ជាតិ
សេដ្ឋកិច្ច
ប្រមុខរដ្ឋាភិបាល ណែនាំឲ្យឈប់ស្កេនទំនិញកុងតឺន័រចូលកំពង់ផែ លើកលែងតែសង្ស័យ
× ភ្នំពេញ៖ ប្រមុខរដ្ឋាភិបាលសម្ដេច ហ៊ុន សែន ណែនាំឲ្យបញ្ឈប់ការស្កេនទំនិញលើកដាក់កំពង់ផែ តទៅទៀត ដើម្បីចំណេញពេលវេលាដល់វិស័យឯកជន។ ការស្កេន ត្រូវធ្វើឡើងសម្រាប់តែករណីសង្ស័យចំពោះកុងតឺន័រនៃទំនិញនាំចូលណាមួយប៉ុណ្ណោះ ហើយចំពោះទំនិញនាំចេញ ត្រូវស្កេនដរាបណាមានការតម្រូវពីប្រទេសទទួលទិញណាមួយ។
ប្រសាសន៍សម្ដេច ហ៊ុន សែន ៖
សម្ដេចណែនាំដូច្នេះថា៖«ខ្ញុំសុំផ្ដល់អនុសាសន៍បន្ថែមទៀត ឧទាហរណ៍ថា ១០០កុងតឺន័រ (រង់ចាំស្កេន) ហើយយើងសង្ស័យថាមានតែមួយ ឬពីរកុងតឺន័រ តែប៉ុណ្ណោះដែលមានហានិភ័យ ដូចនេះយើងអាចយកតែពីរកុងតឺន័រប៉ុណ្ណោះយកមកស្កេន ឯ៩៨កុងតឺន័រទៀតឲ្យទៅផុតទៅកុំស្កេនអ្វីទៀត ហើយបើគ្មានការសង្ស័យណាមួយទេ មិនចាំបាច់ស្កេនអ្វីទាំងអស់។ ខ្ញុំមិនជឿគេនាំគ្រាប់បែកចូលស្រុកខ្មែរទេ ហើយបើមានក៏ប្រហែលគេមិនឲ្យដាក់លើកប៉ាល់ដែរ។ ដូចនេះសូមធ្វើរឿងនេះ ព្រោះកន្លងទៅ យើងមិនដែលស្កេនឃើញអ្វីទេ»។
រីឯការនាំចេញ គឺត្រូវស្កេនតែកុងតឺន័រនាំចេញទៅប្រទេសណា ដែលគេតម្រូវឲ្យស្កេនប៉ុណ្ណោះ។ នេះបើតាមប្រសាសន៍សម្ដេចនាយករដ្ឋមន្ត្រី។
តែសម្ដេចបញ្ជាក់ថា តម្លៃស្កេនកុងតឺន័រចេញចូលកំពង់ផែ ត្រូវគិតកម្រៃ ពោលគឺអ្នកនាំចេញនាំចូល ជាប់បន្ទុកកម្រៃសេវា តែចំណេញពេលដោយមិនរង់ចាំការស្កេន។ ជាមួយគ្នានេះ ចាប់ពីថ្ងៃទី១ខែមេសាខាងមុខនេះ ការបញ្ចុះកម្រៃស្កេនត្រូវចូលជាធរមាន។ សម្រាប់កុងតឺន័រ ២០ហ្វីត ត្រូវបញ្ចុះពី ២០ដុល្លារមកត្រឹម ១០ដុល្លារ ខណៈកុងតឺន័រ ៤០ហ្វីតបញ្ចុះពី ៣២ មក១៦ដុល្លារ៕
© រក្សាសិទ្ធិដោយ thmeythmey.com