អន្តរជាតិ
NASA៖ កម្ទេចផ្កាយរណបបាញ់ដោយឥណ្ឌា អាចបង្កគ្រោះថ្នាក់ដល់ស្ថានីយ៍អវកាសអន្តរជាតិ
×![]()
ដោយ: តន ចាន់រិទ្ធារ៉ា
៥ថ្ងៃក្រោយឥណ្ឌាប្រកាសថា ខ្លួនមានសមត្ថភាពបាញ់កម្ទេចផ្កាយរណបនោះ រដ្ឋបាលអវកាស និងលំហអាមេរិក (NASA) បានព្រមានពីគ្រោះថ្នាក់ដែលអាចកើតឡើងចំពោះស្ថានីយ៍អវកាសអន្តរជាតិ (ISS) ។ ប្រធាន NASA លោក Jim Bridenstine និយាយថា កម្ទេចកម្ទីរបស់ផ្កាយរណបបានអណ្ដែតលើវេហាដែលនោះអាចបង្កគ្រោះថ្នាកអវកាសយានិកដែលកំពុងបំពេញការងារ ដ្បិតបំណែកខ្លះមិនអាចតាមដានបានឡើយ។
នាយករដ្ឋមន្ត្រីឥណ្ឌា នារិន្ទ្រា ម៉ូឌី នៅថ្ងៃទី២៧ ខែមីនា បានប្រកាសពីការបាញ់ទម្លាក់ផ្កាយរណបមួយដោយប្រើមីស៊ីល។ តាមលទ្ធផលនេះ នាយករដ្ឋមន្ត្រីឥណ្ឌាអះអាងថា ឥណ្ឌាក្លាយជាមហាអំណាចលំហអាកាសហើយ។ ប៉ុន្តែស្ថាប័នគ្រប់គ្រងអវកាសរបស់អាមេរិក ហាក់មិនសូវរីករាយនឹងរឿងនេះប៉ុន្មានឡើយ ខណៈផលប៉ះពាល់របស់វា ក៏ជារឿងមិនអាចទទួលយកបានដែរ។
ប្រមុខរដ្ឋបាលអវកាស និងលំហអាមេរិក (NASA) លោក Jim Bridenstine ចាត់ទុកការបាញ់ផ្កាយរណបនេះជារឿងគួរឲ្យខ្លាចមួយព្រោះការបាញ់នេះបានបង្កើតជាកម្ទេចកម្ទីដល់ទៅ៤០០បំណែក ដែលនាំឲ្យមានគ្រោះថ្នាក់ដល់អវកាសយានិកដែលធ្វើការនៅស្ថានីយ៍អវកាសអន្តរជាតិ។ លោក Bridenstine និយាយនៅថ្ងៃទី១ ខែមេសា ថា បំណែកទាំងអស់ មិនមែនសុទ្ធតែអាចតាមដានបានឡើយ ខណៈបច្ចុប្បន្នអាមេរិកកំពុងតាមដានបំណែកដែលមានទំហំចាប់ពី១០សង់ទីម៉ែត្រឡើង។
បើតាមទីភ្នាក់ងារព័ត៌មាន AFP ផ្កាយរណបដែលឥណ្ឌាបាញ់នោះ ស្ថិតនៅរយៈកម្ពស់៣០០គីឡូម៉ែត្រដែលជាកម្រិតទាប ហើយក៏ទាបជាងស្ថានីយ៍អវកាសអន្តរជាតិដែរ។ យ៉ាងណាមិញ លោក Bridenstine ពន្យល់ថា បំណែកផ្កាយរណបចំនួន២៤ កំពុងអណ្ដែតទៅខាងលើស្ថានីយ៍អន្តរជាតិ ដែលនោះជារឿងគួរឲ្យខ្លាច ព្រោះសកម្មភាពបែបនេះមិនសមស្របនឹងការហោះហើររបស់មនុស្សនៅទីអវកាសនៅថ្ងៃអនាគតឡើយ។
សូមបញ្ជាក់ថា យោធាអាមេរិក តែងតាមដានវត្ថុនានាលើលំហអាកាសដើម្បីប៉ាន់ស្មានពីហានិភ័យនៃការប៉ះទង្គិចជាមួយស្ថានីយ៍អវកាសអន្តរជាតិ និងផ្កាយរណបផ្សេងទៀត។ បច្ចុប្បន្ននេះ ការតាមដានកំពុងធ្វើឡើងលើវត្ថុប្រមាណជាង២ម៉ឺនដែលមានទំហធំជាង១០សង់ទីម៉ែត្រ។ ក្នុងចំណោមនេះ គេក៏ឃើញមានបំណែកអវកាសចំនួន៣ពាន់ ដែលកើតចេញពីការបាញ់កម្ទេចផ្កាយរណបរបស់ចិនកាលពីឆ្នាំ២០០៧ ផងដែរ។
បន្ថែមពីលើបំណែកមានស្រាប់ កម្ទេចកម្ទីផ្លាយរណបដែលបាញ់ទម្លាក់ដោយមីស៊ីលឥណ្ឌា នឹងធ្វើឲ្យឱកាសដែលស្ថានីយ៍អវកាសអាចប៉ះទង្គិចនឹងបំណែកទាំងនោះ មានដល់៤៤ភាគរយក្នុងរយៈពេល១០ថ្ងៃ។ យ៉ាងណាមិញ អ្វីដែលជារឿងល្អនោះ ភាគរយប្រឈមនឹងធ្លាក់ចុះវិញ ដោយសារបំណែកទាំងនោះនឹងឆេះអស់ពេលចូលដល់បរិយាកាស។
ឥណ្ឌាជាប្រទេសទីបួនបន្ទាប់ពីអាមេរិក រុស្ស៊ី និងចិន ជាប្រទេសបីដែលមានសមត្ថភាពបាញ់ទម្លាក់ផ្កាយរណបបាន។ ប៉ុន្តែសមត្ថភាពបែបនោះ បង្កឲ្យមានការព្រួយបារម្ភខ្លាំង ពិសេសមហាអំណាចទាំងនេះ អាចយកទីលំហធ្វើជាកន្លែងប្រកួតប្រជែងអាវុធរបស់ខ្លួន ទោះនាយករដ្ឋមន្ត្រី ម៉ូឌី ធានាថា កម្មវិធីលំហអាកាសរបស់ឥណ្ឌា មានគោលដៅសន្តិភាព គ្មានបំណងបង្កើតបរិយាកាសសង្គ្រាម ហើយក៏មិនសំដៅលើប្រទេសណាក្ដី៕
Tag:
NASA
ឥណ្ឌា
អាមេរិក
© រក្សាសិទ្ធិដោយ thmeythmey.com
