អន្តរជាតិ
តៃវ៉ាន់ ស្នើអាមេរិក អូស្ត្រាលី និងជប៉ុនជួយទប់ទល់ឥទ្ធិពលចិននៅតំបន់ប៉ាស៊ីហ្វិក
ប្រធានាធិបតីតៃវ៉ាន់ Tsai Ing-wen (រូបភាពវេបសាយការិយាល័យប្រធានាធិបតីតៃវ៉ាន់)
×![]()
ដោយ: តន ចាន់រិទ្ធារ៉ា
ប្រធានាធិបតីតៃវ៉ាន់ Tsai Ing-wen បានស្នើប្រទេសធំៗនៅជាប់មហាសមុទ្រប៉ាស៊ីហ្វិក បង្កើនសកម្មភាពរបស់ខ្លួនដើម្បីទប់ទល់ការសាយភាយឥទ្ធិពលចិនក្នុងតំបន់នេះ។ តៃវ៉ាន់ ដែលមានមិត្តសេសសល់មិនច្រើននោះ មានទំនាក់ទំនងការទូតជាមួយប្រទេស៦ក្នុងតំបន់ប៉ាស៊ីហ្វិក ជាទីដែលចិនបានបង្កើនឥទ្ធិពលរបស់ខ្លួនឥតឈប់ឈរ។ លោកស្រី Tsai ទំនងបារម្ភថា សម្ព័ន្ធមិត្តរបស់ខ្លួន នឹងត្រូវចិនអូសទាញបន្តិចម្ដងៗ ហើយដង្ហើមការទូតតៃវ៉ាន់ ក៏កាន់តែខ្សត់ខ្សោយ។
សកម្មភាពរបស់ចិននៅតំបន់មហាសមុទ្រប៉ាស៊ីហ្វិក ពិតជាធ្វើឲ្យតៃវ៉ាន់ខ្វាយខ្វល់ក្នុងចិត្តយ៉ាងខ្លាំង។ នេះក៏ព្រោះតែសម្ព័ន្ធមិត្តរបស់ខ្លួនចំនួន៦ប្រទេស មានទីតាំងក្នុងមហាសមុទ្រដ៏ល្វឹងល្វើយមួយនេះ។ លោកស្រី Tsai Ing-wen ប្រធានាធិបតីតៃវ៉ាន់ ទើបបញ្ចប់ទស្សនកិច្ចបីប្រទេសនៅតំបន់នេះដើម្បីពង្រឹងទំនាក់ទំនងការទូត ប្រឈមមុខនឹងការកើនឡើងសកម្មភាពរបស់ចិន។
ក្នុងទស្សនកិច្ចលើកនេះ លោកស្រី Tsai បានទៅដល់សម្ព័ន្ធមិត្តបីប្រទេសមាន Palau, Nauru និងMarshall Island ។ នៅថ្ងៃចុងក្រោយដំណើរទស្សនកិច្ចនេះ មេដឹកនាំតៃវ៉ាន់បានទទូចឲ្យអូស្ត្រាលី អាមេរិក និងជប៉ុនជួយរុញច្រានឥទ្ធិពលរបស់ចិនក្នុងតំបន់។ ចិនដែលចាត់ទុកតៃវ៉ាន់ជាខេត្តមួយរបស់ខ្លួន បានប្រឹងប្រែងយ៉ាងខ្លាំងក្នុងការកាត់ផ្ដាច់ផ្លូវការទូតរបស់តៃវ៉ាន់ តាមរយៈការផ្ដល់ហិរញ្ញវត្ថុជាច្រើនដល់ប្រទេសដែលបោះបង់តៃវ៉ាន់។
សារព័ត៌មានអូស្ត្រាលី ABC NEWS ផ្សាយថា លោកស្រី Tsai ចាត់ទុកវាជារឿងសំខាន់ដែលតៃវ៉ាន់ និងប្រទេសមានគំនិតដូចគ្នា ធ្វើការជាមួយគ្នា និងបង្កើតភាពជាដៃគូផ្ដោតលើតម្លៃនៅប៉ាស៊ីហ្វិក។ ប្រធានាធិបតីតៃវ៉ាន់បន្ថែមថា អូស្ត្រាលី អាមេរិក និងជប៉ុន អាចសម្របសម្រួលការផ្ដល់ជំនួយ និងការវិនិយោគឲ្យកាន់តែប្រសើរឡើងដើម្បីបង្កើនឥទ្ធិពលរបស់ខ្លួន។ លោកស្រី Tsai ក៏អំពាវនាវប្រទេសទាំងបីនេះឲ្យបង្កើនការិះគន់គម្រោងរបស់ចិនផងដែរ។
តាមពិតទៅ អាមេរិក អូស្ត្រាលី និងជប៉ុន ក៏មានជំហរមិនសប្បាយចិត្តនឹងការកើនឡើងយ៉ាងឆាប់រហ័សអានុភាពរបស់ចិននៅតំបន់មហាសមុទ្រមួយនេះដែរ។ បើតាមលោកស្រី Tsai តៃវ៉ាន់នឹងសហការជាមួយដៃគូរបស់ខ្លួនដើម្បីទប់ទល់សកម្មភាពចិន និងជាធ្វើជាគំរូនៅកន្លែងដែលចិនអាចធ្វើតាមការសន្យារបស់ខ្លួនបាន។
មួយពេលចុងក្រោយនេះ ចិនបានជះលុយមិនសំចៃដៃឡើយឲ្យតែអូសទាញសម្ព័ន្ធមិត្តរបស់តៃវ៉ាន់ ហើយយុទ្ធសាស្ត្រប្រើទឹកលុយក៏ទទួលបានផលដែរ។ តៃវ៉ាន់ដែលមិនសូវមានលុយកាក់ច្រើននោះ ក៏ព្យាយាមផ្ដល់ជំនួយផ្សេងដើម្បីរក្សាមិត្តរបស់ខ្លួនដូចគ្នា។ ជារឿយៗ តៃវ៉ាន់តែងចោទចិនថា ប្រើអំណាចលុយដុល្លារដើម្បីទាក់ទាញទឹកចិត្តប្រទេសផ្សេង តែខ្លួននឹងមិនប្រើយុទ្ធសាស្ត្របែបនេះវិញតបវិញទេ៕
Tag:
តៃវ៉ាន់
ចិន
ប៉ាស៊ីហ្វិក
Tsai Ing-wen
© រក្សាសិទ្ធិដោយ thmeythmey.com
