ថ្ងៃទី២៩ ខែមីនា ឆ្នាំ២០១៩ គេ នឹងបានឮការប្រកាសរបស់រដ្ឋាភិបាលកម្ពុជា ស្តីពីការធ្វើកំណែទម្រង់ជាកញ្ចប់។ គោលដៅដ៏សំខាន់នៃការដាក់ចេញនូវយុទ្ធសាស្ត្រនិងកំណែទម្រង់នេះ គឺដើម្បីធ្វើឲ្យសេដ្ឋកិច្ចកម្ពុជា មានឯករាជ្យភាព ហើយអាចរស់ដោយខ្លួនឯង ដោយលែងពឹងផ្អែកលើប្រទេសដទៃ។
ការប្រឹងប្រែងរបស់រដ្ឋាភិបាល ក្នុងការពង្រឹងសេដ្ឋកិច្ចនេះ គឺកើតឡើងក្នុងកាលៈទេសៈដែលកម្ពុជាប្រឈមនឹងការបាត់បង់ប្រព័ន្ធអនុគ្រោះពន្ធ EBA របស់សហភាពអឺរ៉ុប និង ប្រព័ន្ធអនុគ្រោះពន្ធ GSP របស់សហរដ្ឋអាមេរិក។ សម្តេចនាយករដ្ឋមន្ត្រី ហ៊ុន សែន ប្រកាសថា កម្ពុជា មិនត្រូវបន្តឲ្យសហភាពអឺរ៉ុប និង សហរដ្ឋអាមេរិក យកប្រព័ន្ធអនុគ្រោះពន្ធទាំងនេះ មកព្រមានជាដដែលៗ ហើយបង្គាប់ឲ្យធ្វើនេះ-ធ្វើនោះទៀតឡើយ។ សម្តេចនាយករដ្ឋមន្ត្រី បន្តថា កម្ពុជា ក៏មិនមែនគិតតែពីសុំជំនួយពីបរទេសទាំងអស់ដែរ។
ក្នុងពិធីចែកសញ្ញាបត្រដល់គរុសិស្សនិងសិស្សនៃវិទ្យាស្ថានជាតិអប់រំ កាលថ្ងៃទី២៧ ខែមីនា ឆ្នាំ២០១៩ ប្រមុខរដ្ឋាភិបាល បានប្រកាសយ៉ាងដូច្នេះថា៖«យើងធ្វើនេះ គឺគិតតែពីកម្លាំងខ្លួនឯង ធ្វើឲ្យក្លាយទៅជាប្រទេស ដែលមានការអភិវឌ្ឍមួយ ដោយមិនពឹងពាក់ [គេ] ដោយមិនគិតថាខ្លួន មានភាពអនុគ្រោះពីអ្នកណាទាំងអស់ ដើម្បីកុំឲ្យប្រទេសរបស់យើង ត្រូវទទួលរងការប្រមាថ....។ [....] អាចថា ថ្ងៃសុក្រ គឺជាថ្ងៃហត់នឿយ ដើម្បីឧទ្ទេសនាម អំពីកំណែទម្រង់ជាកញ្ចប់ ដោយក្នុងនោះ រាប់ទាំងថវិកាផងដែរថា [ត្រូវត្រៀមប៉ុន្មាន] ដើម្បីធ្វើអន្តរាគមន៍»។
សម្តេចនាយករដ្ឋមន្ត្រី លើកឡើងជាថ្មីថា មុននិងក្រោយ-យូរនិងឆាប់ ប្រព័ន្ធអនុគ្រោះពន្ធ គង់តែត្រូវគេដកចេញទេ នៅពេលសេដ្ឋកិច្ចកម្ពុជា ឈានដល់កម្រិតល្អប្រសើរ។ សម្តេចនាយករដ្ឋមន្ត្រី បង្ហាញពីជំហររឹងមាំថា ទោះប្រព័ន្ធអនុគ្រោះពន្ធ ត្រូវបានដកចេញនាពេលខាងមុខ កម្ពុជា នៅតែមានទំនាក់ទំនងនិងរកស៊ីជាមួយបណ្តាប្រទេសលើសាកលលោកដដែល។ សម្តេចនាយក បញ្ជាក់ថា៖«គេបង់ពន្ធឲ្យយើង យើងបង់ពន្ធឲ្យគេ តែប៉ុណ្ណឹង»។
មេដឹកនាំកម្ពុជា ប្រាប់សាធារណជនថា ធុញទ្រាន់នឹងសហគមន៍អន្តរជាតិ ដែលតែងយកប្រព័ន្ធអនុគ្រោះពន្ធនិងជំនួយ មកដាក់សម្ពាធកម្ពុជា។ មេដឹកនាំរូបនេះ ថ្លែងថា៖«ត្រូវរុញច្រានសេដ្ឋកិច្ចរបស់យើងឲ្យមានកំណើន។ [....] កុំឲ្យគេនិយាយតទៅទៀតថា អញឲ្យអានេះ អ្នកឯង ត្រូវធ្វើតាមអញ អ្នកឯងមិនធ្វើតាមអញ អញដកចេញ។ កុំឲ្យគេប្រើភាសាហ្នឹងតទៅទៀតជាមួយយើង អ៊ីចឹងទាល់តែយើងឯករាជ្យ [ខាងសេដ្ឋកិច្ច]»។
