពសាធារណៈ។នេះបើតាមរដ្ឋមន្ត្រីក្រសួងកសិកម្ម។
ឆ្នាំ២០១៨ កម្ពុជាមានតម្រូវការសាច់ជ្រូកចំនួន១៥០ពាន់តោន។ ក្នុងនោះសត្វជ្រូកចិញ្ចឹមក្នុងស្រុកមានចំនួន២,៧លានក្បាលអាចផ្គត់ផ្គង់តម្រូវការក្នុងស្រុកបានជិត១០០ពាន់តោន និងចំនួន៥០ពាន់តោនទៀត ត្រូវបានចំណូលពីប្រទេសជិតខាង ពិសេសប្រទេសវៀតណាម។ នេះបើយោងតាមលោក ស្រី វុឌ្ឍី អ្នកនាំពាក្យក្រសួងកសិកម្ម ប្រាប់សារព័ត៌មានThmey Thmey៕
គួរបញ្ជាក់ថា ជំងឺប៉េស្តជ្រូកអាហ្វ្រិក បានផ្ទុះឡើងលើកដំបូងនៅឆ្នាំ១៩០៧ នៅប្រទេសកេនញ៉ា ហើយវាបានផ្ទុះឡើងជាបន្តបន្ទាប់ទៅតាមបណ្តាប្រទេសក្នុងទ្វីបអាហ្វ្រិក និងចុងក្រោយ ជំងឺនេះបានផ្ទុះឡើងនៅបណ្តាប្រទេសក្នុងទ្វីបអឺរ៉ុបក្នុងឆ្នាំ២០១៨ រួចបន្តរាលឆ្លងចូលក្នុងប្រទេសចិន ។បច្ចុប្បន្នជំងឺប៉េស្តជ្រូកអាហ្វ្រិកនេះ កំពុងបន្តរាលដាលតាមបណ្តាខេត្តមួយចំនួននៅប៉ែកខាងជើង និងកណ្តាលនៃប្រទេសវៀតណាម៕