រដ្ឋមន្ត្រីក្រសួងព័ត៌មាន និងវប្បធម៌ បង្ហាញឆន្ទៈរួមចំណែកអភិរក្សសត្វដំរី

ជាតិ

២៥ខេត្ត/រាជធានី

រដ្ឋមន្ត្រីក្រសួងព័ត៌មាន និងវប្បធម៌ បង្ហាញឆន្ទៈរួមចំណែកអភិរក្សសត្វដំរី

01, Apr 2019 , 4:24 pm

រូបភាព

ដោយ: ថ្មីៗ

ភ្នំពេញ៖ ដើម្បីជួយទ្រទ្រង់និងការពារសត្វដំរីខ្មែរ សមាគមអភិរក្សដំរីអៃរាវត្តា បានរៀបចំកម្មវិធីរាត្រីសប្បុរសធម៌ កាលពីថ្ងៃទី៣១ មីនាម្សិលមិញ ក្រោមអធិបតីដ៏ខ្ពង់ខ្ពស់របស់រដ្ឋមន្ត្រីក្រសួងព័ត៌មាន លោក ខៀវ កាញ៉ារីទ្ធ, រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា រួមទាំងភ្ញៀវជាតិនិងអន្តរជាតិរាប់រយនាក់ចូលរួមផងដែរ។ ព្រឹត្តិការណ៍រាត្រីសប្បុរសធម៌នេះ បានបញ្ចាំងវីដេអូខ្លីស្តីពីការអភិរក្សសត្វដំរីអៃរាវត្តា, ការបង្ហាញក្បាច់គុណល្បុក្កតោ, ការដេញថ្លៃគំនូររបស់វិចិត្រករ៖ លោក ឯម រាម, លោក ឈឹម សុធី, លោក នូ សារី និងក្រុមយក្សា រួមទាំងការបង្ហាញម៉ូដសម្លៀកបំពាក់ដែលច្នៃពីក្រណាត់ជនជាតិដើមភាគតិចផងដែរ។

នៅក្នុងកម្មវិធីរាត្រីសប្បុរធម៌ រដ្ឋមន្ត្រីទាំងពីរ រួមទាំងភ្ញៀវជាតិនិងអន្តរជាតិជាច្រើននាក់ទៀត បានបង្ហាញចំណាប់អារម្មណ៍និងឆន្ទៈ រួមទាំងបានចំណាយថវិកាផ្ទាល់ខ្លួនមួយចំនួន ដើម្បីចូលរួមចំណែកជួយទ្រទ្រង់និងការពារសត្វដំរីខ្មែរចំនួន៤ក្បាលនៅខេត្តរតនគិរី ដែលសមាគមអភិរក្សដំរីអៃរាវត្តា កំពុងយកចិត្តទុកដាក់អភិរក្សដំរីទាំងនោះកុំឲ្យផុតពូជ។

រាត្រីសប្បុរសធម៌ដើម្បីបន្តសកម្មភាពអភិរក្ស«បុកវ៉ា, បាក់ម៉ៃ, ខាំសែននិងអ៊ីកែវ» ដែលជាសត្វដំរីទាំង៤ក្បាលនៅរតនគិរី ប្រារព្ធនៅសណ្ឋាគារ Le Royal Raffles រាជធានីភ្នំពេញ។ សូមអញ្ជើញទស្សនាទិដ្ឋភាពរាត្រីសប្បុរសធម៌កាលពីយប់ថ្ងៃទី៣១ មីនាម្សិលមិញ ដូចតទៅ៖