អន្តរជាតិ
កងទ័ពថៃ ប្រកាសគោរពតាមរដ្ឋាភិបាលថ្មី ទោះនរណាធ្វើនាយករដ្ឋមន្ត្រីក៏ដោយ ឆ្វេងទៅស្ដាំ៖ លោក Chaiyapruk Ditsayasarin មេទ័ពជើងអាកាស, លោក Apirat Kongsompong មេទ័ពជើងគោក, លោក Luechai Ruddit មេទ័ពជើងទឹក, លោក Chakthip Chaichinda មេប៉ូលិសជាតិ ឈរអមលោក Pornpipat Benyasri (មុខ)។ រូបភាព thainews.prd.go.th
× លទ្ធផលមិនផ្លូវការនៃការបោះឆ្នោតនៅថៃបង្ហាញថា បក្សកម្លាំងប្រជារាស្ត្រដែលគាំទ្រលោក ប្រាយុទ្ធ ចន្ទអូចា មានសំឡេងប្រទាញប្រទង់ជាមួយបក្សភឿថៃដែលស្និទ្ធអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ ។ បក្សទាំងពីរកំពុងតែប្រមូលកម្លាំងដើម្បីបង្កើតរដ្ឋាភិបាលចម្រុះមួយ។ ក្នុងស្ថានភាពមិនដាច់ស្រេចនេះ កម្លាំងប្រដាប់អាវុធថៃ នៅថ្ងៃទី២៨ ខែមីនា ប្រកាសថា ខ្លួននឹងគោរពតាមរដ្ឋាភិបាលថ្មី ទោះមកពីបក្សណាក៏ដោយ។
ស្របពេលដែលបក្សនយោបាយកំពុងញាប់ដៃក្នុងការបង្កើតរដ្ឋាភិបាលនោះ កងទ័ពថៃបានចេញមកប្រកាសជំហររបស់ខ្លួនដែរ។ នាយឧត្តមសេនីយ៍ Pornpipat Benyasri អគ្គមេបញ្ជាការកងទ័ពថៃ និយាយថា យោធានឹងដើរតាមរដ្ឋាភិបាលថ្មី ដោយមិនខ្វល់ពីនិន្នាការឡើយ ប៉ុន្តែចង់ឃើញមនុស្សល្អដឹកនាំប្រទេស។ លោកនិយាយបែបនេះ ក្រោយជំនួបជាមួយមេទ័ពសំខាន់ៗរបស់ប្រទេស និងស្នងការប៉ូលិសជាតិថៃផងនៅឯទីបញ្ជាការកងពលថ្មើរជើងលេខ១១ ក្នុងទីក្រុងបាងកក។
ក្នុងសន្និសីទសារព័ត៌មានថ្ងៃទី២៨ ខែមីនា ឧត្តមសេនីយ៍ Pornpipat ដែលឈរអមដោយមេទ័ពជើងគោក ជើងទឹក ជើងអាកាស និងមេប៉ូលិសជាតិផងនោះ បញ្ជាក់ថា កងទ័ពគ្មានតួនាទីអ្វីក្នុងការបង្កើតរដ្ឋាភិបាលឡើយ ព្រោះជារឿងរបស់អ្នកនយោបាយ។ កងទ័ពថៃនឹងបម្រើការងារតាមការចង្អុលបង្ហាញរបស់រដ្ឋាភិបាលថ្មី ហើយការងារសំខាន់របស់កងទ័ព គឺការពារអធិបតេយ្យជាតិ រក្សាសន្តិភាព និងស្ថិរភាពក្នុងប្រទេស។
យ៉ាងណាមិញ មេទ័ពរូបនេះអះអាងថា អ្វីដែលកងទ័ពបារម្ភនោះ គឺការនាំយកមនុស្សល្អដើម្បីដឹកនាំប្រទេសតាមមាគ៌ារបស់អតីតមហាក្សត្រភូមិបុល អាឌុលយ៉ាដេត ។ ប៉ុន្តែលោកមិនបាននិយាយឲ្យច្បាស់ទេថា នរណាជាមនុស្សល្អដែលត្រូវដឹកនាំរដ្ឋាភិបាលនោះ។
នៅពេលត្រូវបានអ្នកកាសែតសួរថា បើលោក ប្រាយុទ្ធ ចន្ទអូចា មេដឹកនាំរដ្ឋប្រហារឆ្នាំ២០១៤ មិនអាចបង្កើតរដ្ឋាភិបាលបាននោះ ឧត្តមសេនីយ៍ Pornpipat ឆ្លើយវិញថា កងទ័ពថៃអាចធ្វើការឲ្យគ្រប់រដ្ឋាភិបាលទាំងអស់ មិនអាស្រ័យលើនរណាជានាយករដ្ឋមន្ត្រីឡើយ។ នេះបើតាមការផ្សាយរបស់កាសែតថៃ The Nation ។
សូមបញ្ជាក់ថា ក្នុងលទ្ធផលមិនផ្លូវការដែលប្រកាសនៅថ្ងៃទី២៨ ខែមីនា បក្សកម្លាំងប្រជារាស្ត្រដែលគាំទ្រលោក ប្រាយុទ្ធ ធ្វើជានាយករដ្ឋមន្ត្រី មានសំឡេងគាំទ្រច្រើនជាងគេ មានចំនួនជាង៨,៤លានសំឡេង ខណៈបក្សភឿថៃស្ថិតនៅលំដាប់ទីពីរ គឺ៧,៩លានសំឡេង។ ប៉ុន្តែបើគន់គូរជាកៅអីសភាវិញ បក្សភឿថៃទទួលបានច្រើនជាងបក្សកម្លាំងប្រជារាស្ត្រ។ ការណ៍នេះត្រូវបានបក្សទាំងពីរយកទៅបកស្រាយខុសគ្នាដើម្បីឈានទៅបង្កើតរដ្ឋាភិបាល។
បក្សភឿថៃ បានប្រមូលកម្លាំងបក្សនយោបាយចំនួន៧រួចហើយដើម្បីបង្កើតរដ្ឋាភិបាលចម្រុះថ្មី ប៉ុន្តែនៅខ្វះសំឡេងច្រើនទៀតដើម្បីកាន់កាប់តំណែងនាយករដ្ឋមន្ត្រី។ ឯបក្សកម្លាំងប្រជារាស្ត្រវិញក៏កំពុងអន្ទងបក្សផ្សេងទៀតដែរ ប៉ុន្តែបក្សនេះមានលទ្ធភាពច្រើនជាងគូប្រជែងរបស់ខ្លួនក្នុងការស្នើបេក្ខភាពរបស់ខ្លួន គឺលោក ប្រាយុទ្ធ ឲ្យអង្គុយកៅអីនាយករដ្ឋមន្ត្រី ព្រោះមានការគាំទ្រពីសមាជិកព្រឹទ្ធសភាដែលតែងតាំងដោយរបបយោធា៕
Tag:
ថៃ
ប្រាយុទ្ធ ចន្ទអូចា
Pornpipat Benyasri
© រក្សាសិទ្ធិដោយ thmeythmey.com