អន្តរជាតិ
វៀតណាមបង្កើត«ភាពជាដៃគូគ្រប់ជ្រុងជ្រោយ»ព្រុយណេ
× ដំណើរទស្សនកិច្ចផ្លូវរដ្ឋរបស់ប្រមុខរដ្ឋព្រុយណេទៅកាន់វៀតណាម បានបញ្ចប់ជាមួយនឹងលទ្ធផលផ្លែផ្កាច្រើន។ ប្រមុខដឹកនាំប្រទេសទាំងពីរ បានសម្រេចពង្រីកទំនាក់ទំនងទ្វេភាគីទៅកាន់កម្រិតកាន់តែជិតស្និទ្ធខ្លាំង ក៏ដូចជាព្រមព្រៀងគ្នាក្នុងការធ្វើការជាមួយគ្នាលើកិច្ចសហប្រតិបត្តិការពាណិជ្ជកម្ម និងសន្តិសុខក្នុងតំបន់។
ព្រះមហាក្សត្រព្រុយណេ Hassanal Bolkiah នៅថ្ងៃ២៨ មីនា បានបញ្ចប់ដំណើរទស្សនកិច្ចផ្លូវរដ្ឋរយៈពេលបីថ្ងៃនៅវៀតណាម។ ដំណើរទស្សនកិច្ចផ្លូវរដ្ឋនេះ បញ្ចប់ជាមួយនឹងសេចក្តីថ្លែងការណ៍ប្រវតិ្តសាស្ត្រមួយនៃទំនាក់ទំនងទ្វេភាគី ដោយប្រមុខដឹកនាំប្រទេសទាំងពីរ បានសម្រេចកសាង«ទំនាក់ទំនងភាពជាដៃគូគ្រប់ជ្រុងជ្រោយជាមួយនឹងគ្នា»។
តាមភ្នាក់ងារព័ត៌មានវៀតណាម Vietnam News អំឡុងពេលទស្សនកិច្ចនេះ ប្រមុខរដ្ឋព្រុយណេ បានចូលជួបពិភាក្សាទាំងជាមួយនឹងប្រធានាធិបតីវៀតណាម លោក Nguyen Phu Trong និង លោកនាយករដ្ឋមន្ត្រី Nguyễn Xuân Phúc ។ ហើយតាមរយៈជំនួបនេះ លោកនាយករដ្ឋមន្ត្រី Phuc បានបង្ហាញពីការពេញចិត្តចំពោះកិច្ចសហប្រតិបត្តិការដ៏សកម្មភាពរវាងប្រទេសទាំងពីរលើគ្រប់វិស័យ ពិសេសនោះក្នុងក្របខណ្ឌអាស៊ាន និងអាស៊ីប៉ាស៊ីហ្វិក។
តាមរយៈកិច្ចព្រមព្រៀងភាពជាដៃគូគ្រប់ជ្រុងជ្រោយ ភាគីទាំងពីរ មានគោលដៅសម្រេចឲ្យបានទំហំពាណិជ្ជកម្ម ៥០០លានដុល្លារនៅឆ្នាំ២០២០។ ភាគីទាំងពីរ ក៏រំពឹងថា នឹងអាចធ្វើសហប្រតិបត្តិការរួមគ្នាលើវិស័យការពារជាតិ សន្តិសុខ និងបង្កើតការហ្វឹកហ្វឺននៅក្នុងប្រតិបត្តិការដែនសមុទ្រក្នុងការស្វែងរក និងសង្គ្រោះ ក៏ដូចជាបង្កើនការបំពេញទស្សនកិច្ចដែនសមុទ្រជាមួយនឹងគ្នា និងធ្វើការកាន់តែជិតស្និទ្ធនៅវេទិកាសន្តិសុខ និងការពារអន្តរជាតិ។
ខណៈដែលព្រុយណេ កំពុងតែខិតខំប្រឹងប្រែងក្នុងការធ្វើពិពិធកម្មសេដ្ឋកិច្ចរបស់ខ្លួនតាមរយៈការអភិវឌ្ឍឧស្សាហកម្ម និងសហគមន៍សហគ្រាសខ្នាតតូច និងមធ្យម ប្រមុខរដ្ឋព្រុយណេ បានសំឡឹងខ្ពស់ពីការកិច្ចសហប្រតិបត្តិការទ្វេភាគី និងពហុភាគីជាមួយនឹងវៀតណាម។ ព្រុយណេ ក៏រំពឹងផងដែរថា ប្រទេសទាំងពីរ នឹងជួយគាំទ្រគ្នាទៅវិញទៅមកក្នុងការពង្រីកទីផ្សារឲ្យគ្នាផងដែរ។
គួរជម្រាបផងដែរ ក្រៅពីទំនាក់ទំនងទ្វេភាគី និងទំនាក់ទំនងក្នុងក្របខណ្ឌអាស៊ាន ព្រុយណេ និងវៀតណាម ក៏ជាសមាជិកនៃ កិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូរអន្តរប៉ាស៊ីហ្វិក (CPTPP) ដែលជាកិច្ចព្រមព្រៀងពាណិជ្ជកម្មសេរីដ៏ធំមួយរបស់ពិភពលោក ដែលមានផលិតផលក្នុងស្រុកសរុប ១៣,៥ ទ្រីលានដុល្លារ និងស្មើនឹង ១៣ ភាគរយ នៃផលិតផលក្នុងស្រុកសរុបជាសកល៕
© រក្សាសិទ្ធិដោយ thmeythmey.com