ក្រុមប្រឹក្សាជាតិប្រាក់ឈ្នួល បានស្នើឲ្យវិស័យឯកជន ប្រើប្រាស់រូបិយវត្តុជាតិឲ្យបានច្រើនតាមរយៈការបើកប្រាក់ខែដល់បុគ្គលិករបស់ខ្លួនជាប្រាក់រៀល។ នេះជាការលើកឡើងរបស់លោក កាំង ម៉ូនិកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា និងជាសមាជិកក្រុមប្រឹក្សារប្រាក់ឈ្នួល នៅក្នុងខួបលើកទី៣៩ នៃការដាក់ឲ្យចរាចរប្រាក់រៀលឡើងវិញ នាព្រឹកថ្ងៃទី២៥ ខែមីនា ឆ្នាំ២០១៩នេះ។
លោក កាំង ម៉ូនិកា បានអះអាងថា បច្ចុប្បន្នសមាគមរោងចក្រកាត់ដេររបស់លោក មានសមាជិកប្រមាណ៦០០រោងចក្រ ដែលមានកម្មករជាង៧៤ម៉ឺននាក់ ក្នុងទំហំប្រាក់ឈ្នួលប្រមាណ៣ពាន់លានដុល្លារ ក្នុងមួយឆ្នាំ។ ដូច្នេះ ប្រទេសកម្ពុជា មិនមែនជាប្រទេសកសិកម្មទៀតទេ ខណៈវិស័យ កសិកម្ម ត្រូវបានជំនួសដោយវិស័យឧស្សហកម្ម និងសេវាកម្ម។
លោក កាំង ម៉ូនិកា បានបន្តថា ការបើកប្រាក់ខែឲ្យកម្មករនៅតាមបណ្តារោងចក្រទាំងនោះ ធ្វើឡើងជាប្រាក់ដុល្លារនៅឡើយ ដូច្នេះខាងលោក កំពុងចរចាជាមួយវិស័យឯកជនទាំងនោះ ឲ្យបើកប្រាក់ខែដល់កម្មករជាប្រាក់រៀល។ លោក បានបង្ហាញជំហរថា ខាងលោកបានគាំទ្រចំពោះការកំណត់ប្រាក់ឈ្នួលជាប្រាក់រៀន។
សមាជិកក្រុមប្រឹក្សាប្រាក់ឈ្នួលរូបនេះ និយាយយ៉ាងដូច្នេះថា៖«ក្នុងឆ្នាំថ្នីនេះ មានការផ្លាស់ប្តូរខ្លះតាមរយៈច្បាប់សម្រាប់កំណត់ប្រាក់ឈ្នួលអបរិមា យើង នឹងមានការបង្កើតក្រុមប្រឹក្សាជាតិប្រាក់ឈ្នួល ហើយខ្ញុំក៏បានក្លាយជាសមាជិកម្នាក់នៅក្នុងក្រុមចរចាប្រាក់ឈ្នួលនោះផងដែរ ហើយអ្វីដែលយើងបានស្នើសុំក្នុងរយៈពេល២ឆ្នាំចុងក្រោយនេះ គឺបានស្នើថាកំណត់ប្រាក់ឈ្នួលជារូបិយវត្តុជាតិរបស់យើង គឺជាប្រាក់រៀល។ ខ្ញុំគិតថា ចំណុចនេះ បើនិយាយជាមួយធនាគារជាតិប្រហែលជាមិនមានបញ្ហានោះទេ នឹងទទួលបាននូវការគាំទ្រច្រើន ប៉ុន្តែយើងប្រហែលត្រូវការពេលវេលាបន្តិចទៀត តាមដែលខ្ញុំគិតមើលទៅដើម្បីទាក់ទាញការគាំទ្របន្ថែមទៀតពីក្រសួងសេដ្ឋកិច្ច ប្រហែលក្រសួងគិតគូរវែងឆ្ងាយពីផលប៉ះពាល់ផ្នែកផ្សេងៗនៃសេដ្ឋកិច្ច។ ប៉ុន្តែជាទស្សនវិស័យរបស់យើងជាអ្នកវិនិយោគ គឺយើងបានគាំទ្រទៅលើការកំណត់ប្រាក់ឈ្នួលជាប្រាក់រៀលនេះ ប្រសិនបើអាច»។
