អន្តរជាតិ
នយោបាយអន្តរជាតិ
មេទ័ពជើងគោកថៃព្រមានការផ្ទុះសង្គ្រាមស៊ីវិល បើមានការប៉ុនប៉ងផ្ដួលរបបរាជានិយម
ឧត្តមសេនីយ៍ Apirat Kongsompong មេបញ្ជាការកងទ័ពជើងគោកថៃ (រូបភាព Khaosod English)
×![]()
ដោយ: តន ចាន់រិទ្ធារ៉ា
ប្រមុខកងទ័ពជើងគោកថៃ Apirat Kongsompong នៅថ្ងៃទី២ ខែមេសា បានព្រមានពីការផ្ទុះឡើងសង្គ្រាមស៊ីវិល ប្រសិនបើមានការប៉ុនប៉ងផ្ដួលរំលំរបបដឹកនាំបែបរាជានិយមក្នុងប្រទេស។ លោក Apirat ព្រមានបែបនេះ ស្របពេលដែលស្ថានការណ៍នយោបាយក្នុងស្រុកតានតឹងក្រោយការបោះឆ្នោត។ ឧត្តមសេនីយ៍រូបនេះ ក៏ប្រាប់អ្នកនយោបាយ និងនិស្សិតដែលទៅរៀននៅបរទេសឲ្យគោរពច្បាប់ទម្លាប់ក្នុងស្រុក ជាជាងការនាំយកមេរៀនពីខាងក្រៅមកអនុវត្តក្នុងស្រុក។
មេបញ្ជាការកងទ័ពជើងគោកថៃ ឧត្តមសេនីយ៍ផ្កាយបួន Apirat Kongsompong បានប្រាប់ឲ្យប្រជាជនថៃ ពិសេសអ្នកនយោបាយ គ្រូ និងនិស្សិត ត្រូវគោរពច្បាប់ប្រទេសជាតិឲ្យបានត្រឹមត្រូវ ហើយមិនត្រូវយកបែបបទប្រជាធិបតេយ្យពីក្រៅប្រទេសមកអនុវត្តក្នុងប្រទេសឡើយ។ បើតាមប្រមុខកងទ័ពជើងគោករូបនេះ គោលការណ៍ចម្បងរបស់យោធាថៃ គឺការពារស្ថាប័នព្រះមហាក្សត្រ និងរក្សាស្ថិរភាពប្រទេសជាតិ។
នាពិធីមួយនៅកងពលទីមួយដែលជាអង្គភាពអង្គរក្សមហាក្សត្រនៅថ្ងៃទី២ ខែមេសា លោក Apirat ដែលជាមេទ័ពដ៏មានឥទ្ធិពល បញ្ជាក់ច្បាស់ៗថា អ្នកទៅរៀននៅបរទេស និងរៀនសូត្រតាមសៀវភៅបរទេស គួររៀនសម្របខ្លួននឹងស្ថានភាពក្នុងស្រុកជាជាងចង់ផ្លាស់ប្ដូររបបដឹកនាំរាជានិយម។ លោកបន្តថា ប្រជាធិបតេយ្យប្រែប្រួលទៅតាមស្ថានភាពប្រទេសនីមួយៗ ព្រោះប្រជាធិបតេយ្យមិនមែនមានតែមួយប្រភេទឡើយ។ នេះបើតាមស្រង់សម្ដីរបស់កាសែតបាងកកប៉ុស្តិ៍។
លោក Apirat លើកឡើងពីគ្រោះថ្នាក់ បើមិនមានការគោរពក្បួនច្បាប់ទេ ហើយព្រមានឲ្យបក្សនយោបាយឈប់បំបែកបំបាក់ប្រជាជនតាមរយៈការបែងចែកក្រុមប្រជាធិបតេយ្យ និងក្រុមផ្ដាច់ការ។ លោកនិយាយបែបនេះ ស្របពេលដែលបក្សខ្លះរិះគន់គណៈកម្មការរៀបចំការបោះឆ្នោតថៃជុំវិញដំណើរការបោះឆ្នោត។ មេទ័ពរូបនេះព្រមានថា រឿងនេះអាចធ្វើឲ្យប្រទេសធ្លាក់ចូលសង្គ្រាមដូចអតីតកាល បើបក្សនយោបាយមិនគោរពច្បាប់ ហើយតវ៉ាតាមរយៈសភាទេនោះ។
ជាមួយគ្នានោះ ឧត្តមសេនីយ៍ Apirat ក៏ប្រកាសជំហរកងទ័ពដែលនៅឆ្ងាយពីនយោបាយ និងប្រកាន់ខ្ជាប់វិជ្ជាជីវៈរបស់ខ្លួនជានិច្ច។ «ពួកគេគោរពតាមកាត្វកិច្ចក្នុងការពារជាតិ សាសនា ព្រះមហាក្សត្រ ហើយស្ដាប់តាមការណែនាំរបស់មហាក្សត្រ។» នេះជាការបញ្ជាក់របស់មេទ័ពជើងគោកថៃដដែល។
បច្ចុប្បន្ននេះ សភាពការណ៍នៅថៃ កំពុងស្ថិតក្នុងភាពមិនច្បាស់លាស់ក្រោយការបោះឆ្នោតថ្ងៃទី២៤ ខែមីនា។ ដំណើរការបោះឆ្នោតនេះ រងការរិះគន់យ៉ាងខ្លាំងជុំវិញភាពមិនប្រក្រតីជាច្រើនតាំងពីការទិញសន្លឹកឆ្នោត ការរាប់សន្លឹកឆ្នោត និងរូបមន្តបែងចែកកៅអីសភាជាដើម។ បក្សធំៗចំនួនពីរដែលមានសំឡេងប្រកិតគ្នា គឺបក្សកម្លាំងប្រជារាស្ត្រ និងបក្សភឿថៃសុទ្ធតែអះអាងពីជ័យជម្នះរៀងៗខ្លួន ហើយរកដៃគូដើម្បីបង្កើតរដ្ឋាភិបាលចម្រុះតាមលទ្ធផលមិនផ្លូវការដែលខ្លួនទទួលបាន៕
Tag:
ថៃ
Apirat Kongsompong
© រក្សាសិទ្ធិដោយ thmeythmey.com
