អន្តរជាតិ
លោក ស៊ី ជិនភីង ប្រាប់អឺរ៉ុបកុំឲ្យការសង្ស័យក្លាយជាឧបសគ្គ
× ទំនាក់ទំនងអឺរ៉ុប និងចិន ទោះមានភាពល្អប្រសើរក្ដី តែកើតមានមន្ទិលសង្ស័យច្រើនដែរ ជាពិសេសពីសំណាក់អឺរ៉ុបទៅលើចិន។ អឺរ៉ុបដែលចិនគិតថា មិនទាន់មានជំហរឯករាជ្យក្នុងទំនាក់ទំនងទ្វេភាគី នៅតែប្រុងប្រយ័ត្នច្រើនដដែល ហើយជារឿយៗក៏រិះគន់ចិនលើគំនិតផ្ដួចផ្ដើមខ្សែក្រវាត់មួយ និងវិថីមួយ ហើយមានជំហរប្រឆាំងកាអភិវឌ្ឍប្រព័ន្ធទូរគមនាគមន៍នៅអឺរ៉ុបដោយក្រុមហ៊ុនចិនផង។ ប្រធានាធិបតីចិន ស៊ី ជិនភីង ប្រាប់អឺរ៉ុបឲ្យជម្នះការសង្ស័យទាំងនេះ ហើយដើរឆ្ពោះទៅមុខទាំងអស់គ្នា។
ប្រធានាធិបតីចិន ស៊ី ជិនភីង បានជួបជាមួយមេដឹកនាំធំៗរបស់អឺរ៉ុបអំឡុងពេលស្នាក់នៅទឹកដីបារាំងដែលជាគោលដៅចុងក្រោយនៃដំណើរទស្សនកិច្ចតំបន់អឺរ៉ុប។ ទស្សនកិច្ចរបស់លោក ស៊ី ធ្វើឡើងស្របពេលដែលអឺរ៉ុបកំពុងរសាប់រសល់កាន់ខ្លាំងលើឥទ្ធិពលរបស់ចិនរហូតដល់ចាត់ទុកចិនជាគូប្រជែងយុទ្ធសាស្ត្ររបស់ខ្លួនផង។ ជំហរប្រឆាំងក្រុមហ៊ុនបច្ចេកវិទ្យាចិនរបស់អាមេរិក រឹតតែធ្វើឲ្យអឺរ៉ុបគិតមុខគិតក្រោយកាន់តែខ្លាំងថែមទៀតក្នុងទំនាក់ទំនងជាមួយដៃគូពាណិជ្ជកម្មដ៏ធំមួយនេះ។
យ៉ាងណាមិញ នាជំនួបនៅរដ្ឋធានីប៉ារីស មេដឹកនាំចិន និងអឺរ៉ុបហាក់ផ្ដល់ការធានាឲ្យគ្នាទៅមកដើម្បីជំរុញកិច្ចសហប្រតិបត្តិការសេដ្ឋកិច្ច។ នាសន្និសីទសារព័ត៌មានថ្ងៃទី២៦ ខែមីនា លោក ស៊ី លើកឡើងថា ចិននិងអឺរ៉ុប រីកចម្រើនជាមួយគ្នា ដូចនេះមិនគួរកើតមានក្ដីសង្ស័យដែលនាំឲ្យភាគីទាំងពីរមើលទៅក្រោយវិញឡើយ។ លោក ស៊ី ទទួលស្គាល់ថា ចិននិងអឺរ៉ុបពិតជាមានភាពខុសគ្នា ហើយប្រកួតប្រជែងគ្នាមែន តែវាជាការប្រកួតបែបវិជ្ជមាន។
ដំណើរទស្សនកិច្ចរបស់លោក ស៊ី ពេលនេះ គ្របដណ្ដប់ដោយការបារម្ភរបស់អឺរ៉ុបលើការវិនិយោគរបស់ចិននៅក្នុងតំបន់ដ៏ធំនេះ ពិសេសគំនិតផ្ដួចផ្ដើមខ្សែក្រវាត់ និងវិថីតែម្ដង។ ប៉ុន្តែលោកប្រធានាធិបតីចិន បានប្រាប់សមភាគីបារាំង អេម៉ានុយអែល ម៉ាក្រុង, អធិការបតីអាល្លឺម៉ង់ អែនជែឡា មឺហ្គែល និងប្រធានគណៈកម្មការអឺរ៉ុប ហ្សង់-ក្លូដ ចាំងគើ ថា សម្រាប់ចិន និងអឺរ៉ុប កិច្ចសហប្រតិបត្តិការជារឿងសំខាន់ ហើយអញ្ជើញរដ្ឋអឺរ៉ុបឲ្យចូលរួមជាមួយគម្រោងនេះទៀតផង។
ក្នុងសន្និសីទសារព័ត៌មានរួមគ្នា មេដឹកនាំអឺរ៉ុបស្នើឲ្យចិនកែប្រែឥរិយាបថរកស៊ីរបស់ខ្លួនដូចដែលអឺរ៉ុបធ្វើដាក់ក្រុមហ៊ុនចិន និងគោរពគេឯង។ លោក ម៉ាក្រុង និយាយថា អឺរ៉ុបគោរពចិន ឯចិនត្រូវគោរពគំនិតរួបរួមគ្នារបស់អឺរ៉ុបវិញដែរ។ ចំណែកលោកស្រី មឺហ្គែល ដែលមានបំណងចូលរួមក្នុងគម្រោងផ្លូវសូត្ររបស់ចិននោះ ចង់ឃើញពាណិជ្ជកម្មរវាងអឺរ៉ុប និងចិនមានចលនាទៅមក ដែលចរន្តនេះមិនទាន់មានខ្លាំងនៅឡើយទេ។
នៅដើមខែនេះ អឺរ៉ុបហៅចិនជាគូប្រជែងយុទ្ធសាស្ត្រក្នុងសៀវភៅគោលនយោបាយរបស់ខ្លួន។ លោក ចាំងគើ ទទួលស្គាល់ថា ពាក្យនេះធ្វើឲ្យចិនសង្កៀរត្រចៀក ប៉ុន្តែវាគ្រាន់តែជាពាក្យសរសើរប៉ុណ្ណោះ។ យ៉ាងណា ប្រធានគណៈកម្មការអឺរ៉ុបររូបនេះចង់ឃើញការផ្លាស់ប្ដូររវាងភាគីទាំងពីរមានតុល្យភាព។ លោកអះអាងថា ក្រុមហ៊ុនអឺរ៉ុបត្រូវតែទទួលបានការបើកចំហដូចដែលក្រុមហ៊ុនចិនទទួលបាននៅអឺរ៉ុបដូច្នោះដែរ៕
Tag:
ចិន
អឺរ៉ុប
បារាំង
ស៊ី ជិនភីង
© រក្សាសិទ្ធិដោយ thmeythmey.com