អន្តរជាតិ
«ស្លឹកចេក»ត្រូវប្រើជំនួសប្លាស្ទិកដើម្បីវេចខ្ចប់ទំនិញក្នុងផ្សារទំនើបថៃ រូបភាព៖ Perfect Home Chiang Mai
× ផ្សារទំនើបមួយក្នុងប្រទេសថៃ បានបង្កើតវិធីសាស្ត្រដ៏ឈ្លាសវៃមួយ ដើម្បីកាត់បន្ថយការប្រើប្រាស់ប្លាស្ទិក។ ជំនួសឲ្យប្លាស្ទិកដែលប៉ះពាល់ធ្ងន់ធ្ងរដល់បរិស្ថាន ផ្សារទំនើបមួយឈ្មោះថា Rimping ដែលមានទីតាំងក្នុងខេត្តឈៀងម៉ៃ ភាគខាងជើងនៃប្រទេសថៃ សម្រេចប្រើប្រាស់ស្លឹកចេកដើម្បីវេចខ្ចប់ផលិតផលរបស់ខ្លួន។
កាលពីដើមសប្តាហ៍មុន ក្រុមហ៊ុនអចលនវត្ថុមួយក្នុងខេត្តឈៀងម៉ៃ ឈ្មោះថា Perfect Homes បានបង្ហោះរូបភាព ដែលបង្ហាញពីការវេចខ្ចប់ផលិតផលដោយប្រើប្រាស់ស្លឹកចេកនៅលើទំព័រហ្វេសបុករបស់ខ្លួន។ ភ្លាមៗនោះ រូបភាពទាំងនេះ ទទួលបានការចាប់អារម្មណ៍ជាខ្លាំងពីសំណាក់អ្នកប្រើប្រាស់បណ្តាញសង្គមហ្វេសបុក។
យោងតាមការចុះផ្សាយរបស់ទស្សនាវដ្តី Forbes លោក Trevor Nace អ្នកជំនាញបរិស្ថាន គូសបញ្ជាក់ថា ការប្រើប្រាស់ស្លឹកចេកជំនួសឲ្យប្លាស្ទិកសម្រាប់វេចខ្ចប់ទំនិញ គឺជាវិធីសាស្ត្រដ៏មានប្រសិទ្ធភាពបំផុតមួយ ដើម្បីជួយកាត់បន្ថយបរិមាណប្លាស្ទិក។ ទាក់ទិននឹងគុណសម្បត្តិពិសេសរបស់ស្លឹកចេក វាមានទំហំធំ និងរឹងមាំ ហើយអាចបត់បែនបាន ងាយស្រួលក្នុងការវេចខ្ចប់។
ទន្ទឹមនឹងគ្នានេះ រឿងមួយដែលគួរយកមកពិចារណានោះ គឺពាក់ព័ន្ធនឹងតម្លៃរបស់ប្លាស្ទិក និងស្លឹកចេក។ ក្នុងបណ្តាប្រទេសក្នុងតំបន់ត្រូពិក ស្លឹកចេញ ត្រូវគេប្រទះឃើញមាននៅគ្រប់ទិសទី។ ជាពិសេនោះ អ្នកអាចទទួលបានដោយឥតគិតថ្លៃថែមទៀតផង ដោយអាស្រ័យលើគុណភាពដែលអ្នកចង់បាន។ ក្នុងតំបន់មានអាកាសធាតុក្តៅវិញ ការប្រើប្រាស់ស្លឹកចេក អាចមានតម្លៃថ្លៃជាងប្លាស្ទិក។ យ៉ាងណាមិញ លោក Trevor នៅតែជំរុញឲ្យប្រើប្រាស់វិធីសាស្ត្របែបនេះ ដែលល្អសម្រាប់បរិស្ថាន។
មែនទែនទៅ ការប្រើប្រាស់ស្លឹកចេកដើម្បីវេចខ្ចប់អាហារ ត្រូវបានគេអនុវត្តតាំងពីយូរណាស់មកហើយ។ ក្នុងតំបន់ត្រូពិកខ្លះនៃប្រទេសម៉ិចស៊ិក អាហារ និងផលិតផល ត្រូវបានវេចខ្ចប់ដោយស្លឹកចេក។ ប្រជាជនក្នុងតំបន់អាស៊ីអាគ្នេយ៍ ក៏ប្រើប្រាស់ស្លឹកចេកដើម្បីវេចខ្ចប់អាហារ និងបាយផងដែរ។
សូមបញ្ជាក់ថា ក្នុងចំណោមប្លាស្ទិក៩ពាន់លានតោនដែលត្រូវបានគេផលិតឡើង ត្រឹម៩ភាគរយប៉ុណ្ណោះត្រូវបានគេយកទៅកែច្នៃឡើងវិញ។ ភ្នាក់ងារអង្គការទទួលបន្ទុកកម្មវិធីបរិស្ថាន បានប៉ាន់ស្មានថា ត្រឹមឆ្នាំ២០៥០ ប្លាស្ទិកប្រមាណ១២ពាន់លានតោន នឹងត្រូវបោះចោលទៅក្នុងបរិស្ថាន និងមហាសមុទ្រ។ ក្នុងចំណោមសំណល់ប្លាស្ទិកទាំងនោះ កន្ទុយបារី, ដបប្លាស្ទិក, ប្រអប់ប្លាស្ទិកដាក់អាហារ និងថង់ទំនិញប្លាស្ទិក គឺជាមូលហេតុធំបំផុត ៕
Tag:
ថៃ
បរិស្ថាន
ប្លាស្ទិក
ផ្សារទំនើប
© រក្សាសិទ្ធិដោយ thmeythmey.com