ភ្នំពេញ៖ លោកស្រី Eva Nguyen Binh ឯកអគ្គរដ្ឋទូតបារាំងនៅកម្ពុជា បានជ្រើសរើសស្ត្រីកម្ពុជា ៤រូប ដើម្បីឲ្យពួកគេមករៀនសូត្រ និងតាមដានការងារទូតរបស់លោកស្រី ពេលមួយថ្ងៃពេញ ទាំងនៅក្នុងស្ថានទូត និងក្នុងកម្មវិធីផ្សេងៗដែលលោកស្រីត្រូវចូលរួម។ លោកស្រី Eva បានប្រាប់សារព័ត៌មានថ្មីៗថា គំនិតផ្តួចផ្តើមនេះ បង្កើតឡើងដើម្បីលើកទឹកចិត្ត និងផ្តល់ឱកាសឲ្យស្ត្រីកម្ពុជា បានស្វែងយល់ពីជីវិតការងារ និងជីវិតឯកជនរបស់ស្ត្រីអ្នកការទូត។ រយៈពេលមួយថ្ងៃ នៃការរៀនសូត្រនេះ ដ្បិតតែជាវេលាដ៏ខ្លីបំផុតមែន ប៉ុន្តែសម្រាប់លោកស្រី ឯកអគ្គរដ្ឋទូតបារាំងនៅកម្ពុជា ក៏ប្រសើរជាងមិនរៀបចំសោះ។ មួយថ្ងៃមែនពិត ប៉ុន្តែជាឱកាសដ៏ល្អ ដែលស្ត្រីទាំង៤រូប មិនត្រឹមតែបានតាមដានកិច្ចការរបស់ខ្លួននោះទេ ប៉ុន្តែពួកគាត់ និងទទួលបានការពិភាក្សាផ្លាស់ប្តូរយោបល់ និងបទពិសោធន៍ ជាមួយលោកស្រី និងភ្ញៀវដ៏ពូកែៗជាច្រើនដែលខ្លួនបានអញ្ជើញឲ្យចូលរួមក្នុងកម្មវិធីនេះដែរ។ ក្នុងនាមជាស្ត្រីអ្នកការទូត លោកស្រី Eva ក៏ចង់ឃើញស្ត្រីគ្រប់រូបកាន់តែក្លាហាន និងទុកចិត្តលើសមត្ថភាពខ្លួនឯង។
ដើម្បីជ្រាបលម្អិត សូមអញ្ជើញអានកិច្ចសម្ភាសរវាង កញ្ញា ខន ចំប៉ា នៃសារព័ត៌មានថ្មីៗ និងលោក ស្រី Eva Nguyen Binh ឯកអគ្គរដ្ឋទូតបារាំងនៅកម្ពុជា ខាងក្រោមនេះ៖
កញ្ញា ខន ចំប៉ា៖ តាំងពីថ្ងៃទិវានារីអន្តរជាតិ លោកស្រីបានផ្សព្វផ្សាយនៅតាមទំព័រហ្វេសប៊ុកស្ថានទូតបារាំង ជ្រើសរើសបេក្ខនារី ដើម្បីពួកគេអាចមករៀនសូត្រ និងតាមដានការងារទូតរបស់លោកស្រី។ តើគំនិតផ្តួចផ្តើមនេះ វាបានកើតឡើងយ៉ាងដូចម្តេច?
លោកស្រី Eva Nguyen Binh ៖ តាមពិតទៅ អ្នកប្រហែលជាបានដឹងហើយថា ភាពស្មើគ្នារវាងស្ត្រី និងបុរស គឺអាទិភាពមួយដែលរដ្ឋាបារាំងយកចិត្តទុកដាក់ខ្លាំងណាស់ ពិសេសលោកប្រធានាធិបតី ម៉ាក្រុង។ ខ្ញុំគឺជាឯកអគ្គរដ្ឋទូតបារាំងស្ត្រីដំបូងបង្អស់ នៅក្នុងប្រទេសកម្ពុជា ហើយខ្ញុំធ្លាប់បានធ្វើការនៅក្រសួងការបរទេសបារាំង រយៈពេល២៥ឆ្នាំកន្លងមកហើយ។ ហើយនៅទីនោះ ខ្ញុំតែងតែទទួលបានការជួយលើកទឹកចិត្ត គាំទ្រ ពីសហសេវិកទាំងស្ត្រី និងបុរស។ ការលើកទឹកចិត្តនេះ គឺជារឿងសំខាន់ណាស់ ហើយខ្ញុំចង់បង្ហាញ ភាតរភាព សាមគ្គីភាព ការលើកទឹកចិត្តរបស់ខ្ញុំ ចំពោះស្ត្រីនៅប្រទេសកម្ពុជាផងដែរ។ ដូច្នេះហើយបានជាខ្ញុំ មានគំនិតផ្តួចផ្តើម ឲ្យមានការជ្រើសរើសស្ត្រីមួយចំនួន ដើម្បីឲ្យគាត់មកពិនិត្យ និងសង្កេតកិច្ចការងារការទូតនៅ ក្នុងស្ថានទូតបារាំងនេះជាមួយខ្ញុំ ដើម្បីជាការគាំទ្រ និងលើកទឹកចិត្តដល់ពួកគាត់ ហើយក៏ជាឱកាសសម្រាប់ខ្ញុំ នៅក្នុងការចែករំលែកបទពិសោធន៍ទាំងជីវិតឯកជន និងជីវិតការងារ ថាយើងជាស្ត្រី ក៏អាចធ្វើបាន។ យើងអាចជោគជ័យទាំងការងារ ហើយក៏យើងត្រូវគិតទៅដល់គ្រួសារផងដែរ។ មានន័យថាយើងអាចធ្វើបានទាំង២។
កញ្ញា ខន ចំប៉ា៖ រយៈពេល១ថ្ងៃ វាពិតជាមិនគ្រប់គ្រាន់សម្រាប់ការរៀនសូត្រអំពីអាជីពដ៏ខ្ពង់ខ្ពស់នេះទេ ប៉ុន្តែតើលោកស្រីនឹងបង្ហាញអ្វីខ្លះដល់បេក្ខនារីទាំងនោះ ?
