ជាតិ
ដំរីព្រៃ៧ក្បាល បង្ហាញខ្លួននៅស្រុកកែវសីមា ខេត្តមណ្ឌលគិរី រូបភាពបានពីទំព័រហ្វេសប៊ុក WCS
× ភ្នំពេញ៖ ដំរីព្រៃ៧ក្បាល ត្រូវបានប្រជាពលរដ្ឋប្រទះឃើញកំពុងដើរស្វែងរកស៊ីចំណីនិងផឹកទឹក នៅក្បែរភូមិ អូរអាម ក្នុងឃុំស្រែខ្ទុម ស្រុកកែវសីមា ខេត្តមណ្ឌលគីរី។ លោក ឌិន ប៊ុនធឿន អនុប្រធានមន្ទីរបរិស្ថានខេត្ត បាននិយាយថា ហ្វូងដំរីត្រូវបានគេប្រទះឃើញ តាំងពីថ្ងៃទី១៨មីនា ឆ្នាំ២០១៩មក។ លោក សន្និដ្ឋានថា គោលបំណងសំខាន់របស់ដំរីមកក្បែរភូមិនេះ គឺដើម្បីរកទឹកផឹក ព្រោះប្រភពទឹកភាគច្រើននៅតាមទីជម្រករបស់ដំរី អាចរីងហួតអស់ក្នុងអំឡុងរដូវប្រាំងនេះ។
ទំព័រហ្វេសប៊ុករបស់អង្គការ WCS Cambodia បានសរសេរពីសម្តីរបស់លោក ឌិន ប៊ុនធឿ កាលពីល្ងាចថ្ងៃទី ២៦មីនា វេលាម៉ោង៥:៤៥នាទី មានដំរី៣ក្បាល ក្នុងចំណោមដំរីទាំង៧ក្បាល បានដើរចូលមករកស៊ីចំណីកាន់តែជិតសាលាស្រុក ដែលចម្ងាយប្រហែលតែ៣០ម៉ែត្រ ប៉ុណ្ណោះពីក្រោយអគារ។ លោកបានបញ្ជាក់ថា ដំរីទាំងនោះតែងតែបង្ហាញខ្លួននៅក្បែរៗភូមិអ្នកស្រុកបីឆ្នាំកន្លងមកហើយ។ ប៉ុន្តែនេះជាលើកទីមួយ ដែលដំរីទាំងនោះចូលមកជិតភូមិរបស់អ្នកស្រុកជាងសព្វដង ដែលដំរីទាំងនោះមក គឺរកទឹកផឹក។
ការបង្ហាញខ្លួនជារៀងរាល់ឆ្នាំរបស់សត្វដំរីព្រៃទាំងនោះ បានឱ្យដឹងថាចំនួនសត្វដំរីព្រៃទាំងអស់នៅក្នុងដែនជម្រកសត្វព្រៃកែវសីមានោះ ទទួលបានការការពារយ៉ាងល្អ ក្រោមគម្រោងគាំទ្រព្រៃឈើនិងជីវចម្រុះ ដែលឧបត្ថម្ភមូលនិធិដោយទីភ្នាក់ងារអភិវឌ្ឍន៍អន្តរជាតិរបស់សហរដ្ឋអាមេរិក (USAID) ពីឆ្នាំ ២០១២ ដល់ ២០១៦ និងបន្តគាំទ្រក្នុងឆ្នាំ២០១៨-២០២១។
ជាមួយគ្នានេះ លោក ឌិន ប៊ុនធឿ ក៏បានសម្តែងការព្រួយបារម្ភផងដែរ ចំពោះការបង្ហាញខ្លួននូវហ្វូងដំរីទាំងនេះ ព្រោះប្រសិនបើពួកវាចូលដល់ទីប្រជុំជន ដែលមានមនុស្សរស់នៅច្រើន ហើយនៅពេដែលលមានមនុស្សទៅដេញ ឬគប់ពួកវា នោះនឹងនាំឱ្យដំរីទាំងនោះតតាំងជាមួយមនុស្សវិញ។ កាលពីឆ្នាំ២០១៨ ធ្លាប់មានសត្វដំរីមួយចំនួន តតាំងជាមនុស្ស នៅក្នុងភូមិចំនួន១១ ដែលបង្កឱ្យមានការខូចខាតដល់ផលដំណាំជាច្រើនដូច ស្រូវ ស្វាយចន្ទី និងចេក។
អនុប្រធានមន្ទីរបរិស្ថានរូបនេះ ក៏បានអំពាវនាវដល់ប្រជាពលរដ្ឋនៅពេលដែលទៅមើល ឬថតដំរីទាំងនោះ សូមកុំបង្កការរំខានដល់ពួកវា ដែលអាចមមានគ្រោះថ្នាក់នានា ព្រោះដំរីព្រៃទាំងនេះ បើមិនមានអ្នកទៅរំខានវាទេ វាក៏មិនធ្វើអ្វីដល់មនុស្សវិញដែរ។
បច្ចុប្បន្ននេះ តំបន់ដែនជម្រកសត្វព្រៃកែវសីមា បានក្លាយជាទីជម្រករបស់សត្វដំរីព្រៃអាស៊ីចំនួនប្រហែល ១១៥ក្បាល៕
Tag:
បរិស្ថាន
ព្រៃ
ដំរី
មណ្ឌលគិរី
© រក្សាសិទ្ធិដោយ thmeythmey.com