អន្តរជាតិ
អាមេរិកសោកស្តាយ ក្រោយអ៊ីតាលីចូលរួមក្នុងគម្រោងផ្លូវសូត្រថ្មីរបស់ចិន លោករដ្ឋមន្ត្រីការបរទេស Mike Pompeo (រូបថត៖ AFP)
× រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានបង្ហាញការខកចិត្ត ក្រោយអ៊ីតាលីបានសម្រេចចិត្តចូលរួមក្នុងគម្រោងហេដ្ឋារចនាសម្ព័ន្ធដ៏ធំរបស់ចិន ដែលត្រូវស្គាល់ថា «គំនិតផ្តួចផ្តើមខ្សែក្រវាត់និងវិថី» ។ ប្រមុខការទូតអាមេរិករូបនេះ លើកឡើងថា អ្នកដែលខាតបង់ធំបំផុតក្នុងការសម្រេចចិត្តនេះ គឺជាប្រជាជនអ៊ីតាលី។
អំឡុងទស្សនកិច្ចរបស់ប្រធានាធិបតីចិន ស៊ី ជិនភីង ក្នុងប្រទេសអ៊ីតាលី កាលពីថ្ងៃទី២៣ ខែមីនា រដ្ឋាភិបាលទីក្រុងរ៉ូម បានចុះហត្ថលេខាលើអនុស្សារណៈយោគយល់គ្នាមួយជាមួយភាគីចិន ដើម្បីចូលរួមក្នុង «គម្រោងផ្លូវសូត្រថ្មី» ។ ជាមួយកិច្ចព្រមព្រៀងនេះ អ៊ីតាលី ក្លាយជាប្រជាជាតិទីមួយក្នុងចំណោមក្រុមប្រទេសដែលមានសេដ្ឋកិច្ចជឿនលឿនទាំង៧ (G7) ដែលគាំទ្រជាផ្លូវការនូវគម្រោងហេដ្ឋារចនាសម្ព័ន្ធខ្ទង់រយពាន់លានដុល្លាររបស់ចិន។
ថ្លែងចំពោះមុខគណៈកម្មាធិការកិច្ចការបរទេសព្រឹទ្ធសភាអាមេរិក នៅថ្ងៃទី២៧ ខែមីនា លោក ម៉ៃ ប៉ុមប៉េអូ បានគូសបញ្ជាក់ថា វាជារឿងសោកស្តាយបំផុតកាលណា ដែលប្រទេសណាមួយផ្សាភ្ជាប់ទំនាក់ទំនង និងបង្កើតសកម្មភាពពាណិជ្ជកម្មជាមួយចិន ដែលពុំមានភាពស្មោះត្រង់។ ប្រមុខការទូតអាមេរិកបន្តថា៖«យើងខកចិត្តព្រោះយើងគិតថា ប្រជាជនដែលរស់នៅក្នុងបណ្តាប្រទេសទាំងនោះ គឺជាអ្នកខាតបង់ធំបំផុត»។
គំនិតផ្តួចផ្តើមខ្សែក្រវាត់និងវិថី ឬហៅកាត់ថា BRI មានគោលបំណងស្នូលក្នុងការកសាងចំណងសេដ្ឋកិច្ច និងជំរុញការធ្វើពាណិជ្ជកម្មអន្តរជាតិ តាមរយៈការសាងសង់ហេដ្ឋារចនាសម្ព័ន្ធសំដៅបង្កើតការតភ្ជាប់ពីអាស៊ីទៅអឺរ៉ុប ឆ្លងទៅដល់អាហ្វ្រិក។ រដ្ឋាភិបាលក្រុងប៉េកាំង ចាត់ទុកគម្រោងនេះជា «ស្ថានភាពឈ្នះ-ឈ្នះ»។ ហើយគិតចាប់ពីឆ្នាំ២០១៣ មកដល់ពេលបច្ចុប្បន្ននេះ គំនិតផ្តួចផ្តើមនេះមានការចូលរួមពីបណ្តាប្រទេសនានាលើពិភពលោកច្រើនជាង ៦៥ មានទាំងអាស៊ី, អាហ្វ្រិក និងអឺរ៉ុបផងដែរ។
យ៉ាងណាមិញ ទាក់ទិននឹងគម្រោងដ៏មហិមារបស់ក្រុងប៉េកាំងក្រោមអាណត្តិលោក ស៊ី ជិនភីង នេះ លោក ប៉ុមប៉េអូ យល់ឃើញថា ចិនកំពុងអនុវត្ត «គោលនយោបាយអន្ទាក់បំណុល» ដោយប្រើប្រាស់សហគ្រាស និងក្រុមហ៊ុនរដ្ឋរបស់ខ្លួន ក្នុងគោលដៅសម្លឹងរកផលប្រយោជន៍ខ្លួនតែមួយប៉ុណ្ណោះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ៕
Tag:
សហរដ្ឋអាមេរិក
ចិន
អ៊ីតាលី
BRI
© រក្សាសិទ្ធិដោយ thmeythmey.com