លោក បានស្នើឲ្យប្រជាពលរដ្ឋកម្ពុជា និងអ្នកវិនិយោគគិនទាំងអស់នៅក្នុងប្រទេសកម្ពុជាពង្រឹងការប្រើប្រាស់បន្តែមទៀត។ ហើយចំពោះធនាគារជាតិពង្រឹងការគ្រប់គ្រងឲ្យកាន់តែមានប្រសិទ្ធភាពលើវិស័យហិរញ្ញវត្តុ និងជំរុញការអប់រំ និងផ្សព្វផ្សាយពីអត្ថប្រយោជន៍នៃប្រាក់រៀលឲ្យបានទូលំទូលាយ ដើម្បីលើកកម្ពស់មោទនៈជាតិខ្មែរ។
លោកស្រី នាវ ច័ន្ទថាណា ទេសាភិបាលរងធនាគារជាតិកម្ពុជា បានថ្លែងក្នុងខួបលើកទី៣៩ឆ្នាំនៃការដាក់ឲ្យប្រើប្រាស់ប្រាក់រៀលថា ធនាគារជាតិកម្ពុជា នឹងបន្តអនុវត្តគោលនយោបាយ និងវិធានការលើកកម្ពស់ការប្រើប្រាស់ប្រាក់រៀលបន្ថែមទៀត ដោយផ្អែកលើយន្តការទីផ្សារ ស្ថានភាពជាក់ស្ដែង។ លើសពីនេះ ធនាគារជាតិនិងសហការជាមួយនឹងភាគីពាក់ព័ន្ធលើការអនុវត្តការងារឲ្យកាន់តែមានប្រសិទ្ធភាព ស្របតាមគោលនយោបាយរបស់រាជរដ្ឋាភិបាល។
លោកស្រី បញ្ជាក់ថា៖«រូបិយវត្ថុ គឺជាតំណាងនៃអត្តសញ្ញាណជាតិ និងជាមោទនភាពជាតិសម្រាប់ប្រជាពលរដ្ឋកម្ពុជា។ លើសពីនេះ រូបិយវត្ថុ បានរួមចំណែកពង្រឹងឯករាជ្យភាពនៃសេដ្ឋកិច្ចជាតិផងដែរ»។
លោកស្រី បន្តទៀតថា ការប្រើប្រាស់ប្រាក់រៀល នឹងធ្វើឲ្យប្រទេសទទួលបានប្រាក់ចំណូលពីការបោះពុម្ពរូបិយវត្តុ ដែលធ្វើឲ្យថវិកានៃធនាគារជាតិកើនឡើង។
លោក ដុស ឌីន អគ្គនាយកគ្រឹះស្ថានមីក្រូហិរញ្ញវត្ថុអម្រិត បានអះអាងថា ស្ថាប័នរបស់លោកបានប្រើប្រាស់ប្រាក់រៀលជាគោល មានដូចជា ការកត់ត្រានានា ប្រាក់ខែ ប្រាក់លើកទឹកចិត្ត បុគ្គលិក ជាលុយរៀលទាំងអស់។ ហើយក្នុងពេលបច្ចុប្បន្ននេះ អម្រិតមានប្រាក់កម្ចីជាប្រាក់រៀលប្រមាណ២០ភាគរយ នៃកម្ចីសរុបរបស់ខ្លួន ដែលចំនួននេះលើសពីការកំណត់របស់ធនាគាជាតិទៀតផង។ លោក បន្តថា លោកនឹងជំរុញការប្រើប្រាស់ប្រាក់រៀលក្នុងស្ថាប័នរបស់ខ្លួន ឲ្យមានចំនួនច្រើនបន្ថែមទៀត។
លោកបាននិយាយបែបនេះថា៖«ដើម្បីចូលរួមក្នុងការលើកកម្ពស់ប្រាក់រៀល តាមរយៈគោលនយោបាយរបស់ធនាគារជាតិ ទី១ យើង នឹងបន្តអនុវត្តយន្តការដែលយើងមាន បញ្ជីការរបស់យើងទាំងស្រុងគឺកត់ត្រាជាប្រាក់រៀល ទី២ ការចំណាយក្នុងស្ថាប័ននឹងបន្តការប្រើប្រាស់ជាប្រាក់រៀល ហើយទី៣ យើងនឹងលើកទឹកចិត្តដល់អតិថិជនឲ្យងាកមកប្រើប្រាក់រៀល ក្នុងការកាត់បន្ថយហានិភ័យទៅលើការប្តូរប្រាក់»៕