ភ្នំពេញ៖ ប្រមុខរដ្ឋាភិបាលបានអះអាងថា វិស័យឯកជនចំណេញប្រមាណ ៤០០លានដុល្លារអាមេរិកក្នុងមួយឆ្នាំ តាមរយៈកំណែទម្រង់របស់រដ្ឋាភិបាលក្នុងពេលថ្មីៗនេះ។ សម្ដេចបានថ្លែងពីកំណែទម្រង់នេះក្នុងវេទិការដ្ឋាភិបាល និងវិស័យឯកជន នៅថ្ងៃទី២៩ខែមីនានេះ។
ក្នុងពេលថ្មីៗនេះ រដ្ឋាភិបាលបានធ្វើកំណែទម្រង់សេដ្ឋកិច្ច តាមរយៈការកាត់បន្ថយថ្លៃចំណាយរបស់វិស័យឯកជន ដើម្បីអាចឲ្យការធ្វើពាណិជ្ជកម្មរបស់កម្ពុជាអាចប្រកួតប្រជែងលើទីផ្សារអន្តរជាតិ ឬទប់ទល់ស្ថានភាពនៃការមិនផ្ដល់អនុគ្រោះពន្ធរបស់គេ។
រដ្ឋាភិបាលបានដកតួនាទីកាំកុងត្រូលពីច្រកនាំចេញទំនិញនានា និងលុបចោលភ្នាក់ងារនាំនាវាចូលផែ កាំសាប។ រដ្ឋាភិបាលបានលុបចោលការចេញវិញ្ញាបនបត្របញ្ជាក់ដើមកំណើតទំនិញ (CO) សម្រាប់ប្រទេសដែលមិនមានតម្រូវការ CO ដែលធ្វើឲ្យវិស័យឯកជនចំណេញទាំងពីការបង់កម្រៃផ្លូវការ និងក្រៅផ្លូវការ។
សំខាន់មួយទៀត គឺការបញ្ចុះតម្លៃឡូជីស្ទីក។ សម្ដេចបានបញ្ជាក់ថាការយល់ព្រមបញ្ចុះកម្រៃរបស់កំពង់ផែស្វយ័តព្រះសីហនុ កំពង់ផែស្វយ័តភ្នំពេញ និងក្រុមហ៊ុននាវាចរមួយចំនួន គឺគិតជាទឹកប្រាក់មានចំនួនប្រមាណ ៦,៧លានដុល្លារ។ ហើយការបញ្ចុះកម្រៃផែ និងក្រុមហ៊ុនដឹកជញ្ជូនផ្លូវទឹកនេះ គឺជាដំណាក់កាលទី១ ដែលនឹងមានការបញ្ចុះបន្ថែមទៀតពីអ្នកពាក់ព័ន្ធ។
ប្រសាសន៍របស់សម្ដេច ហ៊ុន សែន ទាក់ទងនឹងការបញ្ចុះកម្រៃរបស់កំពង់ផែ និងក្រុមហ៊ុននាវាចរ៖
ទន្ទឹមនឹងនេះកម្រៃស្កេនកុងតឺន័រត្រូវបញ្ចុះពី ២០ដុល្លារមក១០ដុល្លារសម្រាប់កុងតឺន័រ២០ហ្វីត ពី៣២ដុល្លារ មក១៦ដុល្លារសម្រាប់កុងតឺន័រ៤០ហ្វីត។ តែជាមួយគ្នានេះ សម្ដេចណែនាំឲ្យស្កេនកុងតឺន័រសង្ស័យប៉ុណ្ណោះ ដែលអាចកុងតឺន័រក្នុងចំនួនតូចណាប៉ុណ្ណោះ ក្រៅពីនេះឲ្យរួចផុតការស្កេន។ ប៉ុន្តែកុងតឺន័រដែលរួចផុតការស្កេន ក៏ត្រូវបង់កម្រៃផងដែរ គ្រាន់តែវិស័យឯកជនបានចំណេញពេលវាលា។
ក្រៅពីនេះ រដ្ឋាភិបាលនឹងកាត់បន្ថយការចំណាយក្រៅផ្លូវការក្នុងដែនសមត្ថកិច្ចគយ ដូចជាការតម្រូវឲ្យគយចេញវិក្កយបត្ររាល់គ្រប់សេវារបស់ខ្លួនជូនអ្នករកស៊ី និងកត់ត្រាក្នុងប្រព័ន្ធកុំព្យូរទ័រជាដើម។
សរុបការកាត់បន្ថយការចំណាយរបស់វិស័យឯកជន គឺមានទំហំដល់ទៅប្រមាណ ៤០០លានដុល្លារក្នុងមួយឆ្នាំ។ សម្ដេចបញ្ជាក់ដូច្នេះថា៖«ធ្វើយ៉ាងដូច្នេះ បើទោះមិនទាន់ចប់សព្វគ្រប់ទេ ក្នុងការសម្រួលនេះយើងបូកត្រួសៗទៅ ការកាត់បន្ថយការចំណាយ គឺវិស័យឯកជនចំណេញប្រមាណ ៤០០លានដុល្លារ»៕