អន្តរជាតិ
អាជ្ញាធរបង់ក្លាដែស ឃាត់ជនជាតិរ៉ូហ៊ីងយ៉ាមួយក្រុមដែលប្រថុយជិះទូកនេសាទទៅម៉ាឡេស៊ី
រូបភាពតំណាង៖ Xinhua
×![]()
អាជ្ញាធរបង់ក្លាដែស បានបញ្ឈប់សកម្មភាពប៉ុនប៉ងចាកចេញពីបង់ក្លាដែសទៅកាន់ម៉ាឡេស៊ីតាមរយៈទូកនេសាទរបស់ជនភៀសខ្លួនរ៉ូហ៊ីងយ៉ាមួយក្រុម។ សម្រាប់បង់ក្លាដែស សកម្មភាពរបស់ក្រុមជនភៀសខ្លួនទាំងនេះ គឺជារឿងដ៏ប្រថុយប្រថានជីវិតមួយ ដែលបង់ក្លាដែសមិនអាចបណ្តែតបណ្តោយបានឡើយ។
ទំនងជាមិនអាចទ្រាំទ្របានជាមួយនឹងស្ថានភាពមិនល្អ នៃការរស់នៅក្នុងជំរំបណ្តោះអាសន្ននៅបង់ក្លាដែស ជនភៀសខ្លួនរ៉ូហ៊ីងយ៉ាមួយក្រុម រួមជាមួយនឹងពលរដ្ឋបង់ក្លាដែសមួយចំនួនផងនោះ បានព្យាយាមចាកចេញពីបង់ក្លាដែស តាមរយៈមេខ្យល់ ដោយទូនេសាទ។ ក៏ប៉ុន្តែផែនការរបស់ពួកគេ មិនទទួលបានជោគជ័យឡើយ។
តាមភ្នាក់ងារព័ត៌មាន AFP កងកម្លាំងសន្តិសុខបង់ក្លាដែស បានឃាត់ខ្លួនមនុស្ស ២៩ នាក់ ដែលក្នុងនោះមាន ២២ នាក់ មានទាំងស្ត្រី និងកុមារផងជាជនភៀសខ្លួនជនជាតិរ៉ូហ៊ីងយ៉ាមកពីជំរំ Cox's Bazar របស់បង់ក្លាដែស និងអ្នកដទៃផ្សេងទៀត ជាពលរដ្ឋបង់ក្លាដែស និងមេខ្យល់ ដែលជាអ្នកអះអាងថា អាចនាំពួកគេទៅដល់ម៉ាឡេស៊ីបាន។
អ្វីដែលគួរឲ្យព្រួយបារម្ភនោះ ក្នុងប្រតិបត្តិការឃាត់ខ្លួននោះ កងកម្លាំង ក៏បានរកឃើញទូកនេសាទដ៏រយីករយាគមួយ ដែលជាមធ្យោយបាយសម្រាប់ធ្វើដំណើរទៅកាន់ម៉ាឡេស៊ីក្នុងលំហសមុទ្រដ៏ល្វឹងល្វើយ ។ កងកម្លាំង បានហៅការប៉ុនប៉ងរបស់ក្រុមនេះ គឺជាវិថីជីវិតដ៏ប្រថុយប្រថានបំផុត។
តាមការអះអាងរបស់ប៉ូលិសបង់ក្លាដែស គិតចាប់ពីចុងឆ្នាំមុនមក ប៉ូលិសបង់ក្លាដែស បានធ្វើប្រតិបត្តិការឃាត់ខ្លួនជនភៀសខ្លួនពីការចាកចេញពីបង់ក្លាដែសទៅកាន់ម៉ាឡេស៊ីប្រាំមួយដងមកហើយ។ កាលពីខែមុន ប៉ូលិស ក៏បានឃាត់ខ្លួនបានមនុស្ស ១០០ នាក់ ដែលប៉ុនប៉ងធ្វើដំណើរតាមទូកនេសាទដូចគ្នានេះផងដែរ។
គួរជម្រាបផងដែរថា មកទល់ពេលនេះ រដ្ឋាភិបាលមីយ៉ាន់ម៉ា មិនទាន់មានដំណោះស្រាយជាក់លាក់សម្រាប់ជនជាតិរ៉ូហ៊ីងយ៉ាជាងកន្លះលាននាក់ ដែលបានភៀសខ្លួនពីរដ្ឋ រ៉ាខានដោយសារតែការប៉ះទង្គិចផ្ទៃក្នុង ទៅរស់នៅក្នុជំរំរបស់បង់ក្លាដែសនៅឡើយនោះទេ។ ទោះបីជាជនភៀសខ្លួនទាំងនោះ ទទួលបានការគាំពារពីរដ្ឋាភិបាលម្ចាស់ស្រុក និងអង្គការអន្តរជាតិក៏ដោយ ពួកគេមួយចំនួន នៅមិនស្ងៀមឡើយ។ ពួកគេ តែងតែព្យាយាមចាកចេញទៅកាន់ប្រទេសទីបី ជាមួយនឹងការរំពឹងថា នឹងទទួលបានភាពល្អប្រសើរជាងនេះ៕
Tag:
បង់ក្លាដែស
ម៉ាឡេស៊ី
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