លោកស្រី Eva Nguyen Binh ៖ មានទិដ្ឋភាព២។ យើងរៀបចំ១ថ្ងៃនេះ ឃើញថាវាតិចមែន ប៉ុន្តែវាប្រសើរជាង អត់បានរៀបចំសោះដែរ។ មួយថ្ងៃនេះ គឺជាមួយថ្ងៃដែលពោរពេញទៅដោយសកម្មភាព។ មួយថ្ងៃ ដែលមានខ្លឹមសារ និងអាចជាប្រយោជន៍ទៅដល់បេក្ខនារី។ ទិដ្ឋភាពទាំង២នោះ ទី១គឺ យុវតីកម្ពុជាដែលខ្ញុំជ្រើសរើសនោះ គឺបានមកតាមដានការងាររបស់ខ្ញុំ ពេញមួយថ្ងៃ។ តើជាទូតហ្នឹង តើគាត់ធ្វើកិច្ចការអ្វីខ្លះ? តើការដឹកនាំស្ថានទូតរបៀបយ៉ាងម៉េច? ទី២ គឺជាឱកាសនៃការផ្លាស់ប្តូរយោបល់គ្នារវាងខ្ញុំ និងបេក្ខនារីដែលខ្ញុំបានជ្រើសរើស ហើយពួកគាត់ក៏អាចផ្លាស់ប្តូរយោបល់ ជាមួយភ្ញៀវផ្សេងទៀត ដែលខ្ញុំនឹងអញ្ជើញឲ្យចូលរួមនៅក្នុងកម្មវិធីនេះផងដែរ។ ដូច្នេះហើយ គាត់នឹងបានយល់ថែមទៀតថា តើយើងធ្វើយ៉ាងម៉េច ក្នុងនាមជាស្ត្រី ដែលមានការងារជាអ្នកការទូតផង ហើយត្រូវមើលថែគ្រួសារផង? នេះគឺជាការចែករំលែកបទពិសោធន៍មួយ ហើយខ្ញុំគិតថាជាប្រយោជន៍ទៅដល់បេក្ខនារី ដែលគាត់បានមកសង្កេតនៅក្នុងមួយថ្ងៃនេះ។ អ្វីដែលខ្ញុំចង់បាន គឺបង្ហាញជាឧទាហរណ៍ បង្ហាញពីជីវិតដែលខ្ញុំគិតថាជោគជ័យដែរ។ ពេលខ្លះជំនួបតែមួយពេលទេ ក៏អាចផ្លាស់ប្តូររបស់ជីវិតវាសនាមនុស្សម្នាក់បានដែរ។ ហើយនេះខ្ញុំគិតថា វាជាប្រយោជន៍។
កញ្ញា ខន ចំប៉ា៖ តាំងពីបានមកដល់កម្ពុជា តើលោកស្រីបានយល់អ្វីខ្លះជាពិសេស ពីប្រវត្តិនារីកម្ពុជា និងស្ថានភាពនារីកម្ពុជាបច្ចុប្បន្ន?
