អន្តរជាតិ
តួកគី ចូលកាន់តែជិតស្និទ្ធនឹងអាស៊ាន រូបភាព Vientiane Times
× គិតចាប់ពីឆ្នាំ២០១៨មក តួកគី បានសម្រេចបេសកកម្មបង្កើនចំណងការទូតជាមួយនឹងរដ្ឋអាស៊ានទាំងដប់ជាផ្លូវការហើយ។ ឡាវ គឺជាទិសដៅចុងក្រោយរបស់តួកគី ក្នុងដំណើរឆ្ពោះមកកាន់តំបន់អាស៊ាន ដែលជាទីដ៏មានសក្តានុពលនៅក្នុងតំបន់ និងជាតួអង្គសំខាន់របស់ពិភពលោក។ ការផ្សារភ្ជាប់ចំណងរវាងតួកគី និងរដ្ឋរបស់អាស៊ានទាំងដប់ ធ្វើឲ្យតួកគីកាន់តែមានទម្ងន់ក្នុងការធ្វើការជាមួយនឹងអាស៊ានតែម្តង។
តាមការលើកឡើងរបស់អគ្គរដ្ឋទូតតួកគីប្រចាំក្រុងវៀងចន្ទន៍ លោក Ahmet İdem Akay ការបង្កើតស្ថានទូតតួកគីប្រចាំប្រទេសឡាវ មិនត្រឹមតែជាការអភិវឌ្ឍទំនាក់ទំនងទ្វេភាគីប៉ុណ្ណោះនោះទេ ក៏ប៉ុន្តែ ក៏ជាផ្នែកមួយនៃការពង្រឹងទំនាក់ទំនងពហុភាគីជាមួយនឹងប្រទេសអាស៊ានផងដែរ។ នេះបើយោងតាមការចុះផ្សាយរបស់សារព័ត៌មាន Daily Sabah នៅថ្ងៃ២៩ មីនាកន្លងទៅ។
លោកអគ្គរដ្ឋទូត បានកត់សម្គាល់ថា បន្ទាប់ពីការបើកដំណើរការស្ថានទូតនៅក្នុងរដ្ឋធានីវៀងចន្ទន៍នៅឆ្នាំ២០១៨មក តួកទី បានមានតំណាងការទូតនៅក្នុងប្រទេសទាំងដប់របស់អាស៊ានរួចហើយ។ លោក គូសបញ្ជាក់ថា នេះ គឺជាជំហានដ៏សំខាន់របស់តួកទីក្នុងការផ្តល់តម្លៃទៅលើការអភិវឌ្ឍទំនាក់ទំនងទៅនឹងអង្គការក្នុងតំបន់។
សូមបញ្ជាក់ថា តួកគី បានចាប់ផ្តើមទំនាក់ទំនងជាមួយនឹងអាស៊ានតាំងពីឆ្នាំ ១៩៩៩ មកម្ល៉េះ។ តួកគី ក្រោយមកទៀត ក៏បានព្យាយាមពង្រីកទំនាក់ទំនងជាមួយនឹងអាស៊ានក្នុងកម្រិតកាន់តែជិតស្និទ្ធជាបន្តបន្ទាប់ ជាពិសេសនោះ តួកគី ក៏បានផ្សារភ្ជាប់ជាមួយនឹងអាស៊ានតាមរយៈកិច្ចប្រជុំរបស់អាស៊ានផងដែរ។
ក៏ប៉ុន្តែអ្វីដែលគួរចាប់អារម្មណ៍នោះ នៅឆ្នាំ២០១៧កន្លងទៅ មានការលេចឡើងថា តួកគី មានចេតនាចង់ចូលជាសមាជិកអាស៊ាន។ ការប៉ុនប៉ងនេះ ត្រូវបានទម្លាយចេញដោយប្រធានវិលជុំអាស៊ានហ្វីលីពីន លោករ៉ូឌ្រីហ្គោ ឌូទើតេ។ ពេលនោះ លោកប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានថ្លែងប្រាប់អ្នកសារព័ត៌មានត្រង់ៗថា តួកគី បានស្នើសុំលោកដើម្បីពិចារណាលើតួកគីក្នុងសមាសភាពរបស់ប្រធានអាស៊ាន ហើយលោកប្រធានាធិបតី ក៏មិនបានយល់ទាស់អ្វីដែរ។
យ៉ាងណាក៏ដោយ ប្រធានបទនេះ ក៏បានស្ងប់ស្ងាត់ទៅវិញ ក្រោយពីអាស៊ានផ្លាស់ប្តូរប្រធានវិលជុំមក ពោលគឺ អាស៊ាន ដែលសមាជិកទាំងដប់ដូចជា ព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម មិនបានដាក់បញ្ហាជារបៀបវារៈសម្រាប់ជជែកឡើយ។
បើនិយាយពីលក្ខខណ្ឌស្នូល ដែលចែងក្នុងធម្មនុញ្ញអាស៊ាន ស្តីពីការចូលជាសមាជិកអាស៊ាននោះ តួកគី គ្មានសង្ឃឹមឡើយ ដ្បិតភូមិសាស្ត្ររបស់តួកគីនៅក្រៅពីតំបន់អាស៊ីអាគ្នេយ៍។ នេះ មិនទាន់និយាយពីកម្រិតផ្ទៃក្នុងនៃការត្រូវរូវគ្នារបស់អាស៊ានទៅកាន់តួកគីផង។ មួយវិញទៀតនោះ អាស៊ាន ក៏កំពុងវាយតម្លៃទៅលើស្ថានភាពទីម័រខាងកើតដែលមានទីតាំងនៅអាស៊ីអាគ្នេយ៍ស្រាប់ និងបានស្នើសុំចូលជាសមាជិកតាំងពីឆ្នាំ២០១១មកនោះ៕
© រក្សាសិទ្ធិដោយ thmeythmey.com