ប្រមុខរដ្ឋាភិបាល ឆ្លៀតលើកពីគុណសម្បត្តិរបស់ខ្លួនថា កម្ពុជា នៅតែរស់និងបន្តទៅមុខ ទោះជាត្រូវបរទេសមួយចំនួន ធ្លាប់ហ៊ុមព័ទ្ធសេដ្ឋកិច្ចនិងនយោបាយ នាពេលកន្លងមក៏ដោយ។ ប្រមុខរដ្ឋាភិបាល និយាយាថា៖«ហ៊ុន សែន នឹងបន្តដឹកនាំសេដ្ឋកិច្ចនេះ ឲ្យរស់រវើក»។
លោក ផៃ ស៊ីផាន អ្នកនាំពាក្យរដ្ឋាភិបាល ប្រាប់សារព័ត៌មានថ្មីៗថា កំណែទម្រង់នេះ គឺជាកំណែទម្រង់ជាកញ្ចប់និងមានលក្ខណៈស៊ីជម្រៅ។ ប៉ុន្តែ លោក ពុំទាន់អាចបំភ្លឺលម្អិតជាមុនបានទេថា កំណែទម្រង់ដ៏សំខាន់នេះ ផ្តោតទៅលើអ្វីនិងមានលក្ខណៈយ៉ាងដូចម្តេច ដោយលោក ប្រាប់ឲ្យរង់ចាំមើលការប្រកាសរបស់ប្រមុខរដ្ឋាភិបាលតែម្តង។
ថ្មីៗនេះ ប្រមុខរដ្ឋាភិបាលកម្ពុជា បានដាក់ចេញនូវយុទ្ធសាស្ត្រមួយ គឺ «កែទម្រង់ខាងក្នុង បង្កើនមិត្តខាងក្រៅ»។ ស្របពេលជាមួយគ្នានេះ ប្រមុខរដ្ឋាភិបាល ក៏បានអនុវត្តអភិក្រមទី៥ផងដែរ ដើម្បីវះកាត់មន្ត្រីរាជការ។ ឈានចូលឆ្នាំ២០១៩ មានមន្ត្រីនិងកម្លាំងប្រដាប់អាវុធមួយចំនួន ត្រូវបានដកចេញពីតំណែង ដោយសារទង្វើមិនគប្បីរបស់ពួកគេ។
លើសពីនេះ ប្រមុខរដ្ឋាភិបាល ថែមទាំងលុបបំបាត់ស្ថាប័នមួយចំនួន ដែលយល់ថាមិនសូវចាំបាច់ ដើម្បីឲ្យការងារកាន់តែមានប្រសិទ្ធភាពខ្ពស់ និងជាចំណែកមួយដែលធ្វើឲ្យសេដ្ឋកិច្ចមានការអភិវឌ្ឍ។ កាំសាប ត្រូវបានលុបចោលទាំងស្រុង ឯ កាំកុងត្រូល ត្រូវបានលុបចោលនៅតាមបណ្តាព្រំដែននិងតាមកំពង់ផែ។
ចំណែក ការិយាល័យនានា ដែលតំណាងឲ្យក្រសួងនៅតាមក្រុង-ស្រុក-ខណ្ឌ ត្រូវបានដកចេញ ហើយបញ្ចូលទៅក្នុងរចនាសម្ព័ន្ធរបស់រដ្ឋបាលក្រុង-ស្រុក-ខណ្ឌវិញ។ លើកលែងតែការិយាល័យអប់រំ សុខាភិបាល និងនគរូបនីយកម្មប៉ុណ្ណោះ ដែលត្រូវរក្សាទុក។
បច្ចុប្បន្ន កំណើនសេច្ឋកិច្ចកម្ពុជា បានកើនឡើងដល់៧,៥ភាគរយ។ រដ្ឋាភិបាល រំពឹងថា កម្ពុជា នឹងឈានពីប្រទេស ដែលមានប្រាក់ចំណូលមធ្យមកម្រិតទាប ទៅជាប្រទេស មានប្រាក់ចំណូលមធ្យមកម្រិតខ្ពស់នៅឆ្នាំ២០៣០។ បើតាមប្រមុខរដ្ឋាភិបាល បច្ចុប្បន្ន ភាពក្រីក្រនៅកម្ពុជា នៅសល់តែប្រមាណ១០ភាគរយប៉ុណ្ណោះ៕