អន្តរជាតិ
ប្រធានាធិបតីតៃវ៉ាន់ បញ្ជាឲ្យប្រើកម្លាំង បើយន្តហោះចិនបំពានខ្សែខណ្ឌចែកទឹកដីម្ដងទៀត ប្រធានាធិបតីតៃវ៉ាន់ Tsai Ing-wen នៅថ្ងៃទី១ ខែមេសា បានចេញបញ្ជាឲ្យប្រើកម្លាំងដើម្បីបណ្ដេញយន្តហោះទាំងឡាយដែលបំពានខ្សែខណ្ឌចែកទឹកនៅច្រកសមុទ្រតៃវ៉ាន់។ ការចេញបញ្ជានេះ ធ្វើឡើងបន្ទាប់ពីយន្តហោះចម្បាំងរបស់ចិនពីរគ្រឿងហោះឆ្លងកាត់ខ្សែបែងចែកទឹកដីរវាងចិនដីគោក និងកោះតៃវ៉ាន់កាលពីថ្ងៃទី៣១ ខែមីនា។ តៃវ៉ាន់ចាត់ទុកសកម្មភាពរបស់ចិន ជាការបង្ករឿង និងធ្វើឡើងដោយមានចេតនាតែម្ដង។
ភាពតានតឹងផ្នែកយោធារវាងចិន និងកោះតៃវ៉ាន់ ទំនងជាកើនឡើងខ្លាំងក្រោយយន្តហោះចម្បាំងចិនចំនួនពីរគ្រឿងធុន J-11 កាលពីថ្ងៃទី៣១ ខែមីនា បានហោះឆ្លងចូលដែនអាកាសតៃវ៉ាន់ខាងលើច្រកសមុទ្រតៃវ៉ាន់ ដែលខណ្ឌចែកទឹកដីទាំងពីរ។ មួយថ្ងៃក្រោយហេតុការណ៍នេះ លោកស្រី Tsai Ing-wen ប្រធានាធិបតីតៃវ៉ាន់ ក៏បើកភ្លើងខៀវឲ្យយោធាតៃវ៉ាន់ប្រើកម្លាំងដើម្បីបណ្ដេញយន្តហោះណាដែលបំពានដែនអាកាសខ្លួន។
តាមទំព័រហ្វេសប៊ុករបស់ខ្លួន លោកស្រី Tsai បានចេញបញ្ជាឲ្យប្រើកម្លាំងជាមុនប្រឆាំងសកម្មភាពបង្កហេតុណាមួយតាមរយៈការបំពានខ្សែខណ្ឌទឹកដី។ ក្នុងហេតុការណ៍ចុងសប្ដាហ៍មុន តៃវ៉ាន់មិនបានប្រើកម្លាំងអ្វីទេ ដោយគ្រាន់តែប្រាប់ឲ្យយន្តហោះចិនចាកចេញពីដែនអាកាសរបស់ខ្លួនប៉ុណ្ណោះ ខណៈយន្តហោះចិនចូលដល់ផ្នែកនិរតីរបស់កោះមួយនេះ និងស្ថិតក្នុងដែនអាកាសតៃវ៉ាន់ដល់ទៅជាង១០នាទី។ នេះបើតាមការបញ្ជាក់របស់ក្រសួងការពារជាតិតៃវ៉ាន់។
បញ្ជាខ្លាំងៗរបស់ប្រធានាធិបតីតៃវ៉ាន់បែបនេះ ធ្វើឲ្យមានការបារម្ភជុំវិញទំនាក់ទំនងរវាងចិន និងតៃវ៉ាន់ដែលចិនចាត់ទុកជាខេត្តមួយមិនអាចកាត់ផ្ដាច់បាន។ ចិនមិនទាន់ប្រតិកម្មតបនឹងបញ្ជារបស់លោកស្រី Tsai ឡើយ ប៉ុន្តែភាពតានតឹងអាចនឹងផ្ទុះឡើងមិនខាន ហើយអាមេរិកក៏អាចត្រូវអូសចូលសំណុំរឿងរ៉ាំរ៉ៃនេះដែរ ដ្បិតមិននៅស្ងៀមឡើយ បើតៃវ៉ានជួបបញ្ហាដោយសារចិននោះ។ នេះក៏ព្រោះតែអាមេរិក មានចំណងផ្នែកច្បាប់ដើម្បីជួយតៃវ៉ាន់ ទោះគ្មានទំនាក់ទំនងការទូតផ្លូវការក្ដី។
លោកស្រី Tsai ដែលជាប់ឆ្នោតជាប្រធានាធិបតីតៃវ៉ាន់នៅឆ្នាំ២០១៦ តែងជាមុខសញ្ញារបស់ក្រុងប៉េកាំង ព្រោះលោកស្រីប្រកាន់ជំហរតឹងរ៉ឹងខ្លាំង មាននិន្នការងាកទៅរកឯករាជ្យ ហើយប្រកាសមិនទទួលស្គាល់គោលការណ៍ចិនតែមួយផង។ ការដាក់បញ្ជាឲ្យប្រើកម្លាំង អាចជាការប្រថុយប្រថានសម្រាប់តៃវ៉ាន់ ប៉ុន្តែលោកស្រី Tsai ក៏ត្រូវគិតគូរពីនយោបាយក្នុងស្រុក និងជំហានថ្ងៃខាងមុខ ពិសេសបំណងការពារកៅអីប្រធានាធិបតីក្នុងការបោះឆ្នោតឆ្នាំ២០២០ ។
ជាការកត់សម្គាល់ ឲ្យមាននាវាចម្បាំងអាមេរិកបើកកាត់ច្រកសមុទ្រតៃវ៉ាន់ ចិននឹងបញ្ជូនយន្តហោះរបស់ខ្លួនឆ្វែលតាមក្រោយផងដែរ។ នៅថ្ងៃទី២៤ ខែមីនា អាមេរិកទើបបញ្ជូននាវាពិឃាតមួយគ្រឿង និងកប៉ាល់មួយគ្រឿងទៀត បើកឆ្លងកាត់ដែនទឹកនេះ ដែលនេះទំនងជាមូលហេតុដែលចិនបញ្ជូន J-11 ទៅកាន់តែកៀកតៃវ៉ាន់វិញ។ ក្នុងឆ្នាំនេះ អាមេរិកបានបញ្ជូននាវាចម្បាំងទៅកាន់ច្រកសមុទ្រនេះបីដងហើយ គឺខែមករា, ខែកុម្ភៈ និងចុងក្រោយនៅថ្ងៃទី២៤ ខែមីនាកន្លងទៅ។
ទង្វើរបស់អាមេរិក ស្ដែងឲ្យឃើញពីជំហររក្សាវត្តមានរបស់ខ្លួនក្នុងតំបន់នេះ និងនិយាយដោយឡែកតំបន់ឥណ្ឌូ-ប៉ាស៊ីហ្វិកទាំងមូល ជាទីដែលចិនកំពុងបង្កើនឥទ្ធិពលខ្លាំង។ បើគិតតាមគំរូខាងលើ ចិននឹងបង្កើនសកម្មភាពយោធារបស់ខ្លួនកាន់តែច្រើន និងកាន់តែធំថែមទៀត បើអាមេរិកនៅតែបន្តបញ្ជូននាវារបស់ខ្លួនឆ្លងកាត់ច្រកសមុទ្រតៃវ៉ាន់ទៀតដែរនោះ៕
Tag:
តៃវ៉ាន់
ចិន
អាមេរិក
Tsai Ing-wen
© រក្សាសិទ្ធិដោយ thmeythmey.com