ជាតិ
សាលារាជធានីជួបជាមួយវិនិយោគិនបារាំងដើម្បីស្វែករកដៃគូអភិវឌ្ឍន៍
× អាជ្ញាធរសាលារាជធានីបានជួបគ្នាជាមួយក្រុមហ៊ុនបារាំងជាច្រើននៅថ្ងៃទី២៦ខែមីនានៅក្នុងវេទិកាមួយដែលត្រូវបានរៀបចំដោយសភាពាណិជ្ជកម្ម និងឧស្សាហកម្មបារាំង នៅសណ្ឋាគារ Le Royal។ អភិបាលរងនៃសាលារាជធានីភ្នំពេញ លោក នួន ផារ័ត្ន បានលើកបង្ហាញបញ្ហាមួយចំនួនដែលសាលារាជធានីភ្នំពេញកំពុងដោះស្រាយសម្រាប់ការរស់នៅរបស់ពលរដ្ឋ ហើយដែលត្រូវការដៃគូរអភិវឌ្ឍន៍ពីវិស័យឯកជនផងដែរ។
គឺជាវេទិកា«ទីក្រុងប្រកបដោយចីរភាព» ដែលបានប្រមូលផ្តុំតំណាងអាជ្ញាធរសាលារាជធានីភ្នំពេញ និងក្រុមហ៊ុនឯកជនបារាំងជាច្រើនឱ្យមកស្តាប់អំពីគម្រោងអភិវឌ្ឍន៍ និងតម្រូវការជំនួយអភិវឌ្ឍន៍របស់សាលារាជធានីភ្នំពេញ ព្រមទាំងការជជែកពិភាក្សារកដំណោះស្រាយលើបញ្ហានានាដែលកំពុងកើតមាននៅក្នុងរាជធានីភ្នំពេញ។
អភិបាលរងនៃសាលារាជធានីភ្នំពេញលោក នួន ផារ័ត្ន បានរំឭកប្រាប់អ្នកចូលរួមក្នុងវេទិកាដែលភាគច្រើនមកពីវិស័យឯកជនរបស់បារាំង អំពីស្ថានភាពនៃកំណើនប្រជាសាស្ត្ររបស់ភ្នំពេញដែលមានប្រជាជនប្រមាណ៣លាននាក់ លើផ្ទៃដីរបស់រាជធានីដែលកើនដល់ជិត៧០០គីឡូម៉ែត្រការេក្នុងពេលបច្ច្បុបន្ន។ កំណើនប្រជាជន កំណើនយានយន្ត សុទ្ធតែបានបង្កើតឱ្យមានបញ្ហាដែលទាមទារឱ្យសាលារាជធានីភ្នំពេញត្រូវបន្តដោះស្រាយ។ នេះបើតាមការការលើកឡើងរបស់លោកអភិបាលរងរាជធានី ដែលស្វែងរកដំណោះស្រាយលើកង្វះខាតថាមពល គេហដ្ឋានសមរម្យ ការធ្វើប្រព្រឹត្តិកម្មទឹកស្អុយ(លូ) ការកែច្នៃសំរាម ការកកស្ទះចរាចរណ៍ និងការដោះស្រាយការគំរាមកំហែងទឹកជំនន់ទឹកភ្លៀងជាដើម។
នៅចំពោះមុខតំណាងវិស័យឯកជនបារាំងជាង១០០នាក់ លោក នួន ផារ័ត្ន បានថ្លែងយ៉ាងដូច្នេះ៖«ចំពោះមុខបញ្ហាប្រឈមទាំងអស់នេះ សាលារាជធានីភ្នំពេញមិនបាននៅស្ងៀមឡើយ។ យើងធ្វើការជាមួយរដ្ឋាភិបាលបារាំងដែលបានជួយយើងក្នុងការតាក់តែងប្លង់គោលប្រើប្រាស់ដីធ្លី ២០១៥-២០៣៥។ យើងអរគុណភ្នាក់ងារអភិវឌ្ឍបារាំង AFD ដែលបានជួយរដ្ឋាករទឹកក្នុងគម្រោងផលិតទឹកស្អាតបាក់ខែង។ ទាក់ទងនឹងការកកស្ទះចរាចរណ៍ យើងបានធ្វើការជាមួយ Jica ដើម្បីអភិវឌ្ឍប្លង់គោលនៃនៃការដឹកជញ្ជូនក្នុងក្រុង ហើយយើងបានសិក្សាជាមួយស្ថានទូតបារាំង ដើម្បីបង្កើតប្រព័ន្ធដឹកជញ្ជូនសាធារណៈដែលរួមមាន Tramway»។
យោងតាមការបញ្ជាក់របស់លោកអភិបាលរងរាជធានីដដែល ថ្វីដ្បិតដែលអាជ្ញាធររាជធានីបានដោះស្រាយបញ្ហាបានជាច្រើនក៏ដោយ តែវាមិនទាន់អស់នៅឡើយ។ «ជាមួយបញ្ហាប្រឈមទាំងនេះ វាក៏ជាកាលានុវត្តភាពសម្រាប់សហគ្រិន និងវិនិយោគិន ដែលមានបំណងវិនិយោគនៅក្នុងរាជធានីភ្នំពេញ។ យើងក៏ត្រូវដំណោះស្រាយចេញពីដៃគូ ដែលជាវិនិយោគិន»៕
© រក្សាសិទ្ធិដោយ thmeythmey.com