អន្តរជាតិ
តុលាការកំពូលវេណេស៊ុយអេឡា ស្នើដកអភ័យឯកសិទ្ធិពីមេបក្សប្រឆាំងលោក ក្វៃដូ
×![]()
តុលាការកំពូលរបស់វេណេស៊ុយអេឡា បានស្នើសភាឲ្យដកហូតអភ័យឯកសិទ្ធិពីមេបក្សប្រឆាំងលោក ហ័ន ក្វៃដូ។ សម្រាប់ចំណាត់ការថ្មីនេះ លោក ក្វៃដូ អាចឈានដល់ការជាប់ពន្ធនាគារ ព្រោះលោកបានល្មើសនឹងបម្រាមចាកចេញពីប្រទេស ដែលបានដាក់ចេញកាលពីប៉ុន្មានខែកន្លងទៅ។
នៅថ្ងៃទី១ ខែមេសា ប្រធានតុលាការកំពូលវេណេស៊ុយអេឡា លោក Maikel Moreno បាននិយាយថា លោក ហ័ន ក្វៃដូ គួរត្រូវកាត់ទោសពីបទល្មើសនឹងបម្រាមមួយស្តីពីការចាកចេញពីប្រទេស។ ការល្មើសនេះ បានកើតឡើងនៅពេលដែល លោកបានធ្វើដំណើរទៅកាន់បណ្តាប្រទេសក្នុងតំបន់អាមេរិកឡាទីន ដើម្បីរកសំឡេងគាំទ្រក្នុងគោលដៅផ្លាស់ប្តូររបបដឹកនាំនៅវេណេស៊ុយអេឡា។
មេដឹកនាំបក្សប្រឆាំងលោក ក្វៃដូ ដែលមានអភ័យឯកសិទ្ធិរួចផុតពីការកាត់ទោសដ្បិតលោកជាប្រធានរដ្ឋសភានោះ ក៏ត្រូវរងការចោទប្រកាន់ពីរដ្ឋាភិបាលលោក នីកូឡាស់ ម៉ាឌុយរ៉ូ ពាក់ព័ន្ធនឹងជំរុញឲ្យមានបាតុកម្មហិង្សាតាមដងផ្លូវ និងទទួលជំនួយខុសច្បាប់ពីបរទេសថែមទៀតផង។
ក្រៅពីនេះ ចំណាត់ការផ្សេងទៀតដែលដាក់ប្រឆាំងលោក ក្វៃដូ គឺមានដូចជា ហាមឃាត់ការលក់ទ្រព្យសម្បត្តិ និងបង្កកគណនីធនាគារ ឬប្រព័ន្ធហិរញ្ញវត្ថុនានាក្នុងទឹកដីវេណេស៊ុយអេឡា។ យោងតាមការចុះផ្សាយរបស់ទីភ្នាក់ងារព័ត៌មាន Xinhua តុលាការកំពូលវេណេស៊ុយអេឡា ក៏ស្នើឲ្យដំណើរការស៊ើបអង្កេតលើលោកក្វៃដូបន្តទៀត។ យ៉ាងណាមិញ គេពុំទាន់ឃើញ ការិយាល័យស៊ើបអង្កេតវេណេស៊ុយអេឡា សម្រេចចោទប្រកាន់ជាផ្លូវការ ឬចេញដីការចាប់ខ្លួនលោក ក្វៃដូ នោះឡើយ។
សូមបញ្ជាក់ថា លោក ហ័ន ក្វៃដូ បានប្រកាសខ្លួនឯងជាប្រធានាធិបតីស្តីទីវេណេស៊ុយអេឡាកាលពីចុងខែមករាកន្លងទៅ ដោយលើកឡើងថា ការបោះឆ្នោតដែលលោក ម៉ាឌុយរ៉ូ ឈ្នះទទួលជ័យជំនះកាលពីខែឧសភាឆ្នាំ២០១៨ ពុំមានភាពស្របច្បាប់ ដ្បិតពុំមានវត្តមានបក្សប្រឆាំង។
លោក ម៉ាឌុយរ៉ូ បានចោទប្រកាន់លោក ក្វៃដូ និងសហរដ្ឋអាមេរិក ថារៀបចំរដ្ឋប្រហារផ្តួលរំលំរដ្ឋាភិបាលលោក។ លើសពីនេះ លោកប្រធានាធិបតី ម៉ាឌុយរ៉ូ ដែលចាត់ទុកលោកក្វៃដូជាអាយ៉ង់របស់ក្រុងវ៉ាស៊ីនតោន បាននិយាយថា លោកក្វៃដូគួរប្រឈមមុខនឹងផ្លូវច្បាប់។ ប៉ុន្តែមកដល់ពេលនេះ គេពុំទាន់ឃើញមានការបញ្ជាជាសាធារណៈណាមួយ ពាក់ព័ន្ធនឹងការចាប់ខ្លួនលោក ក្វៃដូ នៅឡើយទេ៕
Tag:
វេណេស៊ុយអេឡា
ហ័ន ក្វៃដូ
© រក្សាសិទ្ធិដោយ thmeythmey.com