លោកស្រី Eva Nguyen Binh ៖ យើងត្រូវទទួលស្គាល់ថា ស្ថានភាពស្ត្រីនៅប្រទេសកម្ពុជានេះ គឺមានលក្ខណៈប្រសើរជាងនៅប្រទេសជាច្រើន នៅក្នុងពិភពលោក។ មានការងារជាច្រើនដែលបានធ្វើឡើង ដោយរដ្ឋាភិបាល អង្គការសង្គមស៊ីវិល និងអ្នកផ្តល់ជំនួយផ្សេងៗ ដើម្បីជាប្រយោជន៍ លើកស្ទួយស្ត្រី ប៉ុន្តែក៏មានបញ្ហាជាច្រើនដែរ ដែលយើងត្រូវយកចិត្តទុកដាក់ ជាពិសេសបញ្ហាហិង្សាលើស្ត្រី និងបញ្ហាសមភាពរវាងបុរស និងស្ត្រី នៅក្នុងអាជីពការងារ។ បញ្ហានេះ មិនមែនមានតែនៅក្នុងប្រទេសកម្ពុជាទេ នៅប្រទេសផ្សេងទៀតក៏មានដែរ ហើយខ្ញុំសង្កត់ធ្ងន់ ទៅលើការលើកកម្ពស់សិទ្ធិស្មើគ្នា រវាងបុរស និងស្ត្រី ក្នុងកិច្ចការងារការទូត។
កញ្ញា ខន ចំប៉ា៖ ខ្ញុំបានសង្កេតឃើញថា លោកស្រីក៏បានធ្វើការងារជាមួយសហគ្រិនស្ត្រី ហេតុអ្វី?
លោកស្រី Eva Nguyen Binh ៖ ខ្ញុំធ្វើការជាមួយមនុស្សទាំងអស់ ប៉ុន្តែជាមួយស្ត្រី ខ្ញុំមានការយកចិត្តទុកដាក់ជាពិសេសផងដែរ ព្រោះខ្ញុំចង់លើកកម្ពស់ស្ត្រី ដើម្បីឲ្យគាត់ចូលប្រឡូកនៅក្នុងអាជីវកម្មនេះ។ សម្រាប់ស្ត្រី វាមិនមែនរឿងងាយស្រួលទេ នៅក្នុងការដឹកនាំក្រុមហ៊ុននីមួយៗ ព្រោះស្ត្រី ក៏ត្រូវមើលការខុសត្រូវផងដែរ នៅក្នុងគ្រួសារ។ ដូច្នេះហើយ នេះគឺជាលើកទឹកចិត្តមួយដែលខ្ញុំចង់ផ្តល់ទៅឲ្យស្ត្រី។
កញ្ញា ខន ចំប៉ា៖ ខ្ញុំចង់ឲ្យលោកស្រីផ្តល់ជាពិសោធន៍ផ្ទាល់ដែរ តើរវាងការងារ និងគ្រួសារ មួយណាជារឿងអាទិភាព?
លោកស្រី Eva Nguyen Binh៖ ជីវិតឯកជន និងអាជីពការងារ សម្រាប់ខ្ញុំគឺសំខាន់ដូចគ្នា។ ខ្ញុំព្យាយាមធ្វើយ៉ាងណាឲ្យវាមានលំនឹងស្មើគ្នា។ ជាការពិត គ្រួសារគឺសំខាន់ ប៉ុន្តែខ្ញុំក៏ស្រឡាញ់ការងាររបស់ខ្ញុំ។ ខ្ញុំមិនអាចនៅគិតតែការងារ ហើយមិនមើលគ្រួសារបានទេ។ បើធ្វើតែអីចឹង ក៏វាមិនល្អដែរ។
កញ្ញា ខន ចំប៉ា៖ លោកស្រីមានសារអ្វីខ្លះ ទៅកាន់ស្ត្រីកម្ពុជា ? ពិសេសសហគ្រិនស្ត្រីវ័យក្មេង និងនិស្សិតនារី?
លោកស្រី Eva Nguyen Binh៖ សារៈសំខាន់ដែលខ្ញុំចង់ផ្តាំផ្ញើទៅដល់ស្ត្រីគ្រប់រូប គឺត្រូវទុកចិត្តលើខ្លួនឯង និងស្តាប់ខ្លួនឯងផង ព្រោះជីវិតយើងពេលខ្លះជួនជួបរឿងល្អទៅ ពេលខ្លះក៏ជួបរឿងមិនល្អ ដូច្នេះត្រូវទុកចិត្តលើខ្លួនឯង។ ខ្ញុំនិយាយនេះ គឺនិយាយជាទូទៅទេ ភាគច្រើនគឺស្ត្រីអត់សូវទុកចិត្តលើខ្លួនឯងទេ បុរសគេទុកចិត្តខ្លួនឯងជាង។ ជាក់ស្តែង តួនាទីជាឯកអគ្គរដ្ឋទូតបារាំងនៅប្រទេសកម្ពុជានេះអីចឹង នៅពេលដែលគេប្រកាសថា តួនាទីនេះទំនេរ ភាគច្រើនគឺបុរស គេដណ្តើមគ្នាមកធ្វើជាឯកអគ្គរដ្ឋទូត។ បុរសខ្លះ គេចង់បានតួនាទី នៅក្នុងប្រទេសផ្សេងៗខុសពីកម្ពុជា។ ចំណែកស្រីៗ នៅគិតសិនទាំងខ្ញុំ ទាំងគេ ថាតើអាចធ្វើការងារហ្នឹងបានឬអត់? នេះហើយគឺជាឧបសគ្គចម្បងសម្រាប់ស្ត្រី៕