អ្នកនាំពាក្យ បកស្រាយថា បើមិនដុតខោអាវខុសច្បាប់ គឺដូចគាំទ្រផលិតផលក្លែងក្លាយ

ជាតិ

សង្គមជាតិ

អ្នកនាំពាក្យ បកស្រាយថា បើមិនដុតខោអាវខុសច្បាប់ គឺដូចគាំទ្រផលិតផលក្លែងក្លាយ

30, Mar 2019 , 4:45 pm

រូបភាព

សកម្មភាពដុតបំផ្លាញសម្លៀកបំពាក់ក្លែងបន្លំ។ រូបពីកងរាជអាវុធហត្ថ

ដោយ: សែម វណ្ណា (Sem Vanna)

ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានបង្ហោះសារលើទំព័រហ្វេសប៊ុកកងរាជអាវុធហត្ថឈ្មោះ GRK News ដើម្បីពន្យល់ពីហេតុផល ដែលកងរាជអាវុធហត្ថ សម្រេចដុតបំផ្លាញសម្លៀកបំពាក់កីឡាក្លែងបន្លំដល់ទៅជាង២៤០០កំប្ល៉េ កាលពីថ្ងៃទី២៩ ខែមីនា ឆ្នាំ២០១៩។

ការចេញមកផ្តល់ហេតុផលនេះ គឺក្រោយមានការរិះគន់ពីអ្នកប្រើប្រាស់ហ្វេសប៊ុក ដោយពួកគេ លើកជាយោបល់ថា បើយកសម្លៀកបំពាក់ទាំងនោះ ទៅចែកជូនអ្នកក្រីក្រ គឺប្រសើរជាងដុតបំផ្លាញ។ លោក អេង ហ៊ី ឲ្យអ្នករិះគន់ ពិចារណាថា បើយកសម្លៀកបំពាក់ទាំងអស់នោះ ទៅចែកចាយឬធ្វើជាអំណោយដល់អ្នកដទៃ គឺមានន័យថា សមត្ថកិច្ច ឬសហព័ន្ធកីឡាបាល់ទាត់កម្ពុជា គាំទ្រផលិតផលក្លែងក្លាយ។

លោក បានសរសេរយ៉ាងដូច្នេះថា៖«ដោយសារមានការគិតគូរវែងឆ្ងាយ និងស្របតាមផ្លូវច្បាប់ផង សហព័ន្ធកីឡាបាល់ទាត់កម្ពុជា បានស្នើសុំអយ្យការ ដើម្បីបំផ្លាញសម្លៀកបំពាក់ ដែលចាប់បានទាំងនោះ»។ តាមរយៈសារលើទំព័រហ្វេសប៊ុក លោក បានប្រាប់ឲ្យសាធារណជន ទាក់ទងទៅសួរលោកបន្ថែម បើមិនទាន់អស់ចិត្តឬមិនទាន់យល់ពីហេតុផលនេះ។

អ្នកនាំពាក្យកងរាជអាវុធហត្ថរូបនេះ ប្រាប់សារព័ត៌មានថ្មីៗបន្ថែមតាមទូរសព្ទថា សម្លៀកបំពាក់ទាំងនោះ គឺជាសម្លៀកបំពាក់កីឡាទាំងអស់ ដែលបានដាក់រូបសញ្ញារបស់សហព័ន្ធកីឡាបាល់ទាត់ជាតិ ដោយគ្មានការអនុញ្ញាត។ លោក បញ្ជាក់ថា៖«បើមានការអនុញ្ញាត យើងទៅចាប់គេម៉េចកើត»។

កងរាជអាវុធហត្ថ បានរឹបអូសសម្លៀកបំពាក់ទាំងនោះ ពីទីតាំង៣ផ្សេងគ្នា និងបានបញ្ជូនជនសង្ស័យម្នាក់ឈ្នោះ ហេង រស្មី ទៅតុលាការ។ កងរាជអាវុធហត្ថ អះអាងថា សម្លៀកបំពាក់ខាងលើ គឺជាសម្លៀកបំពាក់ក្លែងបន្លំពាណិជ្ជសញ្ញា សេវាសញ្ញា និងម៉ាកសមូហភាព ឬពាណិជ្ជនាម ដែលខុសទៅនឹងច្បាប់។

កងរាជអាវុធហត្ថ លើកឡើងថា ការបង្ក្រាបនិងការបំផ្លាញសម្លៀកបំពាក់ទាំងនោះ គឺដើម្បីកុំឲ្យមានការក្លែងបន្លំកម្មសិទ្ធិបញ្ញា និងជាសញ្ញាមួយ ដែលបញ្ជាក់ថា កម្ពុជា ជាប្រទេសនីតិរដ្ឋ ហើយជនណាដែលបានប្រព្រឹត្តអំពើក្លែងបន្លំ គឺដាច់ខាតត្រូវតែមានការបង្ក្រាប៕